അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സംസ്ഥാനത്ത് ആന എഴുന്നള്ളിപ്പുമായി ബന്ധപ്പെട്ട് വിശദമായ മാര്ഗനിര്ദേശങ്ങൾ പുറത്തിറക്കിയ ഹൈക്കോടതി ഉത്തരവ് വിശദമായി പരിശോധിക്കാൻ വനം വകുപ്പ്. ഇതുമായി ബന്ധപ്പെട്ട ദേവസ്വങ്ങളുടെ ആശങ്ക പരിഗണിക്കുമെന്നും ആവശ്യമെങ്കിൽ പുനഃ പരിശോധന ഹർജി നൽകാൻ സർക്കാരിനോട് ആവശ്യപ്പെടുമെന്നും വനം വകുപ്പ് വ്യക്തമാക്കി.
ഹൈക്കോടതിയുടെ മാര്ഗനിർദേശങ്ങൾക്കെതിരെ തിരുവമ്പാടി ദേവസ്വം രംഗത്തെത്തിയിരുന്നു. നിലവിലെ നിര്ദ്ദേശപ്രകാരം തൃശൂര് പൂരത്തിലെ മഠത്തില് വരവടക്കം നടത്താന് കഴിയില്ലെന്ന് തിരുവമ്പാടി ദേവസ്വം സെക്രട്ടറി കെ ഗിരീഷ് കുമാര് പറഞ്ഞു. തൃശ്ശൂര് പൂരം പാടത്തേക്ക് മാറ്റേണ്ട സാഹചര്യമെന്നും അദ്ദേഹം വിമര്ശിച്ചു. ആനകള്ക്കടുത്തുനിന്ന് എട്ടു മീറ്റര് ദൂരം എന്നത് പൂരത്തിന്റെ എല്ലാ ചടങ്ങുകളെയും തടസ്സപ്പെടുത്തുമെന്നും കെ ഗിരീഷ് കുമാര് അഭിപ്രായപ്പെട്ടു. ആനകള് തമ്മില് നിശ്ചിതകലം പാലിക്കണമെന്ന നിര്ദ്ദേശം മഠത്തില് വരവും ഇലഞ്ഞിത്തറമേളവും തൃശ്ശൂര്പൂരത്തെയും തകര്ക്കുന്നതാണെന്നും ആനയുടെ മുന്നില് നിന്നാണോ പിന്നില് നിന്നാണോ എട്ടു മീറ്റര് അകലം പാലിക്കേണ്ടത് എന്നത് ഉത്തരവില് വ്യക്തമല്ലെന്നും അദ്ദേഹം പറഞ്ഞു.
അതേസമയം, മതപരിപാടികളിലും ഉത്സവങ്ങളിലും മറ്റു പരിപാടികളിലും ആനകളെ എഴുന്നള്ളിക്കുന്നതിലാണ് ഹൈക്കോടതിയുടെ മാര്ഗനിര്ദേശങ്ങളടങ്ങിയ ഉത്തരവിറക്കിയത്. പരിപാടിയുടെ സംഘാടകര് ആനയുടെ ആരോഗ്യ സര്ട്ടിഫിക്കറ്റ് അടക്കമുള്ള എല്ലാ രേഖകളും ഉറപ്പാക്കണമെന്നാണ് പ്രധാന മാര്ഗനിര്ദേശം. ജില്ലാ തല സമിതി സര്ട്ടിഫിക്കറ്റുകള് പരിശോധിച്ചായിരിക്കണം ആന എഴുന്നള്ളിപ്പിന് അനുമതി നല്കേണ്ടത്.ജസ്റ്റിസ് എ കെ ജയശങ്കരൻ നമ്പ്യാർ, ജസ്റ്റിസ് എ ഗോപിനാഥ് എന്നിവർ അടങ്ങിയ ഡിവിഷൻ ബെഞ്ച് ആണ് ഇത് സംബന്ധിച്ച ഉത്തരവിറക്കിയത്.
