അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.മുംബൈ: കുപ്രസിദ്ധ അധോലോക നേതാവ് ലോറൻസ് ബിഷ്ണോയിയുടെ സഹോദരനും നിരവധി കേസുകളിൽ പ്രതിയുമായ അൻമോൽ ബിഷ്ണോയ് യുഎസിൽ പിടിയിലെന്ന് റിപ്പോർട്ട്. മുൻ മന്ത്രി ബാബാ സിദ്ദിഖിയെ വെടിവച്ചുകൊന്നത് അൻമോൽ ക്വട്ടേഷൻ നൽകിയവരാണെന്ന നിഗമനത്തിലാണ് പൊലീസ്. നടൻ സൽമാൻ ഖാന്റെ വീടിനു നേരെ വെടിവച്ചതിന്റെ ഉത്തരവാദിത്തവും ഏറ്റെടുത്തിരുന്നു.
നാഷണൽ ഇൻവെസ്റ്റിഗേഷൻ ഏജൻസി (എൻഐഎ) രജിസ്റ്റർ ചെയ്ത രണ്ട് കേസും മറ്റ് 18 ക്രിമിനൽ കേസുകളുമാണ് അൻമോലിനെതിരെയുള്ളത്. പഞ്ചാബി ഗായകൻ സിദ്ധു മൂസെവാലയുടെ കൊലപാതകം, ബോളിവുഡ് നടൻ സൽമാൻ ഖാന്റെ വീടിനു നേരെയുള്ള വെടിവെപ്പ് എന്നിവയും ഇതിൽപ്പെടും. കൊലപാതകം ഉൾപ്പെടെ ഒട്ടേറെ കേസുകളിൽ പിടികിട്ടാപ്പുള്ളിയായ അൻമോലിനെ കുറിച്ച് വിവരം നൽകുന്നവർക്ക് 10 ലക്ഷം രൂപ പ്രതിഫലം പൊലീസ് പ്രഖ്യാപിച്ചിരുന്നു.
ലോറൻസ് ബിഷ്ണോയിയുടെ അറസ്റ്റിനു പിന്നാലെ ഗുണ്ടാസംഘത്തെ നിയന്ത്രിച്ചിരുന്ന അൻമോൽ കഴിഞ്ഞ വർഷമാണ് രാജ്യം വിട്ടത്. വ്യാജ പാസ്പോർട്ട് ഉപയോഗിച്ച് കാനഡയിലേക്കാണ് അൻമോൽ കടന്നത്. അവിടെനിന്ന് യുഎസിലേക്ക് പോയതാകാമെന്നാണ് കരുതുന്നത്. അൻമോലിനെ യുഎസിൽനിന്ന് തിരികെയെത്തിക്കാനായി മുംബൈ പൊലീസിലെ ക്രൈംബ്രാഞ്ച് യൂണിറ്റ് നടപടികൾ ആരംഭിച്ചിരുന്നു. ഇതിനു പിന്നാലെയാണ് അൻമോൽ പിടിയിലായെന്ന റിപ്പോർട്ട് വരുന്നത്.
ബാബാ സിദ്ദീഖിയെ കൊലപ്പെടുത്തിയ ഷൂട്ടർമാരുമായി അൻമോൽ ആശയവിനിമയം നടത്തിയിരുന്നുവെന്നാണ് മുംബൈ പൊലീസ് പറയുന്നത്. ഏപ്രിലിൽ സൽമാൻ ഖാന്റെ വസതിക്കുനേരെ വെടിയുതിർത്തവർക്കും നിർദേശം നൽകിയത് അൻമോലാണെന്നാണ് പൊലീസിന്റെ കണ്ടെത്തൽ. ഇക്കഴിഞ്ഞ ജൂലൈയിൽ ഇയാൾക്കെതിരെ മുംബൈയിലെ പ്രത്യേക കോടതി ജാമ്യമില്ലാ വാറന്റ് പുറപ്പെടുവിച്ചിരുന്നു.
