അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ദൈവദാസന്‍ ആര്‍ച്ച്ബിഷപ്പ് മാര്‍ ഇവാനിയോസ് മെത്രാപ്പോലീത്തായുടെ 72-ാം ഓര്‍മ്മപ്പെരുന്നാളിനോടനുബന്ധിച്ച് വിവിധ സ്ഥലങ്ങളില്‍ നിന്ന് തുടങ്ങുന്ന തീര്‍ത്ഥാടന പദയാത്രകള്‍ക്ക് തുടക്കമാകുന്നു. റാന്നി പെരുന്നാട്ടില്‍ നിന്നും ആരംഭിക്കുന്ന പ്രധാന പദയാത്ര ജൂലൈ 10 വ്യാഴാഴ്ച മേജര്‍ ആര്‍ച്ചുബിഷപ്പ് കര്‍ദ്ദിനാള്‍ മാര്‍ ബസേലിയോസ് ക്ലീമീസ് കാതോലിക്കാബാവ ഉദ്ഘാടനം ചെയ്യും. പത്തനംതിട്ട ഭദ്രാസനാധ്യക്ഷന്‍ ബിഷപ്പ് സാമുവേല്‍ മാര്‍ ഐറേനിയോസ്, ബിഷപ്പ് യൂഹാനോന്‍ മാര്‍ ക്രിസോസ്റ്റം എന്നിവര്‍ പങ്കെടുക്കും.
രാവിലെ 6.30 ന് കാതോലിക്കാ ബാവായുടെ മുഖ്യകാര്‍മ്മികത്വത്തില്‍ കുര്‍ബാന നടക്കും. തുടര്‍ന്ന് ആരംഭിക്കുന്ന പദയാത്രയ്ക്ക് മലങ്കര കാത്തലിക്ക് യൂത്ത് മൂവ്മെന്റ് (എം.സി.വൈ.എം.) സഭാതല സമിതിയും തിരുവനന്തപുരം മേജര്‍ അതിഭദ്രാസനം, പത്തനംതിട്ട ഭദ്രാസന സമിതികള്‍ സംയുക്തമായി നേതൃത്വം നല്‍കും. വൈകിട്ട് പത്തനംതിട്ടയില്‍ സമാപിക്കുന്ന പദയാത്ര തുടര്‍ന്ന് അടൂര്‍, കൊട്ടാരക്കര, ആയൂര്‍, പിരപ്പന്‍കോട് വഴി തിരുവനന്തപുരത്ത് എത്തിച്ചേരും. മാര്‍ഇവാനിയോസ് മെത്രാപ്പോലീത്തായുടെ ജന്മഗൃഹമായ മാവേലിക്കര പുതിയകാവില്‍ നിന്ന് ആരംഭിക്കുന്ന പദയാത്ര നാളെ (ജൂലൈ 9) രാവിലെ മാവേലിക്കര ഭദ്രാസനാധ്യക്ഷന്‍ ബിഷപ്പ് മാത്യൂസ് മാര്‍ പോളികാര്‍പ്പസ് ഉദ്ഘാടനം ചെയ്യും.
തുടര്‍ന്ന് പദയാത്ര കറ്റാനം, പഴകുളം, കടമ്പനാട്, പുത്തൂര്‍, കല്ലുവാതുക്കല്‍ ആറ്റിങ്ങല്‍ വഴി 14 ന് വൈകിട്ട് കബറിങ്കല്‍ എത്തിച്ചേരും. തിരുവല്ല സെന്റ് ജോണ്‍സ് കത്തീഡ്രലില്‍ നിന്ന് ആരംഭിക്കുന്ന പദയാത്ര നാളെ രാവിലെ ആര്‍ച്ചു ബിഷപ്പ് തോമസ് മാര്‍ കൂറിലോസ് ഉദ്ഘാടനം ചെയ്യും. ഇന്നലെ (ജൂലൈ 7) മൂവാറ്റുപുഴയില്‍ നിന്ന് ബിഷപ്പ് യൂഹോനോന്‍ മാര്‍ തിയഡോഷ്യസ് ഉദ്ഘാടനം ചെയ്ത പദയാത്ര ഇന്ന് വൈകിട്ട് തിരുവല്ലയില്‍ എത്തിച്ചേരും. ഈ പദയാത്രകള്‍ 11 ന് വൈകിട്ട് അടൂരില്‍ പ്രധാന പദയാത്രയോട് ചേരും. 13 ന് മാര്‍ത്താണ്ഡത്തുനിന്നും ആരംഭിക്കുന്ന പദയാത്ര ബിഷപ്പ് വിന്‍സെന്റ് മാര്‍ പൗലോസും, പാറശ്ശാലയില്‍ നിന്ന് ആരംഭിക്കുന്ന പദയാത്ര ബിഷപ്പ് തോമസ് മാര്‍ യൗസേബിയോസും ഉദ്ഘാടനം ചെയ്യും.
കേരളത്തിന് പുറത്ത് പുത്തൂര്‍, പൂന, ഒറീസ്സ, ഡെല്‍ഹി, ഹൈദരാബാദ് തുടങ്ങിയ സ്ഥലങ്ങളില്‍ നിന്ന് എത്തിച്ചേരുന്ന തീര്‍ത്ഥാടകര്‍ 14 ന് രാവിലെ പിരപ്പന്‍കോട് നിന്ന് പ്രധാന പദയാത്രയോട് ചേരും. ഈ വര്‍ഷം ഗള്‍ഫ് മേഖലയില്‍ നിന്നുള്ള തീര്‍ത്ഥാടകരും പദയാത്രയില്‍ പങ്കുചേരും. 14 ന് വൈകിട്ട് 5 ന് എല്ലാ പദയാത്രകളും പട്ടം സെന്റ് മേരീസ് കത്തീഡ്രലിലെ കബറിടത്തില്‍ എത്തിച്ചേരും. വള്ളിക്കുരിശ് വഹിച്ചും കാഷായ വസ്ത്രം ധരിച്ചുമാണ് തീര്‍ത്ഥാടകര്‍ പദയാത്രയില്‍ അണിചേരുന്നത്.
CONTENT HIGH LIGHTS; Mar Ivanios Memorial Day: Pilgrimage Walks Begin
