അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മനുഷ്യശരീരത്തിലെ ഏറ്റവും പ്രധാനപ്പെട്ട ആന്തരിക അവയവങ്ങളിലൊന്നാണ് കരള്‍. കരളിനെ ബാധിക്കുന്നതും ഇന്ന് ആളുകളിൽ കണ്ട് വരുന്നതുമായ ഒരു സാധാരണ രോഗമാണ് ഫാറ്റി ലിവർ. കരളിനെ ബാധിക്കുന്ന നിശബ്ദ ശത്രു എന്ന് തന്നെ ഈ രോഗത്തെ വിശേഷിപ്പിക്കാനാവും. രക്തത്തിലെ വിഷവസ്തുക്കളെ അരിച്ചെടുക്കുന്ന സംരക്ഷകന്‍ എന്നറിയപ്പെടുന്ന കരളിന് 1.2 മുതല്‍ 1.5 കിലോഗ്രാം വരെയാണ് ഭാരം. കരളിന്റെ ഭാരത്തിനേക്കാൾ അഞ്ച് മുതൽ പത്ത് ശതമാനം വരെ അധികം കൊഴുപ്പിന്റെ സാന്നിധ്യമുണ്ടാകുന്ന അവസ്ഥയാണ് ഫാറ്റി ലിവർ.
ഭക്ഷണത്തിലെ കാർബോഹൈഡ്രേറ്റിന്റെയും കൊഴുപ്പിന്റെയും അമിതസാന്നിധ്യമാണ് കരളില്‍ കൊഴുപ്പ് അടിഞ്ഞുകൂടാന്‍ കാരണമാകുന്നതിന്‍റെ പ്രധാന കാരണം. സ്വയം സുഖപ്പെടുത്താനും സ്വന്തം ശക്തിയെ പുനര്‍ജനിപ്പിക്കാനുമുള്ള ശേഷി കരളിനുള്ളതിനാൽ ഒട്ടുമിക്ക കരള്‍ രോഗങ്ങളും ഏറെ വൈകിയാണ് കണ്ടുപിടിക്കുന്നത്. നിരവധി ശാരീരിക പ്രവർത്തനങ്ങളെ സഹായിക്കുന്നു എന്നതിനാൽ കരളിനെ ആരോഗ്യത്തോടെ നിലനിർത്തുക എന്നത് വളരെ പ്രധാനമാണ്. സാധാരണ ഗതിയിൽ ഫാറ്റി ലിവർ രണ്ട് താരമാണ്. ഒന്ന് ആൽക്കഹോളിക് ഫാറ്റി ലിവർ. മറ്റൊന്ന് നോൺ- ആൽക്കഹോളിക് ഫാറ്റി ലിവറും.
ആൽക്കഹോളിക് ഫാറ്റി ലിവർ
അമിത മദ്യപാനം മൂലം കരളിൽ രൂപപ്പെടുന്ന അവസ്ഥയാണ് ഈ ആൽക്കഹോളിക് ഫാറ്റി ലിവർ. അമിതമായി മദ്യപാനം ശീലമാക്കുന്നവരിൽ ഈ രോഗം വരാനുള്ള സാധ്യത വളരെ കൂടുതലാണ്.
നോൺ- ആൽക്കഹോളിക് ഫാറ്റി ലിവർ
മദ്യപാനം മൂലമല്ലാതെ വരുന്ന ഫാറ്റി ലിവറാണ് ഈ നോൺ- ആൽക്കഹോളിക് ഫാറ്റി ലിവർ. ജീവിതശൈലിയിലെ പ്രശ്‌നങ്ങള്‍, പ്രമേഹം, അമിതവണ്ണം, കൊളസ്ട്രോൾ എന്നിവയൊക്കെ ഉള്ളവരിലാണ് ഈ അവസ്ഥ കൂടുതലായി കണ്ടുവരുന്നത്.
ഈ രണ്ട് അവസ്ഥകളും കരളിന് ഗുരുതരമായ ദോഷം ചെയ്യും. കരൾ രോഗം ആർക്കും ഉണ്ടാകാം. ഫാറ്റി ലിവർ രോഗം പോലുള്ള വിട്ടുമാറാത്ത രോഗങ്ങളെ അകറ്റി നിർത്താൻ ചിട്ടയായ വ്യായാമവും കൃത്യമായ ജീവിത ശൈലിയും നിർബന്ധമാണ്.
ലക്ഷണങ്ങൾ
- മതിയായ വിശ്രമത്തിന് ശേഷവും അമിതമായി ക്ഷീണം അനുഭവപ്പെടുക.
- അടിവയറ്റിൽ കൊഴുപ്പ് രൂപപ്പെടുന്നത്.
- കഴുത്തിലും കക്ഷത്തിലും കറുപ്പ് കാണപ്പെടുന്നത്.
- ഭാരം കൂടുന്നത്.
- കാലുകളിലെ നീര്.
- ചർമ്മത്തിൽ വളരെ പെട്ടന്ന് മുറിവുകൾ ഉണ്ടാകുന്നത്.
ഫാറ്റി ലിവർ രോഗം ആർക്കൊക്കെ വരാം?
കരൾ രോഗം ആർക്കും ഉണ്ടാകാം. വ്യക്തികളെ അനുസരിച്ച് തീവ്രതയ്ക്ക് വ്യത്യാസം ഉണ്ടാക്കും. എങ്കിലും ചുരുങ്ങിയ കാലത്തിൽ വളരെയധികം മദ്യപിക്കുന്നവർ, അമിത വണ്ണം ഉള്ളവർ, മോശം ജീവിതശൈലി പിന്തുടരുന്നവർ, കൊഴുപ്പ് കൂടുതൽ അടങ്ങിയ ആഹാരശീലം പതിവായി പിന്തുടരുന്നവർ, സ്റ്റിറോയിഡുകൾ ചില പ്രത്യേക മരുന്നുകൾ കഴിക്കുന്നവർ, ഉയർന്ന രക്തസമ്മർദ്ദം ഉള്ളവർ, ഉയർന്ന കൊളസ്ട്രോൾ, ട്രൈഗ്ലിസറൈഡ് എന്നിവ ഉള്ളവർ എന്നിവരിലൊക്കെ ഫാറ്റി ലിവർ ഡിസീസ് ഉണ്ടാകാനുള്ള സാധ്യത വളരെയധികമാണ്.
എങ്ങനെ പ്രതിരോധിക്കാം?
- പൂർണ്ണമായും മദ്യപാനം ഉപേക്ഷിക്കുക .
- മധുരമുള്ള ഭക്ഷണങ്ങള്‍ പരമാവധി ഒഴിവാക്കുക.
- കൊഴുപ്പടങ്ങിയ ആഹാരങ്ങളും കാര്‍ബണേറ്റ് അടങ്ങിയ പാനീയങ്ങളും ഒഴിവാക്കുക.
- ചിട്ടയായ വ്യായാമം ശീലമാക്കുക .
- പഴങ്ങൾ പച്ചക്കറികൾ, ധാന്യങ്ങൾ, ആരോഗ്യകരമായ കൊഴുപ്പടങ്ങിയ ഭക്ഷണങ്ങൾ എന്നിവ ആഹാരത്തിലുൾപ്പെടുത്തുക.
സാധാരണ അള്‍ട്രാസൗണ്ട് സ്കാനിങ്ങിലൂടെയാണ് ഫാറ്റി ലിവർ കണ്ടെത്തുന്നത്. കൂടാതെ ലിവര്‍ ഫങ്ഷന്‍ ടെസ്റ്റ് മുഖേനയും തീവ്രത മനസ്സിലാക്കാനാകും. ലിവര്‍ ഫങ്ഷന്‍ ടെസ്റ്റില്‍ ലിവര്‍ എന്‍സൈമുകളുടെ അളവുകള്‍ സാധാരണത്തേക്കാള്‍ കൂടുതല്‍ കാണുന്നത് കരള്‍ തകരാറിന്റെ ലക്ഷണമാണ്.
STORY HIGHLIGHT: fatty liver causes symptoms
