അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മേപ്പാടി: നാടെങ്ങും ക്രിസ്മസ് ആഘോഷരാവിനായി ഒരുങ്ങുമ്പോൾ തന്റെ മൂന്നു കുരുന്നുകളുടെ ശവകുടീരത്തിൽ പുൽക്കൂട് ഒരുക്കി മാതാപിതാക്കൾ. ചൂരൽമല – മുണ്ടക്കൈ ഉരുൾപൊട്ടലിൽ ജീവൻ നഷ്ടമായ കുരുന്നുകളുടെ ശവകുടീരത്തിന് സമീപമാണ് മാതാപിതാക്കൾ പുൽക്കൂട് ഒരുക്കിയിരിക്കുന്നത്.
ഉരുൾപൊട്ടലിൽ ജീവൻ നഷ്ടമായ സഹോദരങ്ങളായ നിവേദ്, ധ്യാൻ, ഇഷാൻ എന്നിവരുടെ ശവകുടീരങ്ങളോട് ചേർന്നാണ് മാതാപിതാക്കളായ അനീഷും സയനയും പുൽക്കൂട് ഒരുക്കിയിരിക്കുന്നത്. ദമ്പതികളുടെ രണ്ടാമത്തെ മകനായ ധ്യാനിന്റെ ആഗ്രഹം നിറവേറ്റുകയായിരുന്നു ഇവർ. കഴിഞ്ഞ ക്രിസ്മസിന് വീട്ടിൽ നക്ഷത്രങ്ങളും ലൈറ്റുകളും എല്ലാം വെച്ച് പുൽക്കൂട് ഒരുക്കിയെങ്കിലും കത്തി പോയിരുന്നു. അന്ന് ധ്യാൻ അച്ഛനോട് പറഞ്ഞിരുന്നു അടുത്ത ക്രിസ്മസിനും പുൽക്കൂടും നക്ഷത്രങ്ങളും എല്ലാം ഒരുക്കണമെന്ന്. എന്നാൽ ഈ ക്രിസ്മസിന് അവരില്ലെങ്കിലും അവരുടെ ആഗ്രഹങ്ങൾ നിറവേറ്റുകയായിരുന്നു അനീഷും സയനയും.
ഉരുൾപൊട്ടൽ ദുരന്തം അനീഷിന്റെയും സയനയുടേയും മൂന്നു കുഞ്ഞുങ്ങളെയും കവർന്നു. അനീഷിന്റെ അമ്മ രാജമ്മയുടെ കൂടെയായിരുന്നു കുട്ടികൾ കിടന്നുറങ്ങിയത്. രാജമ്മയേയും ഉരുൾ കൊണ്ടുപോയി. അനീഷും സയനയും എല്ലാദിവസവും ശവകുടീരത്തിൽ പോകും. മൂന്നു കുട്ടികളുടേയും ചിത്രം പതിപ്പിച്ച ഫലകത്തിൽ മിഠായി കൊണ്ടുവയ്ക്കും. നാലാം ക്ലാസുകാരനായ നിവേദാണ് മൂത്തയാൾ. രണ്ടാമൻ ധ്യാൻ. മൂന്നമത്തെയാൾ ഇഷാന് മൂന്നര വയസ്സ് ആയെതയുള്ളു.
ദുരന്തം പാഞ്ഞെത്തിയ രാത്രിയിൽ അനീഷിന്റെ മൂന്നുമക്കളേയും അമ്മയേയും മരണം കൊണ്ടുപോയി. മരണത്തിന്റെ തലേന്ന് രാത്രിയും ഇളയ മകൻ ഇഷാനെ താലോലിച്ചുറക്കിയതാണ് സയന. ഇനിയുള്ളത് ആ ഓർമകൾ മാത്രമാണ്. എങ്കിലും കുട്ടികളുടെ ആഗ്രഹങ്ങളെയും സന്തോഷങ്ങളെയും കൂടെക്കൊണ്ടു നടക്കുകയാണ്. അതുകൊണ്ടാണ് മരിച്ചവരുടെ ഭൂമിയിലും പ്രത്യാശയുടെ പ്രതീകമായ പുൽക്കൂട് ഒരുക്കിയത്.
STORY HIGHLIGHT: parents set christmas crib near children tom
