അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വഴി കണ്ടെത്താനായി ഗൂഗിൾ മാപ്പിനെ ആശ്രയിക്കുന്നവരാണ് നമ്മൾ. ലോകത്തിലെ വിവിധ സ്ഥലങ്ങളെക്കുറിച്ചുള്ള വിവരങ്ങൾ ഗൂഗിൾ മാപ്പ് നൽകുന്നു. ഇതിൽ സ്ഥലങ്ങൾ തിരയാനും, റൂട്ട് കണ്ടെത്താനും, ഗതാഗത വിവരങ്ങൾ അറിയാനും സാധിക്കും. ഡ്രൈവർമാരുടെ സന്തത സഹചാരിയാണ് ഗൂഗിൾ മാപ്പ്.
ഏത് വഴി അറിയാത്തവരെയും ഗൂഗിൾ മാപ്സ് ക്യത്യസ്ഥലത്ത് എത്തിക്കുമെങ്കിലും ചിലത് അപകടങ്ങളിലേക്കായിരിക്കും എത്തിക്കുക. ഗൂഗിൾ മാപ്പിനെ അങ്ങനെ കണ്ണുമടച്ച് വിശ്വസിക്കരുത്. ഗൂഗിൾ മാപ്പ് നോക്കി യാത്ര ചെയ്തുണ്ടായ നിരവധി അപകടങ്ങളും വാർത്തയായിട്ടുണ്ട്.
പല അബദ്ധങ്ങളും ഗൂഗിൾ മാപ്സിനു വരാറുണ്ട്. ഇതിൽ പെട്ട് പലരും നട്ടം തിരിയാറുമുണ്ട്. ചില ഇട റോഡുകളൊക്കെ എളുപ്പ മാർഗമെന്ന നിലയിൽ മാപ്പ് നിർദേശിക്കും. അങ്ങോട്ടേക്കു പോകുമ്പോൾ മാപ്സിൽ കാണിക്കുന്ന പോലെയായിരിക്കില്ല. ചിലപ്പോൾ റോഡിനു തകരാർ കാരണം ഗതാഗതം നിരോധിച്ചിരിക്കുകയാകും. ഇതൊന്നും ചിലപ്പോൾ മാപ്സിൽ അപ്ഡേറ്റുമായിട്ടുണ്ടാവില്ല.
അപകടങ്ങൾ നിരവധി
ഗൂഗിൾ മാപ്സ് നോക്കി നീങ്ങിയ കാർ പടിക്കെട്ടു നിരങ്ങിയിറങ്ങിയ സംഭവമുണ്ടായതും ഭീമൻ വാഹനം ഇട റോഡിലേക്കു വന്നു കുടുങ്ങിയതുമായി നിരവധി അപകടങ്ങൾ ഉണ്ടായിട്ടുണ്ട്. എന്നാൽ ഇതാ ഗൂഗിൾ മാപ്സിനെ ആശ്രയിച്ചു യാത്ര ചെയ്തതതിനെത്തുടർന്നു വഴി തെറ്റി കാർ പുഴയിൽ പതിച്ച സംഭവവുമുണ്ട്.
കഴിഞ്ഞ വർഷം കാർ പുഴയിൽ പതിച്ചു രണ്ടു യുവ ഡോക്ടർമാർ മരിച്ച അതിദാരുണമായ ഒരു സംഭവം ഉണ്ടായതും ഓർമിക്കുക. കാലാവസ്ഥയിലെ മാറ്റങ്ങളും ഇടറോഡുകളിലെ വ്യത്യാസങ്ങളുമൊക്കെ ആരെങ്കിലും അപ്ഡേറ്റ് ചെയ്താൽ മാത്രം വരുന്നതിനാൽ ഗൂഗിൾ മാപ്സിനെ നമ്മുടെ വഴികാട്ടിയായി ഉപയോഗിക്കുമ്പോൾ ചില കാര്യങ്ങൾ ഒന്നു മനസ്സിൽ വയ്ക്കേണ്ടത് അത്യാവശ്യമാണ്.
സൂക്ഷിച്ചാൽ ദുഃഖിക്കേണ്ട
അപരിചിതവും വിജനവുമായ മേഖലകളിലാണെങ്കിൽ പ്രധാന റോഡുകളിൽ യാത്ര ചെയ്യാൻ ശ്രമിക്കുക. ഗൂഗിൾ നോക്കി അൽപം സമയലാഭത്തിനായുള്ള ഇടറോഡ് ഒഴിവാക്കുന്നതാകും നല്ലത്. പ്രത്യേകിച്ചും രാത്രിയാത്രയിൽ
∙ഇടറോഡിൽ കയറേണ്ട അവസ്ഥ വന്നാൽ ആദ്യം കാണുന്ന നാട്ടുകാരനോട് സ്ഥിതി ആരായുക. എവിടെയെങ്കിലും ഗതാഗത നിരോധനമോ തകർച്ചയോ മറ്റു പ്രശ്നങ്ങളോ ഉണ്ടെങ്കിൽ അവർ പറഞ്ഞുതരും.
∙കാര്യമായ പ്രശ്നമോ സ്ഥിരമായ ഗതാഗത തടസ്സമോ ശ്രദ്ധയിൽപെട്ടാൽ ഗൂഗിൾ മാപ്പ് ആപ്പ് തുറന്നു ചുവടെയുള്ള കോൺട്രിബ്യൂട്ട് എന്ന ഓപ്ഷനിൽ വിരലമർത്താം. തുടർന്നു തുറക്കുന്ന വിൻഡോയിൽ നിന്ന് എഡിറ്റ് മാപ് എന്ന ഓപ്ഷൻ തിരഞ്ഞെടുക്കുമ്പോൾ ആഡ് ഓർ ഫിക്സ് റോഡ് എന്ന ഓപ്ഷൻ കാണാം. ഇതു തിരഞ്ഞെടുത്ത് എന്താണു പ്രശ്നമെന്നു റിപ്പോർട്ട് ചെയ്യാം. അതു വഴി വരുന്നവർക്കൊരു സഹായവുമാകും.
∙തെറ്റായി കിടക്കുന്ന സ്ഥലനാമങ്ങളും അടയാളപ്പെടുത്താത്ത മേഖലകളുമൊക്കെ ഈ രീതിയിൽ ഗൂഗിളിനെ അറിയിക്കാം.
∙ഗൂഗിൾ മാപ്പിൽ ഫീഡ്ബാക് കൊടുക്കാം. സെറ്റിങ്സിൽ ഇതിനുള്ള സൗകര്യം ലഭിക്കും.
∙കൂടുതൽ മികവുറ്റ നാവിഗേഷന് ലൊക്കേഷൻ ഹൈ ആക്യുറസിയിൽ വയ്ക്കാം. ഇതിനായി സെറ്റിങ്സിൽ പോയി ഗൂഗിൾ ലൊക്കേഷൻ സെറ്റിങ്സ് തിരഞ്ഞെടുത്ത ശേഷം അഡ്വാൻസ്ഡിൽ ടാപ് ചെയ്യാം. ഇതിനു ശേഷം വരുന്ന മെനുവിൽ ഗൂഗിൾ ലൊക്കേഷൻ ആക്യുറസി എന്ന ഓപ്ഷൻ തിരഞ്ഞെടുത്ത് ഓണാക്കി വയ്ക്കാം. കോംപസ് കാലിബ്രേറ്റ് ചെയ്യുക എന്ന ഓപ്ഷനും പരിഗണിക്കാം..
