അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അച്ചപ്പം ഇഷ്ടമാണോ? എളുപ്പത്തിൽ അച്ചപ്പം തയ്യാറാക്കാൻ ഇനി ഇങ്ങനെ ചെയ്തോളൂ… രുചികരമായി വീട്ടിൽ തന്നെ തയ്യാറാക്കാം.
ആവശ്യമായ ചേരുവകൾ
- പച്ചരി -3 ഗ്ലാസ്‌
- തേങ്ങാ പാൽ -1/2 ലിറ്റർ
- പഞ്ചസാര -5 സ്പൂൺ
- നെയ്യ് -3 സ്പൂൺ
- എള്ള് -3 സ്പൂൺ
- എണ്ണ -1/2 ലിറ്റർ
തയ്യാറാക്കുന്ന വിധം
പച്ചരി വെള്ളത്തിൽ കുതിര്‍ക്കാന്‍ ഇട്ടതിനുശേഷം അത് നല്ലതുപോലെ കുതിർന്നു കഴിയുമ്പോൾ ആ വെള്ളം മുഴുവനായും കളഞ്ഞ് പച്ചരി മിക്സിയുടെ ജാറിലേക്ക് ഇട്ടുകൊടുക്കുക. എന്നിട്ട് അതിലേക്ക് തേങ്ങാപ്പാലും ആവശ്യത്തിനു പഞ്ചസാരയും ചേർത്ത് നല്ലതുപോലെ ഒന്ന് അരച്ചെടുക്കണം. അരച്ച മാവിലേയ്ക്ക് കുറച്ചു നെയ്യും അതിലേയ്ക്ക് തന്നെ ആവശ്യത്തിന് എള്ളും ചേർത്ത് കൊടുത്ത് നല്ലപോലെ ഇളക്കി യോജിപ്പിക്കുക.
ശേഷം ഒരു നുള്ള് ഉപ്പും കൂടി ചേർത്ത് നന്നായിട്ട് കലക്കി യോജിപ്പിച്ച് കുറച്ചു സമയം വെയ്ക്കുക. ഇനി അച്ച് നന്നായി തിളച്ച എണ്ണയിലേക്ക് ഇട്ട് നല്ലതുപോലെ ചൂടാക്കിയതിനുശേഷം ഇതിനെ മാവിലേക്ക് മുക്കുക. ഇനി മാവിൽ മുക്കിയ അച്ച് നേരേ തിളച്ച എണ്ണയിൽ മുക്കുക. അച്ചപ്പം മൂപ്പാകുമ്പോൾ അച്ചിൽനിന്നു തനിയെ വിട്ടുപോരും. ഇല്ലെങ്കില്‍ അച്ച് ഒന്ന് കുടഞ്ഞ് എടുക്കുകയോ അച്ചിൽ മെല്ലെ ഒന്നു തട്ടുകയോ ചെയ്താല്‍ മതിയാകും. ശേഷം അച്ചപ്പം മറിച്ചിട്ടു മൂപ്പിച്ചു കോരുക.
