അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ഐ ആം ഗെയിം സിനിമയുടെ ചിത്രീകരണം കഴിഞ്ഞ് ഹൈദരാബാദില്‍ നിന്ന് കൊച്ചിയിലേക്ക് മടങ്ങുന്നതിനിടയില്‍ ഫ്ളൈറ്റ് യാത്രക്കിടെയുണ്ടായ അനുഭവം പങ്കുവച്ച് നടന്‍ ആന്റണി വര്‍ഗീസ്. പ്രതികൂല കാലാവസ്ഥ ആയതിനാല്‍ ലാന്‍ഡിംഗ് ചെയ്യാനായില്ലെന്നും എന്നാല്‍ വിമാനത്തില്‍ ഉണ്ടായിരുന്ന വനിതാ പൈലറ്റ് ആ സമ്മര്‍ദ്ദ ഘട്ടത്തില്‍ എടുത്ത തീരുമാനം അതിശയിപ്പിച്ചെന്നും നടന്‍ തന്റെ സമൂഹമാധ്യമത്തില്‍ കുറിച്ചു.
കുറിപ്പിന്റെ പൂര്‍ണരൂപം…
‘ഇന്നലെ നടന്നത് ആലോചിക്കുമ്പോള്‍ ഇപ്പോഴും അത്ഭുതമാണ്. ഐ ആം ഗെയിമിന്റെ ഷൂട്ടിംഗ് പൂര്‍ത്തിയാക്കിയ ശേഷം, ഹൈദരാബാദില്‍ നിന്ന് കൊച്ചിയിലേക്കുള്ള ഇന്‍ഡിഗോ 6E 6707 വിമാനത്തില്‍ ഞാന്‍ കയറി. സാധാരണയാത്രയായിരുന്നു അത്. എന്നാല്‍ ആ യാത്ര തികച്ചും വ്യത്യസ്തമായ അനുഭവമായി മാറിയിരിക്കുകയാണ്. ഫ്ളൈറ്റ് കൊച്ചിയിലേക്ക് അടുക്കുന്നതിനിടയില്‍ കാലാവസ്ഥ പ്രതികൂലമായി. റണ്‍വേയില്‍ നിന്ന് ഏതാനും അടി ഉയരത്തില്‍ ആദ്യത്തെ ലാന്‍ഡിംഗ് ശ്രമം പൈലറ്റിന് ഉപേക്ഷിക്കേണ്ടി വന്നു. രണ്ടാമത്തെ ശ്രമം കൂടുതല്‍ ബുദ്ധിമുട്ടായിരുന്നു, ആ ശ്രമത്തിലും ലാന്‍ഡ് ചെയ്യേണ്ടെന്നായിരുന്നു പൈലറ്റിന്റെ തീരുമാനം. റണ്‍വേയില്‍ പോലും തട്ടാതെ, അവള്‍ വിമാനം വീണ്ടും ആകാശത്തേക്ക് ഉയര്‍ത്തി. രോമാഞ്ചം തോന്നിയ നിമിഷം’.
‘സമ്മര്‍ദം നിറഞ്ഞ ആ സമയത്ത് വളരെ ശാന്തതയോടെയും വ്യക്തതയോടെയും തീരുമാനമെടുത്ത പൈലറ്റ് ഇന്ധനം നിറയ്ക്കുന്നതിനായി വിമാനം കോയമ്പത്തൂരിലേക്ക് തിരിച്ചുവിട്ടു. ക്യാബിനിലെ പിരിമുറുക്കത്തില്‍ യാത്രക്കാര്‍ ഒരു നിമിഷം പരിഭ്രാന്തരായെങ്കിലും ഫ്‌ളൈറ്റിലെ ജീവനക്കാരായ എല്ലാ സ്ത്രീകളും, സാഹചര്യം കൈകാര്യം ചെയ്ത രീതി പ്രചോദനാത്മകമായിരുന്നു. ഇന്ധനം നിറച്ച ശേഷം, ഞങ്ങള്‍ വീണ്ടും പറന്നുയര്‍ന്ന് ഒടുവില്‍ കൊച്ചിയില്‍ സുരക്ഷിതമായി ലാന്‍ഡ് ചെയ്തു. വിമാനത്തിന്റെ ചക്രങ്ങള്‍ നിലത്ത് തൊട്ടതും, ക്യാബിനില്‍ കരഘോഷം മുഴങ്ങി. കോക്ക്പിറ്റിലെയും ക്യാബിനിലെയും അസാധാരണ വനിതകള്‍ക്ക് – നിങ്ങളുടെ പെട്ടെന്നുള്ള തീരുമാനങ്ങള്‍, കൃത്യത, എന്നിവ ഒരു ഭയാനകമായ സാഹചര്യത്തെ ബഹുമാനത്തിന്റെയും നന്ദിയുടെയും നിമിഷമാക്കി മാറ്റി. നന്ദി’.
View this post on Instagram
