Vellappally Natesan
എസ്എന്‍ഡിപി യോഗം ജനറല്‍ സെക്രട്ടറി വെള്ളാപ്പള്ളി നടേശനെതിരെ ശ്രീനാരായണ സേവാസംഘം. മുസ്‌ലിം സമുദായത്തിനെതിരായ അധിക്ഷേപ പരാമർശം നടത്തിയതിനെതിരാണ് ശ്രീനാരായണ സേവാസംഘം രംഗത്തെത്തിയത്. വെള്ളാപ്പള്ളിയുടെ പ്രസ്താവന കടുത്ത ഗുരുനിന്ദയും വര്‍ഗീയ വേര്‍തിരിവ് സൃഷ്ടിക്കുന്നതാണെന്നും ശ്രീനാരായണ സേവാസംഘം ഭാരവാഹികള്‍ പറഞ്ഞു. വെള്ളാപ്പള്ളി നടേശന്റെ വലയില്‍ കുടുങ്ങിയ രാഷ്ട്രീയ നേതാക്കള്‍ വാഴ്ത്തുപാട്ടുകാരായി മാറിയിരിക്കുകയാണ്. സാമൂഹീക നീതിയുടെ കാവല്‍ഭടന്മാരായി എക്കാലവും നിലകൊണ്ടിട്ടുള്ള പാരമ്പര്യമാണ് മുസ്‌ലിം സമുദായത്തിനും ലീഗിനുമുള്ളതെന്നും ശ്രീനാരായണ സേവാസംഘം ഭാരവാഹികള്‍ അഭിപ്രായപ്പെട്ടു.
വെള്ളാപ്പള്ളി നടേശന്‍ മൈക്രോ ഫിനാന്‍സ് വായ്പാ തട്ടിപ്പുകള്‍ ഉള്‍പ്പെടെ നിരവധി ക്രിമിനല്‍ കേസുകളില്‍ പ്രതിയാണെന്നും സമുദായത്തിന്റെ അന്തകനാണെന്നും ഭാരവാഹികള്‍ പറഞ്ഞു. വെള്ളാപ്പള്ളിയുടെ കഴിഞ്ഞ 29 വര്‍ഷത്തെ കിരാത വാഴ്ചയിലൂടെ എസ്എന്‍ഡിപി യോഗത്തിനും എസ്എന്‍ ട്രസ്റ്റിനുമുണ്ടായിട്ടുള്ള അപചയവും അധഃപതനവും വിവരണാതീതമാണെന്നും ഭാരവാഹികള്‍ കൂട്ടിച്ചേർത്തു.