അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.തിരുവനന്തപുരം: സിപിഎം മുഖപത്രമായ ദേശാഭിമാനി എഡിറ്റോറിയല്‍ പേജില്‍ മന്നത്ത് പത്മനാഭനെപ്പറ്റി വന്ന ലേഖനത്തിനെതിരെ എന്‍എസ്എസ്. ‘അറിവിലൂന്നിയ പരിഷ്‌കര്‍ത്താവ്’ എന്ന തലക്കെട്ടില്‍ ഡോ. കെ.എസ്. രവികുമാര്‍ എഴുതിയ ലേഖനത്തിനെതിരെയാണ് എന്‍എസ്എസിന്റെ പ്രതിഷേധം. മന്നത്ത് പത്മനാഭനെ അന്നും ഇന്നും വർഗീയവാദിയെന്ന് വിശേഷിപ്പിച്ച പാർട്ടിയാണ് മന്നത്തിനെതിരായ പ്രചാരണത്തിന് പിന്നിലെന്ന് എൻഎസ്എസ് ജനറൽ സെക്രട്ടറി ജി.സുകുമാരൻ നായർ പറഞ്ഞു. മന്നം സമാധി യോഗത്തിൽ സംസാരിക്കുമ്പോഴാണ് അദ്ദേഹത്തിൻ്റെ പ്രതികരണം.
മന്നത്തു പത്മനാഭന്റെ പ്രവര്‍ത്തനങ്ങളെപ്പറ്റി പരാമര്‍ശിക്കുന്ന ലേഖനത്തില്‍ ‘പില്‍ക്കാലത്ത് അദ്ദേഹം സ്വീകരിച്ച ചില രാഷ്‌ട്രീയനിലപാടുകളും വിമോചനസമരത്തിലെ നേതൃത്വവും അദ്ദേഹത്തിന്റെ നവോത്ഥാന നായകന്‍ എന്ന വ്യക്തിത്വത്തില്‍ നിഴല്‍വീഴ്‌ത്തുന്നവയായിരുന്നു’ എന്നുള്ള പരാമര്‍ശം സത്യത്തിന് നിരക്കുന്നതല്ലെന്നും എന്‍എസ്എസ് ജനറല്‍ സെക്രട്ടറി ചൂണ്ടിക്കാട്ടി.
ഇത് ചില രാഷ്‌ട്രീയക്കാരുടെ അഭിപ്രായം മാത്രമായിട്ടേ കാണുന്നുള്ളു. മന്നത്ത് പത്മനാഭന്‍ വിമോചനസമരത്തില്‍ പങ്കെടുത്തത് ആ കാലഘട്ടത്തിന്റെ ആവശ്യമായിരുന്നു. നാട്ടില്‍ സാമൂഹിക അസമത്വങ്ങള്‍ ഇല്ലാതാക്കാനാണ് അദ്ദേഹം അങ്ങനെ ചെയ്തത്. അന്ന് ഭരണം നടത്തിയ രാഷ്‌ട്രീയക്കാരുടെ അഭിപ്രായമാണ് ഇപ്പോഴും ഇത്തരം ലേഖനങ്ങളിലൂടെ കാണാന്‍ കഴിയുന്നത്. എന്നാല്‍ സാധാരണക്കാരായ ജനങ്ങളുടെ അഭിപ്രായമല്ല ഇതെന്ന് ബന്ധപ്പെട്ടവര്‍ മനസിലാക്കണമെന്നും ജി. സുകുമാരന്‍ നായര്‍ വ്യക്തമാക്കി.
ദുഷ്പ്രചാരണങ്ങളാൽ നായർ സമുദായവും എൻ.എസ്.എസും തളരില്ല. ഏതറ്റം വരെ പോകാനും മടിയില്ല. വോട്ട് ബാങ്കിൻ്റെ പേരിൽ സവർണ -അവർണ ചേരിതിരിവുണ്ടാക്കാനാണ് ചിലരുടെ ശ്രമമെന്നും മന്നത്ത് പത്മനാഭൻ ജീവിച്ചിരുന്നതിനാൽ നായർ സമുദായം രക്ഷപ്പെട്ടെന്നും ജി.സുകുമാരൻ നായർ പറഞ്ഞു.
