അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കഴിഞ്ഞ ദിവസം നടി അനുശ്രീ ഉദ്ഘാടനെത്തിയ കടയുടെ നടുക്കെടുപ്പില്‍ സമ്മാനം ലഭിച്ചത് തനിക്കാണെന്ന് ഒരു വയോധികന്‍ സ്റ്റേജിലെത്തിയിരുന്നു. അബദ്ധം മനസിലായി തിരിച്ചു നടന്ന അദ്ദേഹത്തെ കണ്ട് അനുശ്രീയുടെ കണ്ണുകള്‍ നിറഞ്ഞ വീഡിയോ സോഷ്യല്‍ മീഡിയയില്‍ വൈറലായിരുന്നു. വീഡിയോയ്ക്ക് താഴെ മനുഷ്യത്വത്തിന് ഉദാഹരണമാണ് അനുശ്രീ എന്നായിരുന്നു ആളുകള്‍ കമന്റായി കുറിച്ചത്. ഇപ്പോഴിതാ ഈ സംഭവത്തില്‍ പ്രതികരിച്ചിരിക്കുകയാണ് നടി.
നടിയുടെ വാക്കുകള്‍…….
‘എല്ലാവരും വീഡിയോയില്‍ കണ്ട കാര്യം തന്നെയാണ് അന്ന് നടന്നത്. ഒരു ഉദ്ഘാടനത്തിന് പോയതാണ്. ലക്കി ഡ്രോ ഉണ്ടായിരുന്നു. ആ അങ്കിളിന്റെ ഡിജിറ്റിനോട് സാമ്യമായ നമ്പര്‍ ആണ് നറുക്കെടുത്തത്. അങ്കിള്‍ വിചാരിച്ചത് പുള്ളിക്കാരന്റെ നമ്പറാണെന്ന്. അതാണ് സ്റ്റേജിലേക്ക് വന്നത്. അതേകുറിച്ച് കുറേയൊന്നും പറയാനില്ല. ആരെങ്കിലും കാണാന്‍ വേണ്ടി ചെയ്ത കാര്യമല്ല അത്. സ്റ്റേജില്‍ വച്ച് വേണ്ട അകത്തുവച്ച് കൊടുക്കാം എന്നാണ് ഞാന്‍ പറഞ്ഞത്. പക്ഷേ അവിടെ ഓണ്‍ലൈന്‍ ചേട്ടന്മാരാണ് വീഡിയോ എടുത്തത്. യാദൃശ്ചികമായി സംഭവിച്ചതാണ്. പുള്ളിക്കാരനെ കണ്ടപ്പോള്‍ തന്നെ എനിക്ക് സങ്കടം തോന്നി’.
‘ഈ രണ്ട് ദിവസങ്ങളില്‍ എനിക്ക് ഒരുപാട് കോളും മെസേജുകളും വന്നിരുന്നു. ആ അങ്കിളിനെ കാണുമ്പോള്‍ തങ്ങള്‍ക്ക് തന്നെ സങ്കടം വരുന്നെന്ന് അവര്‍ പറയുന്നുണ്ട്. വീഡിയോയിലൂടെ നിങ്ങള്‍ക്ക് അത്രയും സങ്കടം വരുണ്ടെങ്കില്‍ നേരിട്ട് കണ്ട എനിക്ക് എന്തുമാത്രം സങ്കടം വന്നു കാണുമെന്ന് ഓര്‍ക്കണം.സമ്മാനം ഇല്ലെന്ന് അറിഞ്ഞ് മടങ്ങിപ്പോയപ്പോള്‍ എന്റെ അച്ഛനെ പോലെ തന്നെയാണ് എനിക്ക് തോന്നിയത്. അച്ഛന്‍, ഒരച്ഛന്റെ സങ്കടം. നെഞ്ചിടിക്കുന്നൊരു വേദനയായിരുന്നു. അപ്പോഴെനിക്ക് തോന്നിയ കാര്യം ഞാന്‍ ചെയ്തുവെന്നെ ഉള്ളൂ. ഞാന്‍ മാത്രമല്ല, ആ ഷോപ്പ് ഉടമയും അങ്കിളിനെ സഹായിച്ചു’.
‘രണ്ട് ദിവസത്തില്‍ ഞാന്‍ ചെയ്തത് നന്മയാണെന്ന് ആളുകള്‍ പറയുമ്പോള്‍ ഭയങ്കര സന്തോഷം തോന്നുന്നുണ്ട്. പോസിറ്റീവ് ആയിട്ടൊരു കാര്യം ചെയ്തപ്പോള്‍ നമ്മുടെ ആള്‍ക്കാരത് സ്വീകരിച്ചു. നല്ല കുട്ടി, നല്ല മോളാണെന്ന് പറഞ്ഞപ്പോള്‍ ഒത്തിരി സന്തോഷം. എനിക്ക് കിട്ടിയ വലിയൊരു ഭാഗ്യമായി ഞാനതിനെ കാണുന്നു. എന്റെ അച്ഛനെ ഞാന്‍ അവിടെ കണ്ടു. എന്റെ അച്ഛനായിരുന്നെങ്കിലത് എന്ന് ഞാന്‍ ചിന്തിച്ചു. ജനങ്ങള്‍ തന്ന സ്‌നേഹം വളരെ വലുതാണ്’.
