അന്വേഷണം വാർത്തകൾ ലഭിക്കാന്‍ വാട്സാപ്പ് ഗ്രൂപ്പില്‍ ചേരൂ.വയറുനിറയെ ചോറുണ്ണാൻ ഒരു കിടിലൻ തീയൽ ഉണ്ടാക്കിയാലോ? വളരെ എളുപ്പത്തിൽ രുചികരമായി തന്നെ തയ്യാറാക്കാവുന്ന പാവയ്ക്ക തീയൽ റെസിപ്പി നോക്കാം.
ആവശ്യമായ ചേരുവകൾ
- നീളത്തിൽ അരിഞ്ഞ പാവയ്ക്ക – 2 കപ്പ്
- സവാള – 1 കപ്പ്
- പച്ചമുളക് – 2 എണ്ണം
- വെളുത്തുള്ളി – 2 എണ്ണം
- ഇഞ്ചി – 1 ടേബിൾസ്പൂൺ
- തേങ്ങാ – 2 കപ്പ്
- പുളി – 1 നാരങ്ങാവലുപ്പത്തിൽ
- മല്ലിപ്പൊടി – 1/2 ടീസ്പൂൺ
- മുളകുപൊടി – 1 ടീസ്പൂൺ
- കടുക് – 1/2 ടീസ്പൂൺ
- ചുവന്ന മുളക് – 2
- കറിവേപ്പില
- എണ്ണ – ആവശ്യത്തിന്
തയ്യാറാക്കുന്ന വിധം
അരിഞ്ഞ് വെച്ചിരിക്കുന്ന പാവയ്ക്ക ഒരു ചീനച്ചട്ടിയിൽ എണ്ണയൊഴിച്ചു നല്ലതുപോലെ വഴറ്റിയെടുക്കുക. ശേഷം അതേ എണ്ണയിൽ അരിഞ്ഞ് വെച്ചിരിക്കുന്ന ഉള്ളിയും ഇഞ്ചിയും വെളുത്തുള്ളിയും പച്ചമുളകും കറിവേപ്പിലയും പച്ചമണം മാറുന്നത് വരെ വഴറ്റുക.
അടുത്തതായി തേങ്ങാ വറുത്തെടുക്കാം. ഇതിനായി ഒരു ഫ്രൈയിങ് പാനിൽ തേങ്ങയും കറിവേപ്പിലയും ബ്രൗൺ നിറം ആകുന്നത് വരെ വറുക്കുക. അതിൽ മുളകുപൊടിയും മല്ലിപ്പൊടിയും ചേർത്ത് മൂപ്പിച്ചു തണുക്കുമ്പോൾ മിക്സിയിൽ എണ്ണത്തെളിയുന്നതുവരെ അരച്ചെടുക്കുക. ഒരു പാത്രത്തിൽ പുളിയും വെള്ളവുമെടുത്തു പുളി പിഴിഞ്ഞ് മാറ്റി വെയ്ക്കുക.
ഇനി ഒരു ചീന ചട്ടിയിൽ പാവയ്ക്ക വഴറ്റിയതും ഉള്ളിയും ഇഞ്ചിയും പച്ചമുളകും വെളുത്തുള്ളിയും കറിവേപ്പിലയും പുളിപിഴിഞ്ഞതും തേങ്ങാ അരച്ചതും ആവശ്യത്തിന് വെള്ളവും ഉപ്പും ചേർത്ത് തിളപ്പിയ്ക്കുക. ശേഷം അടച്ച് വെച്ച് ചെറിയ തീയിൽ വേവിക്കുക. എണ്ണതെളിഞ്ഞു കഴിഞ്ഞു തീ ഓഫ് ചെയ്യുക. ഒരു പാത്രത്തിൽ എണ്ണയൊഴിച്ചു കടുകും വറ്റൽമുളകും കറിവേപ്പിലയും ചേർത്ത് മൂപ്പിച്ചു തീയലിൽ ചേർക്കുക.
