പാട്ടു പാടുന്നത് ഇത്രയും വലിയ അപരാധമാണോ. പാട്ടിനൊപ്പം ഡാന്സ് ചെയ്യുന്നത് അതിലും തെറ്റാണോ. പാട്ടും ഡാന്സും ചേര്ത്ത് റീല്സ് ചെയ്യുന്നത് ഇത്രയും വലിയ പാതകമാണെങ്കില് ‘കേസെടുക്കണം പിള്ളേച്ചാ അവര്ക്കെതിരേ’ എന്നാണ് സോഷ്യല് മീഡിയയയില് വരുന്ന ട്രോളുകള്. ദേവദൂതന് സിനിമയിലെ ‘പൂവേ പൂവേ പാലപ്പൂവേ’ തുടങ്ങുന്ന പാട്ട് ഇഷ്ടപ്പെടാത്തവരായി ആരുമുണ്ടാകില്ല. മോഹന്ലാല് അഭിനയിച്ച സിനിമയിലെ പാട്ടാണ് ഇപ്പോള് വില്ലനായി മാറിയിരിക്കുന്നത്. പത്തനം തിട്ട തിരുവല്ല നഗരസഭാ ഓഫീസാണ് ഷൂട്ടിംഗ് സെറ്റ്. അഭിയനിയിച്ചവരെല്ലാം അതേ ഓഫീസിലെ ജീവനക്കാര് തന്നെ. വനിതകളും പുരുഷന്മാരും അടക്കം എട്ട് അഭിനേതാക്കള്.
കഴിഞ്ഞ ഞായറാഴ്ചയാണ് മൊബൈലില് ഷൂട്ട് നടന്നത്. ഷൂട്ടൊക്കെ വന് വിജയമായിരുന്നു. പിന്നെ, അതിന്റെ എഡിറ്റിംഗും ഗ്രാഫിക്സ് അധികമില്ലാതെ നാച്വറല് അഭിനയവും കാഴ്ചവെച്ചാണ് സര്ക്കാര് കലാകാരന്മാരുടെ പ്രകടനം. ഒടുവില് അവര് അത് റീല്സായി റിലീസ് ചെയ്തു. റീല് കണ്ടവരെല്ലാം വീണ്ടും വീണ്ടും കണ്ടു. അഭിപ്രായങ്ങളുടെ ഘോഷാത്രയായിരുന്നു. എല്ലാവരും അഭിനന്ദിച്ചു. പക്ഷെ, റിലീസ് ചെയ്ത റീല് വിജയിച്ചതോടെ നഗരസഭാ സെക്രട്ടറിയുടെ വക മെഡലും വന്നു. റീലിസ് അഭിനയിച്ച എട്ടു ജീവനക്കാര്ക്കും കാരണം കാണിക്കല് നോട്ടീസായാണ് മെഡല് നല്കിയത്.
റവന്യൂ വിഭാഗത്തിലെ വനിതകള് അടക്കം ഉദ്യോഗസ്ഥര്ക്കാണ് സെക്രട്ടറി നോട്ടീസ് നല്കിയത്. കഴിഞ്ഞ ദിവസമാണ് റീല്സ് സമൂഹമാധ്യമങ്ങളില് വ്യാപകമായി പ്രചരിച്ചത്. ചട്ടപ്രകാരം സര്ക്കാര് ഓഫീസില് ഉദ്യോഗസ്ഥര് റീല്സ് ചെയ്തത് സര്വീസ് റൂള്സിന് വിരുദ്ധമെന്നാണ് തിരുവല്ല നഗരസഭാ സെക്രട്ടറി പറയുന്നത്. ഇതു പ്രകാരമാണ് വനിതാ ജീവനക്കാര് അടക്കം എട്ടു പേര്ക്ക് നഗരസഭാ സെക്രട്ടറി കാരണം കാണിക്കല് നോട്ടീസ് നല്കിയിരിക്കുന്നത്. മൂന്നു ദിവസത്തിനുള്ളില് വിശദീകരണം നല്കണമെന്നും അത് തൃപ്തികരം അല്ലെങ്കില് കര്ശന നടപടി ഉണ്ടാകുമെന്നും നോട്ടീസില് പറയുന്നു.
പൊതുജനങ്ങള്ക്ക് തടസമുണ്ടാകാതെ ഓഫീസ് സമയത്തിനു ശേഷമാണ് റില്സ് എടുത്തതെങ്കില് പ്രശ്നങ്ങളില്ലെന്ന് മുന്സിപ്പല് സെക്രട്ടറി വ്യക്തമാക്കിയിട്ടുണ്ട്. എങ്കിലും സര്ക്കാര് ചട്ടം മറികടക്കുന്നത് ദൂരവ്യാപക പ്രത്യാഘാതങ്ങള്ക്ക് വഴിവെയ്ക്കുമെന്നാണ് വിലയിരുത്തല്. വളരെ പ്രൊഫഷണലായിട്ടാണ് അവര് വീഡിയോ ഷൂട്ട് ചെയ്തിരിക്കുന്നത്. ആരും കണ്ടിരുന്നു പോകും. അത്രയ്ക്കും ഗംഭീരമായാണ് അവര് അഭിനയിച്ചിരിക്കുന്നത്. പെന്റിംഗ് ഫയല് തീര്ക്കാന് ഞായറാഴ്ചയാണ് ഇവര് ഓഫീസില് എത്തിയത്.
ഉച്ച ഭക്ഷണം കഴിച്ച് അല്പ്പം വിശ്രമിക്കുമ്പോള് തോന്നിയ ബുദ്ധിയായിരുന്നു ഇത് എന്നാണ് അവര് പറയുന്നത്. ചില ജീവനക്കാര് ഇക്കാര്യത്തെ കുറിച്ച് നഗരസഭാ സെക്രട്ടറിക്ക് പരാതി നല്കിയതാണ് ആകെ പ്രശ്നങ്ങളിലേക്ക് വഴിവെച്ചത്. റവന്യൂ ജീവനക്കാരായ കാലാകാരന്മാര്ക്ക് പണി കിട്ടുമോ എന്നാണ് ഇനി കണ്ടറിയേണ്ടത്. എന്നാല്, കലാകാരന്മാര്ക്ക് സോഷ്യല് മീഡിയ ഗ്യാലറി അകൂലമാണ്. സര്ക്കാര് സ്ഥാപനങ്ങള് തൊട്ട് പോലീസ് സേനയെ വരെ ഷൂട്ടിംഗിന് ഉപയോഗിക്കുന്ന നാടാണ് കേരളം. എന്നാല്, സര്ക്കാര് അനുമതിയില്ലാതെ സ്വന്തം നിലയില് ഒന്നും ചെയ്യാന് ഉദ്യോഗസ്ഥര്ക്ക് കഴിയില്ലെന്നതാണ് വസ്തുത.
CONTENT HIGHLIGHTS; Song, Job, Govt Office in Devduthan ‘Ah Cool Reel’: All Officials Get Show-Cause Notices