ചമോമൈൽ ചായ കുടിച്ചിട്ടുണ്ടോ? രാവിലെ പാൽച്ചായ കുടിക്കുന്നതിനേക്കാൾ ഇരട്ടി ഫലവും രുചിയും നൽകും

പൊതുവെ മലയാളികളുടെ പ്രിയപ്പെട്ട പാനീയങ്ങളിലൊന്നാണ് ചായ. ദിവസവും എത്ര വേണമെങ്കിലും ചായ കുടിക്കാമെങ്കിലും ഈ അടുത്ത് ഐസിഎംആർ പറഞ്ഞ പ്രകാരം അധികം ചായ കുടിക്കുന്നത് ആരോഗ്യത്തിന് അത്ര നല്ലതല്ല. അതുപോലെ ആരോഗ്യത്തിന് വേണ്ടി നല്ല ഹെർബൽ ചായയകൾ കുടിക്കുന്നത് ഗുണം ചെയ്യും. വ്യത്യസ്തമായ പലത്തരം ചായകൾ ഉണ്ടെങ്കിൽ ആരോഗ്യത്തിന് ഗുണങ്ങൾ നൽകുന്ന ചായകൾ കുടിക്കാൻ ശ്രമിക്കണം.

കറുവപ്പട്ട ചായ

തടി കുറയ്ക്കാൻ ഏറെ നല്ലതാണ് കറുവപ്പട്ട ചായ. മെറ്റബോളിസം വർധിപ്പിക്കാനും കൊളസ്ട്രോൾ കുറയ്ക്കാനും സഹായിക്കുന്നതാണ് കറുവപ്പട്ട ചായ. കലോറി കുറയ്ക്കാൻ വളരെ നല്ലതാണ് കറുവപ്പട്ട ചായ. ഇൻസുലിൻ പ്രതിരോധിക്കാനും വളരെ നല്ലതാണ് കറുവപ്പട്ട.

എങ്ങനെ തയാറാക്കാം – ഒരു ചെറിയ പാത്രത്തിൽ കറുവപ്പട്ട പൊടി, തേൻ, നാരങ്ങ നീര് എന്നിവ ചേർത്ത് നന്നായി യോജിപ്പിക്കുക. ഇനി ഒരു ഗ്ലാസ് വെള്ളം തിളപ്പിച്ച് എടുക്കുക. അതിലേക്ക് നേരത്തെ തയാറാക്കിയ മിശ്രിതം ഒഴിക്കുക. ഇനി ഇത് അരിച്ച് എടുത്ത് കുടിക്കാവുന്നതാണ്.

ഇഞ്ചി ചായ

ആരോഗ്യത്തിന് പല തരത്തിലുള്ള ഗുണങ്ങൾ നൽകുന്നതാണ് ഇഞ്ചി. ദഹനം എളുപ്പത്തിലാക്കാൻ ഇഞ്ചി ഏറെ സഹായിക്കുമെന്ന് എല്ലാവർക്കുമറിയാം. ഇതിൽ അടങ്ങിയിരിക്കുന്ന ആൻ്റി ഓക്സിഡൻ്റായ ജിഞ്ചറോൾ പല രോഗങ്ങൾക്കുമുള്ള മരുന്നാണ്. വൈറ്റമിൻ ബി 3, ബി 6, ഇരുമ്പ്, പൊട്ടാസ്യം, വൈറ്റമിൻ സി തുടങ്ങിയ വിറ്റാമിനുകളും ധാതുക്കളും ഇഞ്ചിയിൽ അടങ്ങിയിട്ടുണ്ട്. രോഗപ്രതിരോധ ശേഷി വർധിപ്പിക്കാനും ഇഞ്ചി ഏറെ നല്ലതാണ്.

ഇഞ്ചി ചായ തയാറാക്കാൻ – വളരെ എളുപ്പത്തിൽ തയാറാക്കാൻ കഴിയുന്നതാണ് ഇഞ്ചി ചായ. ഇതിനായി 1 കപ്പ് വെള്ളത്തിലേക്ക് ഒരു വലിയ കഷണം ഇഞ്ചി കഴുകി വ്യത്തിയാക്കിയ ശേഷം ചുരണ്ടി ഇടുക. ഇനി ഇത് നന്നായി തിളപ്പിച്ച് എടുക്കുക. അതിന് ശേഷം ഇത് അരിച്ച് മാറ്റാവുന്നതാണ്. ഇനി ഇതിലേക്ക് അൽപ്പം തേൻ ഒഴിച്ച് കുടിക്കാം.

ചെമ്പരത്തി ചായ

കേൾക്കുമ്പോൾ കൗതുകം തോന്നുമെങ്കിലും ചെമ്പരത്തി ചായ ആരോഗ്യത്തിന് വളരെ നല്ലതാണ്. വ്യത്യസ്തമായ പലത്തരം പൂക്കളാണ് ഈ ചെടിയ്ക്കുള്ളത്. ചുവപ്പ്, വെള്ള, പിങ്ക് തുടങ്ങി പല നിറങ്ങളിലുണ്ട്. ഇതിൽ നിന്നാണ് ചായ തയാറാക്കുന്നത്. ആൻ്റി ഓക്സിഡൻ്റുകളാൽ സമ്പുഷ്ടമാണ് ഈ ചായ. ഹൃദ്രോഗം പോലെയുള്ള പ്രശ്നങ്ങൾ അകറ്റാനും ഈ ചായ വളരെ നല്ലതാണ്. മാത്രമല്ല രക്തസമ്മർദ്ദം, കൊളസ്ട്രോൾ എന്നിവയ്ക്ക് എതിരെയും ഈ ചായ നല്ലതാണ്.

ഇത് തയാറാക്കാൻ – ഇതിനായി ഉണക്കിയ ചെമ്പരത്തി പൂവാണ് ആവശ്യമായിട്ടുള്ളത്. കാൽ കപ്പ് ചെമ്പരത്തിയുടെ ഉണക്കിയ ഇതളുകൾ ഒരു നാല് കപ്പ് വെള്ളത്തിലേക്ക് ചേർത്ത് നന്നായി തിളപ്പിച്ച് എടുക്കുക. ചായക്ക് നല്ല നിറം വരുന്നത് വരെ തിളപ്പിക്കണം. ഏകദേശം 20 മിനിറ്റ് തിളപ്പിച്ച ശേഷം തണുക്കുമ്പോൾ ഒരു രാത്രി മുഴുവൻ ഫ്രിഡ്ജിൽ വച്ച ശേഷം അരിച്ച് കുടിക്കാവുന്നതാണ്.

ചമോമൈൽ ചായ

വെള്ള ഇതളുകളുള്ള ഈ പൂവ് ഔഷധ സസ്യമായും അലങ്കാര ചെടിയായുമൊക്കെ ഉപയോഗിക്കാറുണ്ട്. ആസ്റ്ററേസി കുടുംബത്തിലെ വാർഷിക സസ്യമാണിത്. ഇത് ഉണക്കിയാണ് ചായ തയാറാക്കുന്നത്. ഭാരും കുറയ്ക്കാനും അതുപോലെ ശരീരത്തിലെ വിഷാംശങ്ങളെ പുറന്തള്ളാനും ഇത് വളരെയധികം സഹായിക്കും. വിശപ്പ് കുറയ്ക്കുന്നതിലൂടെ ഇത് ഭാരം കൂടാതിരിക്കാൻ സഹായിക്കുന്നതാണ്.

എങ്ങനെ തയാറാക്കാം – ഇതിനായി ചമോമൈൽ പൂവുകൾ നന്നായി കഴുകി വ്യത്തിയാക്കി എടുക്കുക. ഇനി വെള്ളം തിളപ്പിക്കുക അതിലേക്ക് ഈ പൂക്കളിട്ട് നന്നായി തിളപ്പിക്കുക. അഞ്ച് മിനിറ്റ് തിളപ്പിച്ച ശേഷം ഇത് നിർത്തുക. അതിന് ശേഷം അരിച്ച് കുടിക്കുക.