അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.നന്തന്കോട് കൂട്ടക്കൊല കേസില് കൊലപാതകം നടത്തുന്നതിനു മുന്പ് കേഡല് ജിന്സണ് രാജ നിരവധി തവണ ഡമ്മിയില് ട്രയല് നടത്തിയിരുന്നതായി സൈബര് സെല് എസ്.ഐ പ്രശാന്ത്. കേസ് പരിഗണിക്കുന്ന ആറാം അഡീഷനല് സെഷന്സ് കോടതിയിലാണ് ഉദ്യോഗസ്ഥന്റെ മൊഴി. കൊല ചെയ്യുന്നതിനു ദിവസങ്ങള്ക്ക് മുന്പ് തന്നെ മാതാപിതാക്കളുടെ ഡമ്മി നിര്മിച്ച ശേഷം ട്രയല് നടത്തിയിരുന്നു. മാത്രമല്ല സമൂഹ മാധ്യമങ്ങളില് കയറി മഴു ഉപയോഗിച്ച് കഴുത്ത് മുറിക്കുന്നത് കണ്ട് പടിച്ചതായും കേഡലിന്റെ ലാപ്ടോപ്പ് പരിശോധിച്ചപ്പോള് കണ്ടെത്താന് കഴിഞ്ഞുവെന്ന് പ്രശാന്ത് മൊഴി നല്കി.
2017 ഏപ്രില് എട്ടിനാണ് കേഡല് ജിന്സണ് രാജയുടെ മാതാപിതാക്കളും സഹോദരിയും ബന്ധുവും അതിദാരുണമായി കൊല്ലപ്പെട്ടത്. ക്ലിഫ് ഹൗസിനു സമീപത്തുള്ള ബെയ്ന്സ് കോംപൗണ്ടിലെ 117ാം നമ്പര് വീട്ടിലാണ് പ്രഫ.രാജ തങ്കം, ഭാര്യ ഡോ.ജീന് പത്മ, മകള് കരോലിന്, ബന്ധു ലളിത എന്നിവരെ കൊല്ലപ്പെട്ട നിലയില് കണ്ടെത്തിയത്. സാക്ഷി വിസ്താരം നാളെയും തുടരും. ഇതുവരെ 21 സാക്ഷികളെ പ്രോസിക്യൂഷന് വിസ്തരിച്ചു
ഏഴ് വര്ഷങ്ങള്ക്ക് മുന്പ്, 2017 ഏപ്രില് 9നാണ് കേരളത്തെ നടുക്കിയ കൂട്ടക്കൊല സംസ്ഥാനതലസ്ഥാനത്ത് അരങ്ങേറിയത്. തലസ്ഥാന നഗരമധ്യത്തില്, മുഖ്യമന്ത്രിയുടെ ഔദ്യോഗിക വസതിക്ക് സമീപത്തെ വീടിന്റെ മുകള് നിലയില് ഇപ്പോഴുമുണ്ട് തീ പടര്ന്ന് പിടിച്ച അടയാളം. കൊലപാതകം നടന്ന വിവരം പുറംലോകം അറിഞ്ഞതും ഈ തീയിലൂടെയായിരുന്നു. അന്ന് വീട്ടില് നിന്ന് തീയും പുകയും ഉയരുന്നത് കണ്ടാണ് അയല്ക്കാര് ഫയര്ഫോഴ്സിനെ വിളിച്ചത്. അവരെത്തി നോക്കിയപ്പോളാണ് നാല് മൃതദേഹങ്ങള് കണ്ടത്.
കേഡലിന്റെ അച്ഛന്, അമ്മ, സഹോദരി, അകന്ന ബന്ധു എന്നിവരാണ് കൊല്ലപ്പെട്ടത്. ഓണ്ലൈനിലൂടെ വാങ്ങിയ മഴു ഉപയോഗിച്ച് നാല് പേരെയും വെട്ടിക്കൊന്നു. അതിന് ശേഷം അച്ഛന്റെയും അമ്മയുടെയും സഹോദരിടെയും മൃതദേഹം കത്തിച്ചു. മൊബൈലിലും കംപ്യൂട്ടറിലുമൊക്കെയായി മുഴുവന് സമയവും ചെലവഴിച്ചിരുന്ന കേഡല്, ശരീരത്തില് നിന്ന് ആത്മാവിനെ മോചിപ്പിക്കുന്ന ആസ്ട്രല് പ്രൊജക്ഷന് എന്ന വിചിത്ര പരീക്ഷണത്തിനാണ് ഈ അരുംകൊല ചെയ്തതെന്നാണ് പൊലീസിന്റെ കണ്ടെത്തല്.
കൊലപാതകത്തിന് നാലാം നാള് കേഡല് പിടിയിലായെങ്കിലും മാനസിക ആരോഗ്യപ്രശ്നം പറഞ്ഞാണ് വിചാരണ വര്ഷങ്ങളോളും വൈകിച്ചത്. എന്നാല് കോടതി രൂപീകരിച്ച മെഡിക്കല് ബോര്ഡ് ആരോഗ്യപ്രശ്നങ്ങളില്ലെന്നും വിചാരണക്ക് പ്രാപ്തനാണെന്നും കണ്ടെത്തി. അതോടെ കൊല നടന്ന് ഏഴ് വര്ഷങ്ങള്ക്കിപ്പുറും കോടതിയില് വിസ്താരം നടക്കുകയാണ്.
