ഇന്ത്യയ്ക്ക് പുറത്ത് ഇപ്പോഴും രാജാവ്: വിജയ് മല്ല്യയ്ക്ക് ഇനി തിരിച്ച് വരവ് സാധ്യമോ??

ഒരു കാലത്ത് ഏറെ ആഘോഷിക്കപ്പെട്ട പേരായിരുന്നു വിജയ് മല്ല്യ… എന്നാൽ പിന്നീട് കടക്കെണിയിൽ നാട് വിടേണ്ടി വന്ന തട്ടിപ്പ് വീരനായി … ഇപ്പോഴിതാ തിരിച്ച് വരാൻ താൽപ്പര്യം പ്രകടിപ്പിച്ചിരിക്കുകയാണ് പഴയ ബിസിനസ് ടൈക്കുൺ…
ഒരുകാലത്ത് ഇന്ത്യയിലെ ഏറ്റവും വലിയ ധനികരില്‍ ഒരാളായിരുന്നു അദ്ദേഹം. കിംഗ്്ഫിഷര്‍ എന്ന ഒരൊറ്റ ബ്രാന്‍ഡ് കൊണ്ട് ആഗോള ശ്രദ്ധനേടിയ വ്യവസായി എന്നു പറയാം. പക്ഷെമല്യയുടെ വീഴ്ചകള്‍ ചെറുതായിരുന്നില്ല. അറസ്റ്റ് ഭയന്ന് അദ്ദേഹം രാജ്യം വിട്ടതോടെ വായ്പകള്‍ നല്‍കിയിരുന്നവര്‍ നിയമപരമായി ആസ്തി കണ്ടുകെട്ടലിലേയ്ക്ക് കടന്നു. ബാങ്കുകള്‍ അദ്ദേഹത്തിന്റെ നിരവധി സ്വത്തുക്കള്‍ വിറ്റു. ഇതു അദ്ദേഹത്തിന്റെ വ്യക്തിഗത ആസ്തിയില്‍ വന്‍ ഇടിവിന് കാരണമായി. ആസ്തി വില്‍പ്പനയിലൂടെ ബാങ്കുകള്‍ ഏകദേശം 14,000 കോടി രൂപ തിരിച്ചുപിടിച്ചെന്നാണ് റിപ്പോര്‍ട്ടുകള്‍ വ്യക്തമാക്കുന്നു.
അടുത്തിടെ അദ്ദേഹം ഇന്ത്യയിലേയ്ക്കു തിരിച്ചുവരാനുള്ള ആഗ്രഹം വ്യക്തമാക്കിയിരിക്കുന്നു. യൂട്യൂബര്‍ രാജ് ഷമാനിയുമായുള്ള അഭിമുഖത്തിലാണ് അദ്ദേഹം മനസുതുറന്നത്. 20 ല്‍ അധികം രാജ്യത്ത് ആസ്തിയുണ്ടെന്ന കിംവദന്തിയും അദ്ദേഹം നിഷേധിച്ചു. അതേസമയം കുറച്ചു രാജ്യങ്ങളില്‍ സ്വത്തുണ്ടെന്ന് അദ്ദേഹം സമ്മതിക്കുകയും ചെയ്യുന്നു. ഇംഗ്ലണ്ട്, ഫ്രാന്‍സ്, അമേരിക്ക എന്നീ പേരുകള്‍ അദ്ദേഹം വെളിപ്പെടുത്തി. ഇതോടെ അദ്ദേഹത്തിന്റെ ആസ്തി വീണ്ടും ചര്‍ച്ചയായി.

ദക്ഷിണാഫ്രിക്കയില്‍ കിംഗ്ഫിഷര്‍ മദ്യവ്യാപാരം നടത്തിയിരുന്ന കാലത്ത് വാങ്ങിയ ആഡംബര വീട് വിറ്റതായും മല്യ വെളിപ്പെടുത്തി. ബിസിനസ് തകര്‍ച്ച തന്നെയാണ് ഇതിനും കാരണമെന്ന് അദ്ദേഹം വ്യക്തമാക്കി. നിലവില്‍ യുകെയിലാണ് മല്യ താമസിക്കുന്നത്. ഫ്രാന്‍സില്‍ ഒരു വീട് വാങ്ങിയതായും, അത് തന്റെ ഹോള്‍ഡിംഗ് കമ്പനിയായ ഗിസ്‌മോ വഴി വാങ്ങിയതാണെന്നും അദ്ദേഹം പറഞ്ഞു.ഫോബ്സ് പ്രകാരം 2013 ല്‍ വിജയ് മല്യയുടെ ആസ്തി ഏകദേശം 750 മില്യണ്‍ ഡോളറായിരുന്നു. എന്നാല്‍ 2022 ജൂലൈയിലെ ഇന്‍ഡിപെന്‍ഡന്റ് യുകെയുടെ റിപ്പോര്‍ട്ട് പ്രകാരം അദ്ദേഹത്തിന്റെ ആസ്തി 1.2 ബില്യണ്‍ ഡോളറാണ്. ഇന്ത്യന്‍ ആസ്തികള്‍ നഷ്ടപ്പെട്ടതാണ് ഈ അഭൂതപൂര്‍വ്വമായി ഇടിവിനു കാരണം. ബാങ്കുകള്‍ ഇതുവരെ 14,000 കോടി രൂപ വിജയ് മല്യയില്‍ നിന്ന് തിരിച്ചുപിടിച്ചിട്ടുണ്ട്.

മുകളില്‍ പറഞ്ഞ കണക്കുകള്‍ ഔദ്യോഗികമായി കാണാം. അതേസമയം അദ്ദേഹത്തിന് ഇപ്പോഴും 4,000 കോടി രൂപയുടെ ആസ്തി ഉണ്ടെന്നാണ് ചില അനൗദ്യോഗിക കണക്കുകള്‍ സൂചിപ്പിക്കുന്നത്. ആഗോള റിയല്‍ എസ്‌റ്റേറ്റ് ആസ്തികള്‍, കോര്‍പ്പറേറ്റ് ഹോള്‍ഡിംഗുകള്‍ എന്നിവയുള്‍പ്പെടെയാണിത്. 2021 ല്‍ മുംബൈയിലെ വൈല്‍ പാര്‍ലെയിലുള്ള മല്യയുടെ കിംഗ്ഫിഷര്‍ ഹൗസ് 52.55 കോടി രൂപയ്ക്ക് ലേലം ചെയ്തിരുന്നു. ഗോവയിലെ അദ്ദേഹത്തിന്റെ ആഡംബര വില്ല 73 കോടി രൂപയ്ക്കാണ് വിറ്റത്. 2025 ഐപിഎല്‍ ജേതാക്കളായ റോയല്‍ ചലഞ്ചേഴ്‌സ് ബാംഗ്ലൂരിന്റെ (ആർസിബി) ഉടമയും മല്യ ആയിരുന്നു.

നിലവിലെ ആസ്തികള്‍ (വിലയിരുത്തപ്പെടുന്നത്)

യുണൈറ്റഡ് കിംഗ്ഡം: ലണ്ടനിലെ കോണ്‍വാള്‍ ടെറസ് (രണ്ട് ചരിത്രപ്രധാനമായ മാളികകള്‍), ഹെര്‍ട്ട്‌ഫോര്‍ഡ്ഷയറിലെ ലേഡിവാക്ക് മാന്‍ഷന്‍.
ഇന്ത്യ: മുംബൈയിലെ നിലാദ്രി ബംഗ്ലാവ് (നേപ്പിയന്‍ സീ റോഡ്), ബംഗളൂരുവിലെ കിംഗ്ഫിഷര്‍ ടവേഴ്സ് പെന്റ്ഹൗസ്.
യുണൈറ്റഡ് സ്റ്റേറ്റ്‌സ്: ന്യൂയോര്‍ക്കിലെ ട്രംപ് പ്ലാസയില്‍ ഒരു പെന്റ്ഹൗസും, മൂന്ന് ആഡംബര കോണ്ടോകളും (ചിലത് അദ്ദേഹത്തിന്റെ മകളോടൊപ്പം സ്വന്തമാക്കിയിരിക്കുന്നു).
ഫ്രാന്‍സ്: കാന്‍സിനടുത്തുള്ള സെന്റ്-മാര്‍ഗറൈറ്റ് ദ്വീപിലെ ലെ ഗ്രാന്‍ഡെ ജാര്‍ഡിന്‍ എസ്റ്റേറ്റ്.