അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.ജ്യോതികയെ നായികയാക്കി 2006ല്‍ രേവതി ആര്‍ വര്‍മ സംവിധാനം ചെയ്ത ചിത്രമാണ് ‘ജൂണ്‍ ആര്‍’. ഈ ചിത്രത്തിലൂടെയാണ് രേവതി ആര്‍ വര്‍മ സംവിധാന രംഗത്തേക്ക് കടന്നു വരുന്നത്. രേവതി വര്‍മയുടെ ഇതേ പേരിലുള്ള നോവലിന്റെ ചലച്ചിത്രാവിഷ്‌കാരമാണ് ജൂണ്‍ ആര്‍. സിനിമയില്‍ അതിഥിവേഷത്തില്‍ സൂര്യയും പ്രത്യക്ഷപ്പെട്ടിരുന്നു. ഇപ്പോഴിതാ ഈ വേഷത്തിലേക്ക് ആദ്യം പരിഗണിച്ചിരുന്നത് പൃഥ്വിരാജിനെയായിരുന്നെന്ന് തുറന്ന് പറയുകയാണ് രേവതി. കൗമുദി മൂവീസിന് നല്‍കിയ അഭിമുഖത്തിലായിരുന്നു രേവതിയുടെ പ്രതികരണം.
രേവതി വര്‍മ്മയുടെ വാക്കുകള്‍…..
‘ആദ്യത്തെ സിനിമയാണ് ജൂണ്‍ ആര്‍. ആ സിനിമയുടെ കാസ്റ്റിങ്ങെല്ലാം ആദ്യമേ ഫിക്സ് ചെയ്തതായിരുന്നു. നായികയായി ജ്യോതികയും പിന്നെ ഖുശ്ബു അങ്ങനെ. ഗസ്റ്റ് റോളിലേക്ക് ആദ്യം ഉദ്ദേശിച്ചത് പൃഥ്വിരാജിനെയായിരുന്നു. മല്ലിക സുകുമാരനെ എനിക്ക് നേരത്തെ അറിയാമായിരുന്നു. അങ്ങനെയാണ് പൃഥ്വിയിലേക്ക് എത്തിയത്. അദ്ദേഹം ഓക്കെ പറയുകയും ചെയ്തു. എന്നാല്‍ പിന്നീട് ജ്യോതിക എന്നോട് സംസാരിച്ചു. ‘ആ ഗസ്റ്റ് റോളിലേക്ക് സൂര്യ വന്നാല്‍ നന്നായിരിക്കും, ഇങ്ങനെയുള്ള കഥകള്‍ അയാള്‍ക്ക് ഇഷ്ടമാണ്. ഒന്ന് ചോദിക്കമോ?’ എന്ന് എന്നോട് പറഞ്ഞു. അങ്ങനെ ജ്യോതിക കാരണം ആ വേഷത്തിലേക്ക് സൂര്യയെ വിളിച്ചു. പൃഥ്വിരാജിനോട് എനിക്ക് പിന്നീട് സോറി പറയേണ്ടി വന്നു’.
