ഉള്ളി തീയൽ ദേ ഇങ്ങനെ വെച്ചോളൂ; ആർക്കും ഇഷ്ടമാകും

തേങ്ങ വറുത്തരച്ച കറികൾ ചോറിന് സൂപ്പറാണ്. അതുപോലെയാണ് തീയലും. തീയലുകളിൽ രാജാവ് ആണ് ഉള്ളി തീയൽ, തീയലിനു രുചികൂട്ടാൻ ഇതാ ചില പൊടിക്കൈകൾ. ഇത് വളരെ രുചികരവും ഉണ്ടാക്കാൻ വളരെ ലളിതവുമാണ്

ചേരുവകൾ

തേങ്ങ – ഒന്നര കപ്പ് തിരുമ്മിയത്
ചുവന്നുള്ളി – 1 കപ്പ്
പച്ചമുളക് – 3 കീറിയത്
മുളകുപൊടി – 2 ടീസ്പൂൺ
മല്ലിപ്പൊടി – 1 ടീസ്പൂൺ
മഞ്ഞൾപ്പൊടി – 1/4 ടീസ്പൂൺ
ഉലുവാപ്പൊടി – 2 നുള്ള്
പുളി – നെല്ലിക്കാ വലുപ്പത്തിൽ
കറിവേപ്പില – 2 തണ്ട്
വെളിച്ചെണ്ണ – 2 ടീസ്പൂൺ
വെള്ളം – 2 കപ്പ്
ഉപ്പ് – ആവശ്യത്തിന്

തയാറാക്കുന്ന വിധം

ഒരു ബൗളിൽ പുളി കാൽ കപ്പ് വെള്ളം ഒഴിച്ച് പിഴിഞ്ഞ് മാറ്റി വയ്ക്കുക.

ഒരു ഫ്രൈയിങ് പാനിൽ തേങ്ങ , മൂന്ന് ചുവന്നുള്ളി അരിഞ്ഞത് , ഒരു തണ്ട് കറിവേപ്പില എന്നിവ ചേർത്ത് ബ്രൗൺ കളർ ആകുന്നത് വരെ വറുത്തെടുക്കുക . ചൂട് ആറിയതിന് ശേഷം മിക്സിയുടെ ജാറിൽ ഇട്ട് വെള്ളം ചേർക്കാതെ നന്നായി അരച്ചെടുത്ത് മാറ്റി വയ്ക്കുക.

ചുവട് കട്ടിയുള്ള പാത്രം വെച്ച് രണ്ട് ടീസ്പൂൺ വെളിച്ചെണ്ണ ചൂടാക്കി കടുക് ഇട്ട് പൊട്ടിക്കുക , ശേഷം ഒരു കപ്പ് ചുവന്നുള്ളി അരിഞ്ഞത് , പച്ചമുളക് , കറിവേപ്പില , ഉപ്പ് എന്നിവ ചേർത്ത് രണ്ട് മിനിറ്റ് വഴറ്റി എടുക്കുക . ശേഷം തേങ്ങ അരച്ചതും പുളി പിഴിഞ്ഞതും അവിശ്യത്തിന് വെള്ളവും ചേർത്ത് കറി കുറുകി വരുന്നത് വരെ തിളപ്പിക്കുക . എണ്ണ തെളിഞ്ഞ് വരുമ്പോൾ തീ ഓഫ് ചെയ്യുക. സ്വാദിഷ്ടമായ ഉള്ളി തീയൽ റെഡി ആയി .