അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.അടുക്കളയിലെ ഏറ്റവും വലിയ ടാസ്‌കാണ് പാത്രം കഴുകല്‍. മറ്റു ജോലി ഒക്കെ പെട്ടെന്നു തീര്‍ത്തു കഴിഞ്ഞാലും പാത്രം കഴുകല്‍ എന്ന വലിയൊരു പണി അവിടെ ബാക്കിയാവും. എന്നാല്‍ ഡിഷ് വാഷര്‍ വന്നതോടെ പാത്രം കഴുകുന്ന ജോലി ഏറക്കുറേ എളുപ്പമായിട്ടുണ്ട്.
ഇതിനോടകം അടുക്കളയിലെ അവശ്യവസ്തുവായി തന്നെ ഈ ഉപകരണം മാറിക്കഴിഞ്ഞു. ശരിയായ രീതിയില്‍ ഇത് ഉപയോഗിച്ചില്ലെങ്കില്‍ ഡിഷ് വാഷറിന് കേടുപാടുകള്‍ സംഭവിക്കാം. ഡിഷ് വാഷര്‍ ഉപയോഗിക്കുമ്പോള്‍ ഈ തെറ്റുകള്‍ ഒഴിവാക്കേണ്ടതാണ്.
എല്ലാത്തരം പാത്രങ്ങളും ഡിഷ് വാഷറിൽ കഴുകാൻ സാധിക്കില്ല. പ്ലാസ്റ്റിക്, ക്രിസ്റ്റൽ തുടങ്ങിയവ ഡിഷ് വാഷറിൽ കഴുകാനിടുന്നത് ഒഴിവാക്കാം. ഇത്തരം പാത്രങ്ങൾ കൈകൾ ഉപയോഗിച്ച് വൃത്തിയാക്കുന്നതാണ് നല്ലത്.
ഡിഷ് വാഷറിൽ പാത്രങ്ങൾ കഴുകാനിടുമ്പോൾ ഓരോന്നും അതാത് സ്ഥലത്ത് വയ്ക്കാൻ ശ്രദ്ധിക്കണം. കണ്ടെയ്‌നറുകൾ, ഗ്ലാസ്, മഗ്ഗ് തുടങ്ങിയവ ഏതൊക്കെ സ്ഥലത്താണ് വയ്‌ക്കേണ്ടതെന്ന് മനസിലാക്കണം. ഇല്ലെങ്കിൽ മെഷീന് കേടുപാടുകൾ സംഭവിക്കാൻ സാധ്യതയുണ്ട്.
പാത്രങ്ങൾ നന്നായി വൃത്തിയാകാൻ വേണ്ടി അമിതമായി സോപ്പ് പൊടി ഡിഷ് വാഷറിൽ ഇടാൻ പാടില്ല. ഇത് നിങ്ങളുടെ പാത്രങ്ങൾ വൃത്തിയാക്കുന്നതിന് പകരം മെഷീനിൽ സോപ്പ് പൊടി അടിഞ്ഞുകൂടാൻ കാരണമാകുന്നു. ഇത് ഡിഷ് വാഷറിന്റെ പ്രവർത്തനത്തെ ബാധിക്കും.
കൃത്യമായ ഇടവേളകളിൽ ഡിഷ് വാഷർ കഴുകി വൃത്തിയാക്കാൻ ശ്രദ്ധിക്കണം. പ്രത്യേകിച്ചും ഡിഷ് വാഷറിന് ഫിൽറ്റർ ഉണ്ടെങ്കിൽ അത്‍ ഇളക്കിമാറ്റി വൃത്തിയാക്കേണ്ടതുണ്ട്. ഭക്ഷണാവശിഷ്ടങ്ങൾ, അഴുക്ക് എന്നിവ അടിഞ്ഞുകൂടുന്നത് മെഷീന്റെ പ്രവർത്തനത്തെ ബാധിക്കുന്നു.
