വായിൽ കപ്പലോടും സ്വാദിൽ മധുരമുള്ള നാരങ്ങ അച്ചാർ തയ്യാറാക്കിയാലോ?

വായിൽ കപ്പലോടും കിടിലൻ നാരങ്ങാ അച്ചാർ ഉണ്ടാക്കിയാലോ? വളരെ എളുപ്പത്തിൽ രുചികരമായി തന്നെ തയ്യാറാക്കാം.

ആവശ്യമായ ചേരുവകൾ

• ചെറുനാരങ്ങ – 500 ഗ്രാം
• ഈന്തപ്പഴം –300 ഗ്രാം
• എള്ളെണ്ണ – ആവശ്യത്തിന്
• കടുക് –ആവശ്യത്തിന്
• ഉലുവ –ഒരു ടി സ്പൂൺ
• കായം – 20 ഗ്രാം
• പച്ചമുളക് –12 എണ്ണം
• ഇഞ്ചി –50 ഗ്രാം
• വെളുത്തുള്ളി – 50 ഗ്രാം
• അച്ചാർ പൊടി – 100 ഗ്രാം
• കാശ്മീരി മുളക് പൊടി –100 ഗ്രാം
• വിനാഗിരി –100 എംഎൽ
• ഉപ്പ് –ആവശ്യത്തിന്
• മഞ്ഞൾപൊടി – ആവശ്യത്തിന്
• പഞ്ചസാര – 50 ഗ്രാം

തയാറാക്കുന്ന വിധം

ചെറുനാരങ്ങാ ചെറിയ കഷ്ണങ്ങളായി മുറിക്കുക. ശേഷം ഉപ്പും മഞ്ഞൾപൊടിയും ചേർത്ത് ഇളക്കിവയ്ക്കാം. പാത്രത്തിൽ ആവശ്യത്തിന് നല്ലെണ്ണ ഒഴിച്ച് കടുകു പൊട്ടിക്കുക. ഉലുവ ചേർത്ത് നിറം മാറുമ്പോൾ കറിവേപ്പിലയും ചെറുതായി മുറിച്ചു വച്ച ഇഞ്ചി പച്ചമുളക്, വെളുത്തുള്ളി എന്നിവയും ചേർക്കുക. കുറച്ചു നേരം വഴറ്റിയ ശേഷം ചെറുനാരങ്ങ ചേർക്കാം. നല്ലപോലെ വാടിയ ശേഷം ചെറിയ കഷ്ണങ്ങളാക്കിയ ഈന്തപ്പഴം ചേർക്കാം. ശേഷം അച്ചാർ പൊടി, കാശ്മീരി മുളക്പൊടി, കായം എന്നിവ ചേർക്കാം. പൊടികൾ ചൂടാവുമ്പോൾ വളരെ കുറച്ചു വിനാഗിരി, കുറച്ചു ചൂടുവെള്ളം എന്നിവ ഒഴിച്ച് നേർപ്പിക്കുക. ആവശ്യത്തിന് ഉപ്പും അല്പം പഞ്ചസാരയും ചേർത്ത് കൊടുക്കാം.