ഓട്സ് തോരൻ കഴിച്ചിട്ടുണ്ടോ ?

നമ്മളിൽ പലരും തടി കുറയ്ക്കാൻ വേണ്ടി കഴിക്കുന്ന ഒന്നാണ് ഓട്സ്. സ്മൂത്തിയായും പുട്ട്, ദോശ എന്നിവയായും ഓട്സ് കഴിക്കാറുണ്ട്. ഇതിൽ നിന്നും വ്യത്യസ്തമായി ഒരു ഓട്സ് തോരൻ പരീക്ഷിച്ചാലോ? ശരീരഭാരം നിയന്ത്രിക്കാൻ ആഗ്രഹിക്കുന്നവർക്കും ആരോഗ്യപ്രേമികൾക്കും അനുയോജ്യമായ ഒരു ഭക്ഷണമാണ് ഈ രുചികരമായ തോരൻ. ഈ ഓട്സ് തോരൻ എങ്ങനെ തയ്യാറാക്കാമെന്ന് നോക്കാം.

ചേരുവകൾ

2 ടേബിൾസ്പൂൺ വെളിച്ചെണ്ണ
2 ചുവന്ന മുളക്
1 പച്ചമുളക്
100 ഗ്രാം ബീൻസ്
100 ഗ്രാം കാരറ്റ്
2 ടീസ്പൂൺ ജീരകം
ആവശ്യത്തിന് ഉപ്പ്
1 ടീസ്പൂൺ കടുക്
1/2 കപ്പ് തേങ്ങ ചിരകിയത്
3 ടേബിൾസ്പൂൺ ഓട്സ്

തയ്യാറാക്കുന്ന വിധം

ആദ്യം ഒരു പാനിൽ വെളിച്ചെണ്ണ ചൂടാക്കി കടുക് ചേർക്കുക. ശേഷം ചുവന്ന മുളകും, കറിവേപ്പിലയും, പച്ചമുളകും ചേർക്കുക. അരിഞ്ഞ കാരറ്റ്, ബീൻസ് എന്നിവ പാനിൽ ചേർത്ത് നന്നായി വഴറ്റാം. ഒപ്പം അരച്ച തേങ്ങയും ജീരകവും ഓട്സുമായി യോജിപ്പിച്ച് ചേർത്ത് നന്നായി ഇളക്കിയെടുക്കാം. ആവിയിൽ തന്നെ വേവിച്ചെടുക്കാം. വേണമെങ്കിൽ ഇത്തിരി വെള്ളം തളിച്ച് അടച്ച് വെച്ച് ചെറിയ തീയിൽ വേവിക്കാം. ശേഷം കറിവേപ്പിലയും ഇത്തിരി വെളിച്ചെണ്ണയും ചേർക്കണം. ചൂടോടെ ചോറിന് കഴിക്കാം.