അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.ഈ കാപ്പി കുടിക്കണമെങ്കിൽ നിങ്ങൾ വളരെയധികം വെള്ളം കുടിക്കേണ്ടി വരും. പറഞ്ഞുവരുന്നത് ലണ്ടനിലെ ഏറ്റവും വിലയേറിയ ‘ജപ്പാന് ടൈപ്പിക’ എന്ന കാപ്പിയെ കുറിച്ചാണ്. ഏകദേശം 31,000 രൂപയാണ് ഇതിന്റെ വില. ഇവിടെ പോയി ഒരു കപ്പ് കാപ്പി കുടിക്കുന്നതിന് കുടുബം പണയം വെയ്ക്കേണ്ടിവരും. അടുത്തിടെ ഗായകനും നടനുമായ ദില്ജിത്ത് ദോസാഞ്ജ് ഈ കാപ്പികുടിച്ചത് സോഷ്യൽ മീഡിയയിൽ പങ്കുവച്ചു. ഇതോടെ കാപ്പി വലിയ രീതിയിൽ വൈറൽ ആയി.
“ലണ്ടനിലെ വിലയേറിയ കാപ്പി കുടിക്കാന് എത്തിയിരിക്കുകയാണ് ഞാന്. ജപ്പാന് ടൈപ്പിക്ക കാപ്പി കുടിക്കാനാണ് ഞാന് എത്തിയിരിക്കുന്നത്. ഇത് വളരെ വിലയേറിയതാണ്, ഏകദേശം 31,000 ഇന്ത്യന് രൂപ വിലവരും.” ലണ്ടനിലെ ഷോട്ട് കഫേയുടെ മുന്നില് നിന്നുകൊണ്ടുള്ള ദില്ജിത് ദോസാഞ്ജിന്റെ വീഡിയോ നിരവധി ആരാധകരുടെ ശ്രദ്ധ കവര്ന്നിരുന്നു.
എന്താണ് ജപ്പാന് ടൈപ്പിക്ക കാപ്പിയുടെ പ്രത്യേകത
ഓരോ സിപ്പിനും 7,000 രൂപ വിലയുള്ള ദില്ജിത്ത് പരിചയപ്പെടുത്തിയ ഈ കാപ്പിക്ക് എന്താണിത്ര പ്രത്യേകത എന്നുനോക്കാം. ഗ്രേറ്റ് ബ്രിട്ടണിലെ ഏറ്റവും വിലയേറിയ കാപ്പിയാണിത്. ജപ്പാനിലെ ഒരു ദ്വീപായ ഒകിനാവയില് നിന്നുളള അതിശയിപ്പിക്കുന്ന മിശ്രിതമാണ് ഈ കാപ്പി. ജാപ്പനീസ് ടൈപ്പിക്ക ഇനത്തില്പ്പെട്ട ഈ കോഫി ബീന്സ് 2015 മുതല് ജപ്പാനിലെ ഒകിനാവ ദ്വീപില് ഉത്പാദിപ്പിക്കുന്നതാണ്. ഷോട്ട് കഫേയുടെ ഈ കാപ്പി ജാപ്പനീസ് പാരമ്പര്യത്തിന്റെ മൂല്യം വ്യക്തമാക്കുന്നതാണ്. ഒരു സ്വര്ണനിറമുള്ള കപ്പിലാണ് കാപ്പി നല്കുക.
മൂന്ന് തവണ യുകെ ബാരിസ്റ്റ ചാമ്പ്യനായ (വേള്ഡ് ബാരിസ്റ്റ ചാമ്പ്യന് എന്ന പദവിക്കായി വേള്ഡ് കോഫി ഇവന്റ്സ് നടത്തുന്ന ഒരു വാര്ഷിക ബാരിസ്റ്റ മത്സരമാണ് വേള്ഡ് ബാരിസ്റ്റ ചാമ്പ്യന്ഷിപ്പ് ) മാക്സ്വെല് കൊളോണ-ഡാഷ്വുഡ് ‘ദി ടെലഗ്രാഫ്’ നോട് കാപ്പിക്ക് എന്താണ് ഇത്ര വില എന്നതിനെ കുറിച്ച് സംസാരിക്കുന്നുണ്ട്. ജപ്പാനില് കൃഷി ചെയ്യുന്ന കാപ്പിയുടെ ദൗര്ലഭ്യം ആയിരിക്കണം അമിത വില ഈടാക്കുന്നതെന്നാണ് അദ്ദേഹത്തിന്റെ അഭിപ്രായം. ‘ജപ്പാനില് ആരും കാപ്പി വളര്ത്തുന്നില്ല. ഇത് സാധാരണയായി ഉഷ്ണമേഖലാ പ്രദേശങ്ങളില് വളരുന്നു. ജപ്പാന് പോലുള്ള സ്ഥലങ്ങളില് ഇത് വളരാന് ബുദ്ധിമുട്ടാണ്. അതുകൊണ്ടാണ് കാപ്പി ഇറക്കുമതി ചെയ്ത് ആളുകള്ക്ക് മുന്പില് വിളമ്പുമ്പോള് ഇത്ര പ്രത്യേകത നിറഞ്ഞതാകുന്നത്.’ മാക്സ്വെല് പറയുന്നു.
