അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഫ്രിജിൽ ഭക്ഷണം സൂക്ഷിക്കുമ്പോൾ ശുചിത്വവും ശരിയായ രീതിയും പാലിക്കുന്നത് അത്യാവശ്യമാണ്. ഭക്ഷ്യവിഷബാധ ഒഴിവാക്കാൻ ചില മുൻകരുതലുകൾ സ്വീകരിക്കേണ്ടതുണ്ട്. പഴവർഗ്ഗങ്ങളും ചില പച്ചക്കറികളും കഴുകിയാൽ അതിൽ അമിതമായ ഈർപ്പം നിലനിൽക്കും, ഇത് അണുക്കളുടെ വളർച്ച വർദ്ധിപ്പിക്കും. ഫ്രിജിൽ ഭക്ഷണം കുത്തിനിറയ്ക്കുന്നത് പെട്ടെന്ന് കേടാകാൻ കാരണമാകുന്നു.
ഭക്ഷ്യ വിഷബാധയ്‌ക്കെതിരെയുള്ള മുൻകരുതലുകളിൽ ഏറ്റവും പ്രധാനം ശുചിത്വമാണ്. അടുക്കളയും പരിസരവും എപ്പോഴും വൃത്തിയായി സൂക്ഷിക്കണം. ഭക്ഷണം ഉണ്ടാക്കുന്നവർ കൈകൾ സോപ്പുപയോഗിച്ച് വൃത്തിയായി കഴുകിയതിനു ശേഷം മാത്രമേ പാചകം ചെയ്യാവൂ. വൃത്തിയുള്ള പാത്രങ്ങളിൽ മാത്രം ഭക്ഷണം നൽകണം. പച്ചക്കറി, മീൻ, മുട്ട, ഇറച്ചി തുടങ്ങിയവ പാചകം ചെയ്യുമ്പോഴുള്ള അവശിഷ്ടങ്ങൾ അടുക്കളയിലോ പരിസരത്തോ കൂട്ടിയിടാതെ യഥാസമയം പുറത്തുകളയണം.
ഈച്ച ശല്യം ഒഴിവാക്കണം. ചീഞ്ഞ പച്ചക്കറികൾ, പഴകിയ മീൻ, മുട്ട, ഇറച്ചി എന്നിവ ഒരു കാരണവശാലും ഉപയോഗിക്കരുത്. പച്ചക്കറികൾ ഉപ്പും വിനാഗിരിയും ഇട്ട് നന്നായി കഴുകിയതിനു ശേഷം മാത്രമേ ഉപയോഗിക്കാവൂ. സാധാരണയായി 5 ഡിഗ്രി സെൽഷ്യസിനു താഴെ സൂക്ഷിക്കുന്ന ഭക്ഷണത്തിൽ ബാക്ടീരിയകളുടെ വളർച്ചയും പെരുകലും പൂർണമായും തടസ്സപ്പെടും. 70 ഡിഗ്രി സെൽഷ്യസിനു മുകളിലുള്ള ചൂടിൽ പാകം ചെയ്ത ഭക്ഷണത്തിൽ ബാക്ടീരിയകൾ നശിക്കുകയും അവ സുരക്ഷിതമായിരിക്കുകയും ചെയ്യും. ആഹാര സാധനങ്ങൾ ശീതികരിച്ചോ നന്നായി വേവിച്ചോ മാത്രം ഉപയോഗിക്കുക.
പഠിക്കണം ഫ്രിജ് ഉപയോഗം
പാകം ചെയ്തതും ചെയ്യാത്തതുമായ ഭക്ഷണങ്ങൾ ഒരുമിച്ച് സൂക്ഷിക്കരുത്. പാകം ചെയ്യാത്ത ഭക്ഷണങ്ങളിൽ ഉള്ള അണുക്കൾ പാകം ചെയ്ത ഭക്ഷണത്തിലേക്കു കലരാനുള്ള സാധ്യത ഇങ്ങനെ ഒഴിവാക്കാം. പാകം ചെയ്യാത്ത മത്സ്യം, മാംസം തുടങ്ങിയവ ഫ്രിജിൽ വയ്ക്കുമ്പോൾ മറ്റു ഭക്ഷണവുമായി സമ്പർക്കം വരാത്ത രീതിയിൽ അടച്ചു വേണം സൂക്ഷിക്കാൻ. പാകം ചെയ്ത എല്ലാ ആഹാരവും അടച്ചു മാത്രമേ സൂക്ഷിക്കാവു. മത്സ്യം, മാംസം, പച്ചക്കറികൾ, പാകം ചെയ്ത ആഹാരം എന്നിവ ഫ്രിജിന്റെ പ്രത്യേക സ്ഥലങ്ങളിൽ സൂക്ഷിക്കണം.
ഇതിനാൽ പാകം ചെയ്ത ഭക്ഷണത്തിൽ നിന്ന് അപ്പോൾ ഭക്ഷിക്കാൻ ആവശ്യമായത് മാറ്റി വയ്ക്കുകയും സൂക്ഷിച്ചു വയ്ക്കാൻ ഉദ്ദേശിക്കുന്ന അളവ് ഭക്ഷണം ചൂടാറിയ ഉടനെ (2 മണിക്കൂറിനുള്ളിൽ തന്നെ) ഫ്രിജിലേക്കു മാറ്റണം. രാവിലെ ഉണ്ടാക്കിയ ആഹാരം രാത്രി ഫ്രിജിലേക്കു മാറ്റുന്ന രീതി പാടില്ല. ഫ്രീസറിൽ ഉള്ള മാംസം, മത്സ്യം തുടങ്ങിയവ പാകം ചെയ്യാൻ ആയി പുറത്ത് എടുക്കുമ്പോൾ തണുപ്പ് പൂർണമായി മാറിയ ശേഷം മാത്രം പാകം ചെയ്യുക. മണിക്കൂറുകൾ ഇവ പുറത്ത് വച്ചാലും വേഗത്തിൽ ബാക്ടീരിയകൾ പെരുകുന്നതിനു കാരണമാകും. ഫ്രീസറിൽ നിന്നുള്ള ഭക്ഷണം ആദ്യം ഫ്രിജിന്റെ താഴെയുള്ള ഭാഗത്ത് നേരത്തെ ഇറക്കി വച്ച് തണുപ്പ് കുറഞ്ഞ ശേഷം പുറത്ത് എടുക്കുന്നതാണ് ഉചിതം.
