അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.വയനാടിനെ സംസ്ഥാനത്തെ അടുത്ത സ്റ്റാർട്ടപ് ഹബ്ബാക്കി മാറ്റാൻ ലക്ഷ്യമിട്ട് സ്റ്റാർട്ടപ് ഇന്ത്യ. കൊച്ചിയിൽ നടന്ന കേരള ഇന്നവേഷൻ ഫെസ്റ്റിവലിലാണ് ഈ പ്രഖ്യാപനമുണ്ടായത്. ദേശീയ തലത്തിൽ ‘Aspirational Districts Programm’e (ADP) ലിസ്റ്റിൽ ഉൾപ്പെട്ട കേരളത്തിലെ ഒരേയൊരു ജില്ല വയനാടായിരുന്നു. ഇതേത്തുടർന്നാണ് മലയോര ജില്ലയെ ‘കൈപിടിച്ചുയർത്താൻ’ തീരുമാനമുണ്ടായത്.
വയനാട്ടിലെ ടയർ II/III പ്രദേശങ്ങളിൽ ഇൻക്യുബേഷൻ സെന്ററുകൾ വികസിപ്പിക്കുന്നതിന് കൂടുതൽ ശ്രദ്ധ നൽകുമെന്ന് സ്റ്റാർട്ടപ് ഇന്ത്യ മേധാവി മമത വെങ്കടേഷ് അറിയിച്ചു. കേരള സർക്കാരുമായും, ആത്മനിർമർ ഭാരത് പോലെയുള്ള കേന്ദ്ര പദ്ധതികളുമായും സഹകരിക്കുന്നതിനുള്ള നടപടിക്രമങ്ങളും നടക്കുകയാണ്. പ്രാദേശിക സ്റ്റാർട്ടപ് സംരംഭങ്ങളുമായി ബന്ധപ്പെട്ട് ആൾട്ടർനേറ്റീവ് ഇൻവെസ്റ്റ്മെന്റ് ഫണ്ടുകൾ (AIFs), സ്വകരായ നിക്ഷേപങ്ങൾ എന്നിവ ലഭ്യമാക്കുന്നതിന് മുൻഗണന നൽകും.
സുസ്ഥിരമായ സ്റ്റാർട്ടപ് വിജയഗാഥകളിൽ വയനാടിന്റെ പേര് ഇപ്പോൾത്തന്നെയുണ്ട്. ഉദാഹരണത്തിന് സോളാർ കുക്കറുകൾ, ഹൈഡ്രോപോണിക്സ് മേഖലകളിൽ വിജയക്കൊടി പാറിച്ച വയനാടൻ സംരംഭമാണ് ‘BoTToB Tech Solutions’. കുങ്കുമപ്പൂ കൃഷിയിൽ എയ്റോപോണിക്സ് മാർഗങ്ങൾ വിജയകരമായി നടപ്പാക്കിയ സ്റ്റാർട്ടപ്പാണ് ‘LNS AgriTech’.
വയനാട്ടിൽ കൂടുതൽ സ്റ്റാർട്ടപ് സംരംഭങ്ങൾ വരുന്നതോടെ ട്രൈബൽ-റൂറൽ പ്രദേശങ്ങളിലടക്കം പരിസ്ഥിതി സൗഹാർദ സംരംഭങ്ങൾക്ക് അവസരമൊരുങ്ങും. നിലവിൽ സംരംഭ വളർച്ചയ്ക്ക് സാധ്യതയുള്ള പ്രദേശങ്ങൾ സംബന്ധിച്ച് നീതി ആയോഗ് പ്രസിദ്ധീകരിച്ച പട്ടികയിൽ നിന്നാണ് കേരളത്തിന്റെ അഭിമാനമായി വയനാട് തെരഞ്ഞെടുക്കപ്പെട്ടത്
കേരളത്തിന്റെ വിനോദ സഞ്ചാര ഭൂമികയിൽ നിയതമായ ഒരു സ്ഥാനം വയനാട് നേടിയിട്ടുണ്ട്. ചരിത്രപ്രസിദ്ധമായ എടക്കൽ ഗുഹ, ബാണാസുര സാഗർ അണക്കെട്ട്, ചെമ്പ്ര മലനിരകൾ, പൂക്കോട് തടാകം, വയനാട് വന്യജീവി സങ്കേതം, കുറുവ ദ്വീപ്, സൂചിപ്പാറ വെള്ളച്ചാട്ടം, തിരുനെല്ലി, ചെങ്കീരി മല, എൻ ഊര, കാരാപ്പുഴ ഡാം, ചെങ്കീരി മല എന്നിങ്ങനെ നിരവധി വിനോദ സഞ്ചാര കേന്ദ്രങ്ങളാണ് ജില്ലയിലുള്ളത്.
ടൂറിസത്തിന്റെ പ്രാധാന്യത്തിനൊപ്പം, നിരവധി സ്റ്റാർട്ടപ്പുകളുടെ ആവിർഭാവം കൂടി സംഭവിക്കുന്നതോടെ ജില്ലയുടെ മുഖച്ഛായ തന്നെ മാറുമെന്നാണ് വിലയിരുത്തപ്പെടുന്നത്. കൂടുതൽ പ്രാദേശിക തൊഴിലവസരങ്ങൾ സൃഷ്ടിക്കപ്പെടും. ഇത് ഡിമാൻഡ് വർധിക്കാനും, ബിസിനസ് വികസനത്തിനും കാരണമാകും. റോഡ്, ഹോസ്പിറ്റാലിറ്റി, ഗതാഗതം, ആരോഗ്യം, വിദ്യാഭ്യാസം തുടങ്ങിയ മേഖലകളിലും ഇതിന്റെ പ്രതിഫലനങ്ങൾ ഉണ്ടാകും.
