അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.സേവനങ്ങളില് വന് മാറ്റങ്ങള് പ്രഖ്യാപിച്ച് തപ്പാല് വകുപ്പ്. 2025 സെപ്റ്റംബര് 1 മുതല് പോസ്റ്റ് ഓഫീസിന്റെ ജനപ്രിയ സേവനങ്ങളായ രജിസ്ട്രേഡ് പോസ്റ്റും, സ്പീഡ് പോസ്റ്റും ഒന്നിക്കുന്നു എന്നതാണ് പ്രധാന മാറ്റം. അതായത് ഇനി മുതല് നിങ്ങള് അയയ്ക്കുന്ന ഏതൊരു രജിസ്ട്രേഡ് പോസ്റ്റും സ്പീഡ് പോസ്റ്റായി തന്നെ ലഭിക്കും. പ്രസ്തുത മാറ്റം രാജ്യത്തുടനീളം ബാധകമായിരിക്കുമെന്ന് അധികൃതര് വ്യക്തമാക്കിയിട്ടുണ്ട്.
തപാല് സേവനങ്ങള് ലളിതവും, കാലാനുസൃതമായി പരിഷ്കരിക്കുകയും ചെയ്യുന്നതിന്റെ ഭാഗമാണ് നടപടി. സ്പീഡ് പോസ്റ്റും, രജിസ്ട്രേഡ് പോലും ഫലത്തില് ഒരുപോലെ തന്നെയാണ് വകുപ്പ് കൈകാര്യം ചെയ്തുവരുന്നത്. ആ സാഹചര്യത്തില് സേവനങ്ങള് ലയിപ്പിക്കുന്നത് നടപടികള് സുഗമമാക്കും. ട്രാക്കിംഗ് സംവിധാനം കൂടുതല് മെച്ചപ്പെടുത്താനും, ഉപയോക്താക്കള്ക്കു മെച്ചപ്പെട്ട സേവനം ഉറപ്പാക്കാനും പുതിയ മെര്ജിംഗ് നടപടികള് വഴിവയ്ക്കുമെന്നാണ് ഇന്ത്യ പോസ്റ്റിന്റെ വിലയിരുത്തല്.
സ്പീഡ് പോസ്റ്റ് പേരു പോലെ തന്നെ വേഗത്തിലുള്ള ഡെലിവറിയിലാണ് ശ്രദ്ധ കേന്ദ്രീകരിക്കുന്നത്. അതേസമയം രജിസ്ട്രേഡ് പോസ്റ്റ് സുരക്ഷിതമായ ഡെലിവറിക്ക് പ്രധാന്യം നല്കുന്നു. പേര് രണ്ട് ആണെങ്കിലും നിലവില് തപാല് വകുപ്പ് ഈ രണ്ട് സേവനങ്ങളും ഒരുപോലെ തന്നെയാണ് കൈകാര്യം ചെയ്യുന്നത്. രണ്ടു സേവനങ്ങളും ഉപയോക്താക്കളിലേയ്ക്ക് എത്തുന്ന സമയത്തിലും വലിയ മാറ്റങ്ങളില്ല. ഈ സാഹചര്യത്തിലാണ് സേവനങ്ങള് ലയിപ്പിക്കാന് തീരുമാനമായത്
2025 സെപ്റ്റംബര് ഒന്ന് മുതല് രാജ്യത്തെ ഒരു പോസ്റ്റ് ഓഫീസില് നിന്ന് രജിസ്ട്രേഡ് പോസ്റ്റ് സേവനം ലഭ്യമാകില്ല. എല്ലാ ആഭ്യന്തര മെയിലുകളും സ്പീഡ് പോസ്റ്റ് രീതിയില് പരിഗണിക്കും. രജിസ്ട്രേഡ് പോസ്റ്റുകളില് ലഭ്യമായിരുന്ന ഡെലിവറി തെളിവ്, സ്വീകര്ത്താവിന്റെ ഒപ്പ് ആവശ്യകതകള്, സ്പീഡ് പോസ്റ്റില് മൂല്യവര്ദ്ധിത സവിശേഷതകളായി ലഭ്യമാക്കും. നിലവിലെ സ്പീഡ് പോസ്റ്റ് ട്രാക്കിംഗ് സേവനം വഴിയുള്ള തത്സമയം ട്രാക്ക് തുടരും.
50 ഗ്രാം വരെ ഭാരമുള്ള പാഴ്സലുകള്ക്ക് 15 രൂപയാകും ഡെലിവറി ചാര്ജ്. അതേസമയം 200 കിലോമീറ്ററിന് മുകളിലുള്ള പാഴ്സലുകള്ക്ക് 35 രൂപ ബാധകമാകും. ഇനി പാഴ്സലിന്റെ ഭാരം 51 ഗ്രാം മുതല് 200 ഗ്രാം വരെയാണെങ്കില് പ്രാദേശിക ഡെലിവറി ചാര്ജ് 25 രൂപയാകും. പ്രസ്തുത പാഴ്സലിന് 200 കിലോമീറ്റര് വരെ 35 രൂപയും, 201- 1000 കിലോമീറ്റര് വരെ 40 രൂപയും, 1001- 2000 കിലോമീറ്റര് വരെ 60 രൂപയും, 2000 കിലോമീറ്ററിന് മുകളില് 70 രൂപയും ഈടാക്കും.
പാഴ്സലിന്റെ ഭാരം 201 ഗ്രാം മുതല് 500 ഗ്രാം വരെ ആയാല് ലോക്കല് ചാര്ജ് 30 ആണ്. തുടര്ന്ന് 200 കിലോമീറ്റര് വരെ 50 രൂപ ഈടാക്കും. 201- 1000 കിലോമീറ്റര് വരെ 60 രൂപയും, 1001- 2000 കിലോമീറ്റര് വരെ 80 രൂപയും, 2000 കിലോമീറ്ററിന് മുകളില് 90 രൂപയും ആകും ഫീസ്. പാഴ്സല് 500 ഗ്രാമില് കൂടുതലാണെങ്കില് ലോക്കല് ചാര്ജ് 10 രൂപ വര്ധിക്കും. 200 കിലോമീറ്റര് വരെയുള്ള ഡെലിവറിക്ക് 15 രൂപ കൂടും. 201- 1000 കിലോമീറ്റര് വരെ 30 രൂപ അധികം നല്കണം. 1001- 2000 കിലോമീറ്റര് വരെ 40 രൂപയും, 2000 കിലോമീറ്ററില് കൂടുതലാഴെണങ്കില് അധികമായി 50 രൂപയും നല്കേണ്ടി വരും.
മുകളില് പറഞ്ഞ നിരക്കുകള്ക്കു പുറമേ നികുതികള് ബാധകമായിരിക്കുമെന്ന് ഓര്ക്കുക. ഇനി നിങ്ങള്ക്ക് ഡെലിവറി തെളിവ് വേണമെന്നുണ്ടെങ്കില് 10 രൂപ അധികമായി നല്കേണ്ടി വരും.
സേവനങ്ങള് ഒന്നിക്കുകയും, പുതിയ നിരക്കുകള് പ്രഖ്യാപിക്കപ്പെടുകയും ചെയ്തതോടെ ഡെലിവറി സമയം എങ്ങനെ ആയിരിക്കുമെന്ന ചോദ്യം സ്വാഭാവികമാണ്. ഇതിലും വകുപ്പ് വ്യക്തത വരുത്തിയിട്ടുണ്ട്. നിങ്ങളുടെ പാഴ്സലുകള് ലക്ഷ്യത്തിലെത്താന് എത്ര സമയമെടുക്കും എന്നറിയാം;
ലോക്കല്: 1- 2 ദിവസം
മെട്രോ മുതല് മെട്രോ വരെ: 1- 3 ദിവസം
സംസ്ഥാന തലസ്ഥാനത്ത് നിന്ന് തലസ്ഥാനത്തേക്ക്: 1- 4 ദിവസം
സംസ്ഥാനത്തിനുള്ളില്: 1- 4 ദിവസം
രാജ്യത്തിന്റെ മറ്റു ഭാഗങ്ങളില്: 4- 5 ദിവസം
മുകളില് പറഞ്ഞ സമയക്രമത്തിന് പുറമേ ബ്രാഞ്ച് ഓഫീസ് ഡെലിവറിക്ക് 1 ദിവസം അധികമായി എടുത്തേക്കാമെന്നു വകുപ്പ് വ്യക്തമാക്കുന്നു.
