അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.മുന്‍ മുഖ്യമന്ത്രി ഉമ്മന്‍ ചാണ്ടിയുടെ രാഷ്ട്രീയ ജീവചരിത്ര ഗ്രന്ഥം ‘വിസ്മയ തണലില്‍’ ജൂലൈ 16ന് രാവിലെ പത്തിന് തിരുവനന്തപുരം പ്രസ് ക്ലബ്ബില്‍ നടക്കുന്ന ചടങ്ങില്‍ പ്രതിപക്ഷ നേതാവ് വിഡി സതീശന്‍ പ്രകാശനം ചെയ്യും. ഉമ്മൻ ചാണ്ടിയുടെ മുന്‍ പ്രസ് സെക്രട്ടറി പി.ടി.ചാക്കോയാണ് പുസ്തകത്തിന്ർറെ രചന നിർവ്വഹിച്ചത്. മുന്‍ മന്ത്രിമാരായ കെസി ജോസഫ്, എംഎം ഹസന്‍, ബി അശോക് ഐഎഎസ്, എം. രഞ്ജിത് എന്നിവര്‍ പ്രസംഗിക്കും. പ്രസാദ് കുറ്റിക്കോട് (ഡിസി ബുക്‌സ്) സ്വാഗതവും പി.ടി. ചാക്കോ നന്ദിയും പറയും.
2004 മുതല്‍ ഉമ്മന്‍ ചാണ്ടിയോടൊപ്പമുണ്ടായിരുന്ന പി.ടി ചാക്കോയുടെ അനുഭവകുറിപ്പുകളാണ് ഉള്ളടക്കം. ഉമ്മന്‍ ചാണ്ടി പ്രതിപക്ഷ നേതാവും രണ്ടു തവണ മുഖ്യമന്ത്രിയും ആയിരുന്ന കാലഘട്ടം ഇതില്‍ വിവരിക്കുന്നു. ജനസമ്പര്‍ക്ക പരിപാടി വിജയകരമായി നടപ്പാക്കിയതിന്റെ പിന്നിലെ ആസൂത്രണം, യുഎന്‍ അവാര്‍ഡിനെ താഴ്ത്തിക്കെട്ടാന്‍ ഇടതുപക്ഷം ആഗോളതലത്തില്‍ നടത്തിയ പ്രചാരണം, വെല്ലുവിളികള്‍ നേരിട്ട് വന്‍കിട പദ്ധതികള്‍ നടപ്പാക്കിയതിന്റെ പിന്നിലെ മാനേജ്‌മെന്റ് വൈദഗ്ധ്യം, സോളാര്‍ കൂടാതെ അരഡസനോളം കേസുകള്‍ തുടങ്ങിയവ പ്രതിപാദിച്ചിട്ടുണ്ട്. 2011ലെ തെരഞ്ഞെടുപ്പ് വിജയത്തിന്റെ പിന്നിലെ നാടകീയ നീക്കം, മദ്യനയം പ്രഖ്യാപിക്കാന്‍ നിര്‍ബന്ധിതനായത്, കടുംവെട്ട് വിവാദം, കേരളത്തെ ഇളക്കിമറിച്ച അന്ത്യയാത്ര തുടങ്ങിയവയുണ്ട്. 412 പേജുള്ള ജീവചരിത്രം ഡിസി ബുക്‌സാണ് പ്രസിദ്ധീകരിക്കുന്നത്.
ഉമ്മന്‍ ചാണ്ടിയെക്കുറിച്ച് പി.ടി. ചാക്കോയുടെ ആറാമത്തെ പുസ്തകമാണിത്. മൂന്നു കുഞ്ഞൂഞ്ഞു കഥകള്‍, ഇംഗ്ലീഷിലും മലയാളത്തിലുമായി രണ്ടു ജീവചരിത്രങ്ങള്‍ എന്നിവ നേരത്തെ പ്രസിദ്ധീകരിച്ചിട്ടുണ്ട്.
