അന്വേഷണം വാർത്തകൾ ലഭിക്കാന് വാട്സാപ്പ് ചാനലില് ചേരൂ.48 മണിക്കൂറിനുള്ളില് മുഖ്യ തിരഞ്ഞെടുപ്പ് കമ്മിഷണര് ഗ്യാനേഷ് കുമാര് രാജി വയ്ക്കണമെന്ന് കോക്രോച്ച് ജനത പാര്ട്ടിയുടെ അന്ത്യശാസനം. അല്ലാത്തപക്ഷം സി.ജെ.പി വീണ്ടും രാജ്യവ്യാപക സമരം ആരംഭിക്കുമെന്ന് അഭിജീത് ദിപ്കെ മുന്നറിയിപ്പു നല്കി. ന്യൂഡല്ഹിയില് വാര്ത്താ സമ്മേളനത്തില് സംസാരിക്കുകയായിരുന്നു ദിപ്കെ. വീണ്ടും സമരരംഗത്തേക്ക് ഇറങ്ങുമെന്ന് അഭിജീത് ദിപ്കെ നേരത്തെ ഇന്സ്റ്റഗ്രാമിലെ കുറിപ്പിലൂടെയും സൂചന നല്കിയിരുന്നു. മുഖ്യ തിരഞ്ഞെടുപ്പ് കമ്മിഷണര് ഗ്യാനേഷ് കുമാറിനെ വെറുക്കുന്നവര് ഒന്നിക്കണമെന്നായിരുന്നു ദിപ്കെയുടെ കുറിപ്പ്. തിരഞ്ഞെടുപ്പ് കമ്മിഷന് ജനങ്ങളുടെ വോട്ടുകള് മോഷ്ടിക്കുകയാണെന്ന് സിജെപി മുഖ്യ വക്താവ് സൗരവ് ദാസും ആരോപിച്ചു.
സ്കൂളുകള്, തൊഴിലില്ലായ്മ, അടിസ്ഥാന സൗകര്യങ്ങള്, പരീക്ഷകളിലെ ക്രമക്കേടുകള് എന്നിവയെക്കുറിച്ച് സംഘടന പ്രചാരണം തുടരും. എന്നാല്, ജനങ്ങള്ക്ക് വോട്ടവകാശം വിനിയോഗിക്കാന് കഴിയുന്നില്ലെങ്കില് ഇത്തരം ശ്രമങ്ങള് കൊണ്ട് പ്രയോജനമില്ലെന്നും വിഡിയോ സന്ദേശത്തില് ദാസ് പറഞ്ഞു. സമഗ്ര വോട്ടര്പട്ടിക പരിഷ്കരണത്തില് (എസ്ഐആര്) കേന്ദ്ര തിരഞ്ഞെടുപ്പ് കമ്മിഷനില് ഭിന്നത രൂക്ഷമെന്ന വിവരം വലിയ രാഷ്ട്രീയ വിവാദമായിരുന്നു. കമ്മിഷണര്മാരായ സുഖ്ബിര് സിങ് സന്ധുവും വിവേക് ജോഷിയും 10 മാസത്തിനിടെ 14 തവണ നടപടിക്രമങ്ങളിലെ പാളിച്ചകള് രേഖാമൂലം ചൂണ്ടിക്കാണിച്ചിരുന്നുവെന്ന വിവരമാണ് പുറത്തു വന്നത്.
ഇതോടെ മുഖ്യ തിരഞ്ഞെടുപ്പു കമ്മിഷണര് ഗ്യാനേഷ് കുമാറിനെതിരെ നടപടി ആവശ്യപ്പെട്ട് പ്രതിപക്ഷം രംഗത്തെത്തിയിരുന്നു. തിരഞ്ഞെടുപ്പ് കമ്മിഷന്റേതായി പുറത്തുവന്ന പരിഷ്കാരങ്ങളില് പലതും തങ്ങളുടെ അറിവോ സമ്മതമോ ഇല്ലാതെയുള്ളവയാണെന്നു സന്ധുവും വിവേക് ജോഷിയും ചൂണ്ടിക്കാട്ടിയതായി ഇംഗ്ലിഷ് ദിനപത്രമായ ഇന്ത്യന് എക്സ്പ്രസാണ് റിപ്പോര്ട്ട് ചെയ്തത്. വെവ്വേറെ കുറിപ്പുകളിലൂടെ ഇക്കാര്യം കാബിനറ്റ് സെക്രട്ടറിയെയും അറിയിച്ചു.
അഭിജീത് ദീപ്കെയുടെ വാക്കുകള്
‘മുഖ്യ തിരഞ്ഞെടുപ്പ് കമ്മിഷണര് ഗ്യാനേഷ് കുമാറാണ് ഏറ്റവും വലിയ ദേശവിരുദ്ധന്. ഇന്ത്യന് ജനാധിപത്യത്തിന്റെ ഏറ്റവും വലിയ ഭീഷണിയായ അദ്ദേഹം രാജി വയ്ക്കണം. 48 മണിക്കൂറിനുള്ളില് ഗ്യാനേഷ് കുമാര് രാജിവച്ചില്ലെങ്കില് കോക്രോച്ച് ജനത പാര്ട്ടി രാജ്യവ്യാപക പ്രതിഷേധം ആരംഭിക്കും. അദ്ദേഹം രാജി വയ്ക്കുന്നതുവരെ ഞങ്ങള് പിന്നോട്ടില്ല.’- ദിപ്കെ പറഞ്ഞു. ഗ്യാനേഷ് കുമാറിന്റെ രാജി കൂടാതെ , എസ്ഐആര് നടപടികള് മരവിപ്പിക്കുക, വരാനിരിക്കുന്ന തിരഞ്ഞെടുപ്പുകള് നിര്ത്തിവയ്ക്കുക എന്നീ ആവശ്യങ്ങളും സിജെപി ഉന്നയിച്ചിട്ടുണ്ട്.
അതേസമയം, ഇന്ത്യയുടെ മുഖ്യ തിരഞ്ഞെടുപ്പ് കമ്മിഷണര് ഗ്യാനേഷ് കുമാറിനെ പദവിയില് നിന്ന് നീക്കം ചെയ്യണമെന്ന് ആവശ്യപ്പെട്ട് 73 പ്രതിപക്ഷ എംപിമാര് രാജ്യസഭാ സെക്രട്ടറി ജനറലിനു നോട്ടിസ് നല്കി. കോണ്ഗ്രസ് നേതാവ് ജയറാം രമേശിന്റെ നേതൃത്വത്തിലാണ് നീക്കം. 2026 മാര്ച്ച് 15 ന് ശേഷം ഗ്യാനേഷ് കുമാറിന്റെ ഭാഗത്തുനിന്നുണ്ടായ വീഴ്ചകളും പെരുമാറ്റദൂഷ്യങ്ങളും ചൂണ്ടിക്കാട്ടിയാണ് ഭരണഘടനയുടെ 324 (5), 124 (4) അനുച്ഛേദങ്ങള് പ്രകാരം ഇംപീച്ച്മെന്റ് നടപടികള്ക്ക് സമാനമായ നോട്ടിസ് നല്കിയിരിക്കുന്നത്. 2026 മാര്ച്ച് 15ന് ശേഷമുള്ള പ്രവര്ത്തനങ്ങളും വീഴ്ചകളും ചൂണ്ടിക്കാട്ടി ഒമ്പത് കുറ്റാരോപണങ്ങളാണ് നോട്ടിസില് ഉള്പ്പെടുത്തിയിരിക്കുന്നത്.
ഇവ വ്യക്തമായി രേഖപ്പെടുത്തിയിട്ടുള്ളവയാണെന്നും തള്ളിക്കളയാനാവില്ലെന്നും പ്രതിപക്ഷം അവകാശപ്പെടുന്നു. ഗ്യാനേഷ് കുമാര് പദവിയില് തുടരുന്നത് ഭരണഘടനയോടുള്ള അവഹേളനമാണെന്നും നോട്ടിസില് പറയുന്നു. പ്രധാനമന്ത്രിയുടെയും കേന്ദ്ര ആഭ്യന്തര മന്ത്രിയുടെയും താല്പര്യങ്ങള്ക്കനുസരിച്ചാണ് അദ്ദേഹം പ്രവര്ത്തിക്കുന്നതെന്നും പ്രതിപക്ഷം ആരോപിച്ചു.
നേരത്തെ മാര്ച്ച് 12ന് പ്രതിപക്ഷം നല്കിയ സമാനമായ നോട്ടിസ് രാജ്യസഭാ അധ്യക്ഷനും ലോക്സഭാ സ്പീക്കറും തള്ളിയിരുന്നു. ഇതിന് പിന്നാലെയാണ് കൂടുതല് തെളിവുകളുമായി പുതിയ നോട്ടിസ് നല്കിയിരിക്കുന്നത്. കോണ്ഗ്രസ് നേതാവ് ജയറാം രമേശ്, തൃണമൂല് കോണ്ഗ്രസിന്റെ സാഗരിക ഘോഷ് എന്നിവരുടെ നേതൃത്വത്തില് 11 പ്രതിപക്ഷ പാര്ട്ടികളിലെ എംപിമാരാണ് നോട്ടിസില് ഒപ്പിട്ടിരിക്കുന്നത്. സുപ്രീം കോടതി ജഡ്ജിയെ നീക്കം ചെയ്യുന്നതിനു തുല്യമായ സങ്കീര്ണമായ നടപടിക്രമങ്ങളാണ് മുഖ്യ തിരഞ്ഞെടുപ്പ് കമ്മിഷണറെ നീക്കാനും പിന്തുടരേണ്ടത്.
