അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.എന്നും ഇന്ത്യ ക്രൂഡ് ഓയിലിന് മറ്റ് രാജ്യങ്ങളെയാണ് ആശ്രയിക്കുന്നത്. എന്നാലിപ്പോൾ രാജ്യത്ത് ക്രൂഡ് ഓയിലിന്റെ വലിയ ശേഖരമാണ് കണ്ടെത്തിയിരിക്കുന്നത്. ഇത് രാജ്യത്തെ സമ്പത്ത് വ്യവസ്ഥയെ തന്നെ മാറ്റി മറിച്ചേക്കും. റിസർവ് യാഥാർത്ഥ്യമാകുന്നതോടെ രാജ്യത്തിന്റെ സമ്പദ് വ്യവസ്ഥ 3.7 ട്രില്യൺ ഡോളറിൽ നിന്ന് 20 ട്രില്യൺ ഡോളറിലേക്ക് കുതിച്ചു ചാട്ടം ന‍ടത്തും. കേന്ദ്ര മന്ത്രി ഹർദീപ് സിങ് പുരിയാണ് ഈ വിവരം വെളിപ്പെടുത്തിയത്.
ക്രൂഡ് ഓയിൽ ഇറക്കുമതിയെ വലിയ തോതിൽ ആശ്രയിക്കേണ്ടി വരുന്നത് ഇന്ത്യയെ സംബന്ധിച്ച് ഒരു തലവേദനയാണ്. രാജ്യാന്തര ക്രൂഡ് ഓയിൽ വിലയിലെ കയറ്റിറക്കങ്ങൾ ഇവിടത്തെ പണപ്പെരുപ്പ നിരക്കുകളെപ്പോലും നേരിട്ട് സ്വാധീനിക്കാൻ ശേഷിയുള്ളവയാണ്. ഉദാഹരണത്തിന് നിലവിൽ ഇസ്രായേൽ-ഇറാൻ സംഘർഷം നടക്കുകയാണ്. ഇറാൻ ഹോർമുസ് കടലിടുക്ക് ബ്ലോക്ക് ചെയ്താൽ മധ്യപൂർവ ദേശത്ത് നിന്ന് ഇന്ത്യയിലേക്കുള്ള ക്രൂഡ് സപ്ലൈ തടസ്സപ്പെടും.
റഷ്യയിൽ നിന്ന് ഇന്ത്യയ്ക്ക് ഡിസ്കൗണ്ട് നിരക്കിൽ ഇന്ധനം ലഭിക്കുന്നുണ്ടെങ്കിലും പഴയതു പോലെ ഡിസ്കൗണ്ട് ഇപ്പോൾ ലഭ്യമല്ല. എത്ര കാലം ഇത്തരത്തിൽ റഷ്യൻ ഇന്ധനത്തെ കൂടുതലായി ആശ്രയിക്കാൻ സാധിക്കും എന്നതിലൊന്നും വ്യക്തതയില്ല.രാജ്യത്തെ ഇലക്ട്രിക് വാഹന മേഖല പതുക്കെ വളർച്ച നേടുന്നതേയുള്ളൂ. ഇന്ത്യ പോലൊരു മഹാരാജ്യത്ത് ക്രൂഡ് ഓയിൽ വിവിധ വ്യവസായങ്ങളിലും നിർണായകമാണ്. ഇത്തരമൊരു സാഹചര്യത്തിൽ ക്രൂഡിന്റെ ഭീമമായ ശേഖരം കണ്ടെത്തിയത് ഇന്ത്യയെ സംബന്ധിച്ച് അക്ഷരാർത്ഥത്തിൽ ‘ബമ്പറാണ്’.
അടുത്തിടെ ഗയാനയിൽ 11.6 ബില്യൺ ഡോളറിന്റെ ഓയിൽ ശേഖരം കണ്ടെത്തിയതിന് സമാനമാണ് ഇപ്പോൾ ഇന്ത്യയുടെ ആൻഡമാനിലെ ഡിസ്കവറി. ഓയിൽ ഖനനം വലിയ ചിലവേറിയ പ്രക്രിയയാണ്. ഗയാനയിൽ 43-44 ഓയിൽ സൈറ്റുകളിൽ ഖനനം നടന്നതിൽ 41ാം ഡ്രില്ലിങ്ങിലാണ് വൻ ശേഖരം കണ്ടെത്തിയത്. ഓരോ ഡ്രില്ലിങ്ങിനും 100 മില്യൺ ഡോളറാണ് ചിലവായത്. സമാനമായി ആൻഡമാനിലും നിരവധി ഖനനങ്ങൾ നടത്തേണ്ടതായി വന്നേക്കാം. അതേ സമയം ആൻഡമാനിലെ ക്രൂഡ് എക്സ്പ്ലൊറേഷനുമായി ബന്ധപ്പെട്ട് നിക്ഷേപങ്ങൾ ഒഴുകിയെത്താനും സാധ്യതകളുണ്ട്.
നിലവിൽ ആഭ്യന്തര ആവശ്യത്തിനുള്ള ക്രൂഡ് ഓയിലിന്റെ 80 ശതമാനവും ഇന്ത്യ ഇറക്കുതി നടത്തുകയാണ് ചെയ്യുന്നത്. ആൻഡമാനിലെ ക്രൂഡ് ഓയിൽ ഖനനം വിജയകരമാവുകയാണെങ്കിൽ ഇവിടേക്കുള്ള ക്രൂഡ് ഓയിൽ ഇറക്കുമതിയിൽ വൻ തോതിൽ കുറവ് വരുത്താൻ സാധിക്കും. ക്രൂഡ് വിപണിയിലെ വിലപേശലുകളെ അതിജീവിക്കാനും ഇന്ത്യയ്ക്ക് സാധിക്കും
പുതിയ ക്രൂഡ് ശേഖരം യാഥാർത്ഥ്യമാകുന്നതോടെ ഇന്ത്യയിലെ പൊതുമേഖലാ-സ്വകാര്യ എണ്ണക്കമ്പനികളുടെ ലാഭമാർജിനും ഉയരും. ഇപ്പോൾത്തന്നെ 37 വർഷത്തെ ഉയർന്ന തോതിലുള്ള ഖനനമാണ് ഓയിൽ & നാച്ചുറൽ ഗ്യാസ് കോർപ്പറേഷൻ ഓഫ് ഇന്ത്യ (ONGC) നടത്തിയത്. 2024 സാമ്പത്തിക വർഷത്തിൽ 541 എണ്ണക്കിണറുകളിൽ ഡ്രില്ലിങ് നടത്തി. 103 സൈറ്റുകൾ യാഥാർത്ഥ്യമാക്കി. 438 സൈറ്റുകളിൽ ഡ്രില്ലിങ് പുരോഗമിക്കുന്നു. ഇതിനായി 37,000 കോടി രൂപയാണ് ചിലവഴിക്കുന്നത്. ഇത് ഇന്ത്യയുടെ ചരിത്രത്തിലെ തന്നെ ഉയർന്ന തുകയാണ്.
സ്വകാര്യ മേഖലയിൽ റിലയൻസിന്റെ പെട്രോകെമിക്കൽ ബിസിനസിനെ 2027 വർഷത്തോടെ ലാഭകരമാക്കാനാണ് മുകേഷ് അംബാനി ലക്ഷ്യമിടുന്നത്. ആൻഡമാനിലെ നിധികുംഭം റിലയൻസ് അടക്കമുള്ള സ്വകാര്യ കമ്പനികൾക്കും ലോട്ടറിയാകുമെന്നാണ് വിലയിരുത്തപ്പെടുന്നത്.
