അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.പൊതുമരാമത്ത് റോഡില്‍ അലക്ഷ്യമായി ഇറക്കിയിട്ടിരുന്ന മെറ്റലില്‍ സ്‌കൂട്ടര്‍ തെന്നിവീണ് യാത്രക്കാരിക്ക് പരിക്കേറ്റ സംഭവത്തില്‍ തൊളിക്കോട് ഗ്രാമപഞ്ചായത്ത് 22,500 രൂപ നഷ്ടപരിഹാരം നല്‍കണമെന്ന് മനുഷ്യാവകാശ കമ്മീഷന്‍ ചെയര്‍പേഴ്‌സണ്‍ ജസ്റ്റിസ് അലക്‌സാണ്ടര്‍ തോമസ് ഉത്തരവിട്ടു. രണ്ടുമാസത്തിനുള്ളില്‍ നഷ്ടപരിഹാര തുകയായ 22,500 രൂപ നല്‍കിയില്ലെങ്കില്‍ 8% പലിശ നല്‍കേണ്ടി വരുമെന്ന് ഉത്തരവില്‍ പറഞ്ഞു. തുക നല്‍കിയ ശേഷം തൊളിക്കോട് ഗ്രാമപഞ്ചായത്ത് സെക്രട്ടറി നടപടി റിപ്പോര്‍ട്ട് സമര്‍പ്പിക്കണം. നഷ്ടപരിഹാരം പഞ്ചായത്ത് നല്‍കിയ ശേഷം ഉത്തരവാദികളില്‍ നിന്നും നിയമാനുസരണം ഈടാക്കാന്‍ തൊളിക്കോട് ഗ്രാമപഞ്ചായത്തിന് സ്വാതന്ത്ര്യമുണ്ടായിരിക്കുമെന്നും ഉത്തരവില്‍ പറഞ്ഞു.
2023 മേയ് 9 നാണ് അപകടമുണ്ടായത്. മൈലാമൂട് ട്രാന്‍സ്‌ഫോര്‍മറിന് സമീപം റോഡിലുണ്ടായിരുന്ന മെറ്റലിലാണ് നെടുമങ്ങാട് സ്വദേശിനി സ്മിതാ ഭാസ്‌കറിന്റെ സ്‌കൂട്ടര്‍ തെന്നി വീണത്. ഹര്‍ജിക്കാരിക്ക് സാരമായി പരിക്കേറ്റതായി പരാതിയില്‍ പറയുന്നു. തുടര്‍ന്ന് കൊച്ചിയില്‍ നേവി ഉദ്യോഗസ്ഥനായ ഭര്‍ത്താവിന് അവധിയെടുത്ത് വന്ന് ഭാര്യയെ ശുശ്രൂഷിക്കേണ്ടതായി വന്നുവെന്നും പരാതിയില്‍ പറയുന്നു. ഒന്നര ലക്ഷം രൂപ നഷ്ടപരിഹാരം ആവശ്യപ്പെട്ടാണ് പരാതിക്കാരി കമ്മീഷനെ സമീപിച്ചത്.
കമ്മീഷന്റെ ചീഫ് ഇന്‍വെസ്റ്റിഗേഷന്‍ ഓഫീസര്‍ സമര്‍പ്പിച്ച അന്വേഷണ റിപ്പോര്‍ട്ടിന്റെ അടിസ്ഥാനത്തിലാണ് നഷ്ടപരിഹാരം നല്‍കാന്‍ ഉത്തരവിട്ടത്. പഞ്ചായത്ത് റോഡില്‍ പണി ചെയ്യാനുള്ള മെറ്റല്‍ അനുവാദമില്ലാതെ പൊതുമരാമത്ത് റോഡില്‍ ഇറക്കിയിട്ടത് നിയമവിരുദ്ധമാണെന്ന് കമ്മീഷന്‍ കണ്ടെത്തി. മെറ്റല്‍ ഇറക്കാന്‍ പഞ്ചായത്തിന്റെ അനുമതി കരാറുകാരന്‍ വാങ്ങിയില്ലെന്ന പഞ്ചായത്ത് സെക്രട്ടറിയുടെ വാദം കമ്മീഷന്‍ അംഗീകരിച്ചില്ല. വഴിയാത്രക്കാര്‍ക്ക് മെറ്റല്‍ കാരണം അപകടം സംഭവിക്കാതിരിക്കാനുള്ള മുന്‍കരുതല്‍ പഞ്ചായത്ത് സ്വീകരിച്ചില്ലെന്ന് കമ്മീഷന്‍ ഉത്തരവില്‍ പറഞ്ഞു. റോഡിന്റെ വശങ്ങളില്‍ നിര്‍മ്മാണ വസ്തുക്കള്‍ നിക്ഷേപിക്കുമ്പോള്‍ പൊതുജനങ്ങള്‍ക്ക് അപകടം സംഭവിക്കാതിരിക്കാനുള്ള സുരക്ഷാ നടപടികള്‍ മുന്‍കൂട്ടി സ്വീകരിക്കാനുള്ള ബാധ്യത ഉദ്യോഗസ്ഥര്‍ക്കുണ്ടെന്ന് ജസ്റ്റിസ് അലക്‌സാണ്ടര്‍ തോമസ് ഉത്തരവില്‍ പറഞ്ഞു. ഇത്തരം അപകടങ്ങള്‍ ഒഴിവാക്കുന്നതിന് പഞ്ചായത്ത് നടപടികള്‍ സ്വീകരിക്കേണ്ടതായിരുന്നു. എന്നാല്‍ പഞ്ചായത്തിന് വീഴ്ച സംഭവിച്ചു. ഈ സാഹചര്യത്തിലാണ് നഷ്ടപരിഹാരം നല്‍കാന്‍ കമ്മീഷന്‍ ഉത്തരവിട്ടത്.
