അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പ്രമുഖ വാഹന നിർമാതാക്കളായ ഹോണ്ട, തങ്ങളുടെ ജനപ്രിയ എസ്‌യുവിയായ ‘എലിവേറ്റിന്റെ’ ഫെയ്‌സ്‌ലിഫ്റ്റ് പതിപ്പ് ഇന്ത്യൻ വിപണിയിൽ അവതരിപ്പിച്ചു. പുതിയ മോഡലിന്റെ ഇന്ധനക്ഷമത സംബന്ധിച്ച കണക്കുകളും കമ്പനി പുറത്തുവിട്ടിട്ടുണ്ട്. ഇതോടെ വിപണിയിലെ മറ്റ് മുൻനിര എസ്‌യുവികളുമായി കടുത്ത മത്സരത്തിനാണ് ഹോണ്ട കളമൊരുക്കുന്നത്.
പരിചിതമായ 1.5 ലിറ്റർ നാച്ചുറലി ആസ്പിറേറ്റഡ് പെട്രോൾ എൻജിൻ തന്നെയാണ് പുതിയ എലിവേറ്റിനും കരുത്ത് പകരുന്നത്. 119 ബിഎച്ച്പി കരുത്തും 145 എൻഎം ടോർക്കും ഉത്പാദിപ്പിക്കുന്ന ഈ എൻജിനിൽ മാറ്റമില്ല. മാനുവൽ വേരിയന്റ് പഴയതുപോലെ 15.31 കിലോമീറ്റർ മൈലേജ് നൽകുമ്പോൾ, സിവിടി പതിപ്പിന്റെ മൈലേജിൽ നേരിയ കുറവ് വന്നിട്ടുണ്ട്.
ഡിസൈൻ തലത്തിലും ഒട്ടനവധി മാറ്റങ്ങളോടെയാണ് പുതിയ മോഡൽ എത്തുന്നത്. പുതിയ എൽഇഡി ഡിആർഎൽ സ്ട്രിപ്പ്, ഗ്ലോസ്-ബ്ലാക്ക് ഫിനിഷിലുള്ള ഗ്രിൽ, ബോണറ്റിന്റെ മുൻഭാഗത്തേക്ക് മാറ്റിയ ഹോണ്ട ലോഗോ എന്നിവ മുൻഭാഗത്തിന് പുതിയ മുഖം നൽകുന്നു.
പിൻഭാഗത്ത് ടെയിൽ ലാമ്പുകളെ ബന്ധിപ്പിക്കുന്ന പുതിയ എൽഇഡി ലൈറ്റ് ബാറും നോർഡിക് ഫോറസ്റ്റ് പേൾ നിറവും പ്രധാന ആകർഷണങ്ങളാണ്.
ഉൾവശത്ത് യാത്രക്കാരുടെ സൗകര്യം വർധിപ്പിക്കുന്നതിനായി നിരവധി പുതിയ ഫീച്ചറുകൾ ഉൾപ്പെടുത്തിയിട്ടുണ്ട്. സെഗ്‌മെന്റിൽ ആദ്യമായി പിൻസീറ്റുകൾക്ക് വെന്റിലേഷൻ ഫംഗ്‌ഷൻ നൽകിയിരിക്കുന്നു.
കൂടാതെ പവർഡ് ഫ്രണ്ട് വെന്റിലേറ്റഡ് സീറ്റുകൾ, 360-ഡിഗ്രി ക്യാമറ, ഇലക്ട്രോണിക് പാർക്കിംഗ് ബ്രേക്ക് തുടങ്ങിയ അത്യാധുനിക സൗകര്യങ്ങളും പുതിയ എലിവേറ്റിൽ സജ്ജീകരിച്ചിട്ടുണ്ട്.
