അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പഹല്‍ഗാം ഭീകരാക്രമണത്തിന്റെയും തുടര്‍ന്നുണ്ടായ ഇന്ത്യാ-പാക് സംഘര്‍ഷത്തിന്റെയും പശ്ചാത്തലത്തില്‍ ജനറല്‍ സെക്രട്ടറി എം എ ബേബിയുടെ നേതൃത്വത്തില്‍ സിപിഎം പ്രതിനിധി സംഘം കാശ്മീര്‍ സന്ദര്‍ശനം ആരംഭിച്ചു. പൊളിറ്റ്ബ്യൂറോ അംഗം അമ്രാ റാം, ലോക്‌സഭാ നേതാവ് കെ. രാധാകൃഷ്ണന്‍, രാജ്യസഭാ നേതാവ് ജോണ്‍ ബ്രിട്ടാസ്, എംപിമാരായ ബികാഷ് രഞ്ജന്‍ ഭട്ടാചാര്യ, സൂ വെങ്കടേശന്‍, എ എ റഹീം എന്നിവരാണ് പ്രതിനിധി സംഘത്തിലെ മറ്റംഗങ്ങള്‍.
പഹല്‍ഗാം ഭീകരാക്രമണത്തെ തുടര്‍ന്ന് മെയ് 10, 11 തീയതികളില്‍ കശ്മീരിലേക്ക് പ്രതിനിധി സംഘത്തെ അയക്കാന്‍ സിപിഐഎം തീരുമാനിച്ചിരുന്നു. എന്നാല്‍ ഇന്ത്യാ- പാക് ഏറ്റുമുട്ടല്‍ രൂക്ഷമായതിനെ തുടര്‍ന്ന് സന്ദര്‍ശനം മാറ്റിവെയ്ക്കുയായിരുന്നു. ശ്രീനഗറില്‍ വിവിധ രാഷ്ട്രീയപാര്‍ടി നേതാക്കളുമായും പൗരപ്രമുഖരുമായും പ്രതിനിധി സംഘം കൂടിക്കാഴ്ച നടത്തും. ശ്രീനഗറിലെ ടാഗോര്‍ഹാളില്‍ ബുധനാഴ്ച സിപിഐഎം നേതാക്കള്‍ പങ്കെടുത്തുള്ള പൊതുയോഗവും ചേരുന്നുണ്ട്.
അതിനിടയില്‍, കാശ്മീര്‍ സന്ദര്‍ശനവുമായി ബന്ധപ്പെട്ട് രസകരമായ ഒരു എഫ്ബി പോസ്റ്റ് എ.എ. റഹീം എംപി പങ്കുവെച്ചു. കാശ്മീരില്‍ എത്തിയ സിപിഎം സംഘം മുസാഫിറിനെ കണ്ടുമുട്ടിയ വിവരമാണ് സോഷ്യല്‍ മീഡിയയില്‍ പോസ്റ്റ് ചെയ്തിരിക്കുന്നത്.
എഫ്ബി പോസ്റ്റ് കാണാം;
‘കശ്മീരില്‍ എനിക്ക് രണ്ടു സഹോദരങ്ങളെ കിട്ടി,മുസാഫിറും സമീറും!.അല്ലാഹു അവരെ രക്ഷിക്കട്ടെ’പഹല്‍ഗാമില്‍ ഭീകരരുടെ വെടിയേറ്റ് മരിച്ച ശ്രീ രാമചന്ദ്രന്റെ മകള്‍ ആരതിയുടെ ഹൃദയസ്പര്‍ശിയായ ഈ വാക്കുകള്‍ നമ്മള്‍ മറന്നിട്ടില്ല.ആരതി പറഞ്ഞ മുസാഫിറിനൊപ്പം ഇന്ന് കശ്മീരില്‍ നിന്നും പകര്‍ത്തിയ ചിത്രമാണിത്.
സഖാവ് എം എ ബേബിയുടെ നേതൃത്വത്തിലുള്ള സി പി ഐ (എം)പ്രതിനിധി സംഘത്തിന്റെ ഭാഗമായി ഇന്ന് മുതല്‍ രണ്ട് ദിവസം ഞാനുള്‍പ്പെടെ കശ്മീരിലാണ്. ശ്രീനഗര്‍ വിമാനത്താവളത്തിന് പുറത്ത് മുസാഫിര്‍ എന്ന നന്മ നിറഞ്ഞ മനുഷ്യനെ ഞങ്ങള്‍ കണ്ടുമുട്ടി.ഞങ്ങളുടെ വാഹനവ്യൂഹത്തിലെ ഒരു വാഹനം മുസാഫിറിന്റെതാണ്. യഥാര്‍ഥത്തില്‍ മുസാഫിറിനെയും സമീറിനെയും പോലുള്ള അനേകം കാശ്മീരി സഹോദരങ്ങള്‍ക്ക് മുന്നിലാണ് തീവ്രവാദം തോറ്റമ്പി പോകുന്നത്. മതം നോക്കി നിരപരാധികളുടെ നേരെ നിറയൊഴിക്കുന്ന മതതീവ്രവാദത്തിന് മുന്നില്‍ മുട്ടുമടക്കാത്ത മനുഷ്യര്‍. ആരതിയെ ചേര്‍ത്തു പിടിച്ച ‘അവളുടെ സഹോദരനൊപ്പം ‘.
