അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇന്ത്യയിലെ പ്രമുഖ വാണിജ്യ ബാങ്കാണ് ഫെഡറൽ ബാങ്ക് (Federal Bank). ബാങ്കിന്റെ ജൂൺ പാദഫലങ്ങൾ (Q1FY26) ഇന്ന് പ്രഖ്യാപിച്ചു. ആദ്യപാദത്തിൽ ഫെഡറൽ ബാങ്കിന്റെ മൊത്തം ബിസിനസ് 5,28,640.65 കോടി രൂപയായി ഉയർന്നു. 1,556.29 കോടി രൂപയാണ് പ്രവർത്തന ലാഭം. ഇതോടെ രാജ്യത്തെ ഏറ്റവും വലിയ ആറാമത്തെ സ്വകാര്യ ബാങ്ക് എന്ന സ്ഥാനം ഫെഡറൽ ബാങ്ക് നേടിയിരിക്കുകയാണ്. ആലുവ ആസ്ഥാനമായ ബാങ്ക് കേരളത്തിനും അഭിമാനമായി മാറി.
അതേ സമയം ഫെഡറൽ ബാങ്കിന്റെ Standalone അടിസ്ഥാനത്തിലുള്ള അറ്റാദായം ജൂൺ പാദത്തിൽ YoY അടിസ്ഥാനത്തിൽ 14.6% താഴ്ന്ന് 1,009.53 കോടി രൂപയിൽ നിന്ന് 861.75 രൂപയായി മാറി. സമാന കാലയളവിൽ ബാങ്കിന്റെ അറ്റ പലിശ വരുമാനം (NII) 2,291.98 കോടി രൂപയിൽ നിന്ന് 2,336.83 കോടി രൂപയായി വർധിച്ചിട്ടുണ്ട്. ബാങ്കിന്റെ മൊത്തം ബിസിനസ് 8.58% വര്‍ധിച്ച് 528640.65 കോടി രൂപയിലെത്തി. മുന്‍വര്‍ഷം ഇതേ പാദത്തിൽ 266064.69 കോടി രൂപയായിരുന്ന നിക്ഷേപം 8.03% വർദ്ധനയോടെ 287436.31 കോടി രൂപയായിട്ടുമുണ്ട്.
വായ്പാ വിതരണത്തിലും ബാങ്കിന് മികച്ച വളർച്ച കൈവരിക്കാൻ സാധിച്ചു. ആകെ വായ്പ മുന്‍ വര്‍ഷത്തെ 2,20,806.64 കോടി രൂപയില്‍ നിന്ന് 2,41,204.34 കോടി രൂപയായി ഉയർന്നിട്ടുണ്ട്. ഇത്തരത്തിൽ 9.24 ശതമാനമാണ് വളർച്ചാനിരക്ക്. റീടെയിൽ വായ്പകള്‍ 15.64% ഉയർച്ചയോടെ 81046.54 കോടി രൂപയായി. വാണിജ്യ ബാങ്കിങ് വായ്പകള്‍ 30.28% വര്‍ധിച്ച് 25028 കോടി രൂപയിലും, കോര്‍പറേറ്റ് വായ്പകള്‍ 4.47% ഉയർന്ന് 83680.44 കോടി രൂപയിലും, ബിസിനസ് ബാങ്കിങ് വായ്പകൾ 6.29% വർധനയോടെ 19193.95 കോടി രൂപയിലുമെത്തി.
മൊത്തവരുമാനം 7.64% വര്‍ധനയോടെ 7799.61 കോടി രൂപയിലെത്തി. 4669.66 കോടി രൂപയാണ് ബാങ്കിന്റെ മൊത്ത നിഷ്‌ക്രിയ ആസ്തി (Gross NPA). മൊത്തം വായ്പകളുടെ 1.91 ശതമാനമാണിത്. അറ്റനിഷ്‌ക്രിയ ആസ്തി (Net NPA) 1157.64 കോടി രൂപയാണ്.
മൊത്തം വായ്പകളുടെ 0.48 ശതമാനമാണിത്. 74.41 ശതമാനം ആണ് നീക്കിയിരുപ്പ് അനുപാതം. ഈ പാദത്തോടെ ബാങ്കിന്റെ അറ്റമൂല്യം 33994.08 കോടി രൂപയായി വര്‍ധിച്ചു. 16.03 ശതമാനമാണ് മൂലധന പര്യാപ്തതാ അനുപാതം. ഫെഡറൽ ബാങ്കിന് നിലവിൽ 1591ബാങ്കിംഗ് ഔട്ട് ലെറ്റുകളും 2093 എടിഎം / സിഡിഎമ്മുകളുമുണ്ട്.
വ്യത്യസ്ത മേഖലകളിലേക്ക് വ്യാപിച്ചുകൊണ്ടുള്ള തങ്ങളുടെ പ്രവർത്തനമാതൃകയ്ക്ക് ശക്തിപകരുന്നതാണ് ആദ്യപാദ ഫലങ്ങളെന്ന് ഫെഡറൽ ബാങ്ക് എം.ഡി & സി.ഇ.ഒ കെ.വി.എസ് മണിയൻ പറഞ്ഞു. പൊതുവെ വളർച്ച കുറയാറുള്ള ആദ്യപാദത്തിലും വാണിജ്യ ബാങ്കിംഗ്, ക്രെഡിറ്റ് കാർഡ് , ഗോൾഡ് ലോൺ എന്നീ മേഖലകളിൽ വളർച്ച കൈവരിക്കാൻ സാധിച്ചു. ചരിത്രത്തിലെ ഏറ്റവുമുയർന്ന ഫീ വരുമാനം നേടാനായി. കാസാ അനുപാതവും തുടർച്ചയായി മെച്ചപ്പെട്ടു. കാർഷിക – മൈക്രോ ഫിനാൻസ് വായ്പകളിൽ ഉണ്ടായ കുടിശിക, വായ്പാ ചെലവ് വർദ്ധിക്കാനും ആസ്തി ഗുണമേന്മയെ ബാധിക്കാനും കാരണമായിട്ടുണ്ട്. നിലവിലെ പ്രവണതകളുടെ അടിസ്ഥാനത്തിൽ, വരും ദിവസങ്ങളിൽ വായ്പാ തിരിച്ചടവുകൾ സുഗമമാവുമെന്നാണ് ഞങ്ങളുടെ പ്രതീക്ഷ. റിസ്കിലും ലാഭക്ഷമതയിലും അച്ചടക്കം പാലിച്ചുകൊണ്ട് രണ്ടാം പാദത്തിൽ മികച്ച വളർച്ച കൈവരിക്കാനാകുമെന്ന് തങ്ങൾക്ക് ആത്മവിശ്വാസമുണ്ടെന്നും അദ്ദേഹം പറഞ്ഞു.
ഫെഡറൽ ബാങ്ക് ഓഹരികൾ, റിസൾട്ടിന് മുന്നോടിയായി, 2025 ആഗസ്റ്റ് 1 വെള്ളിയാഴ്ച്ച എൻ.എസ്.ഇയിൽ ഓഹരി വില 196.06 രൂപയിലാണ് ക്ലോസിങ് നടത്തിയിരിക്കുന്നത്. ഓഹരിയുടെ 52 ആഴ്ച്ചകളിലെ ഉയർച്ച/താഴ്ച്ച എന്നിവ 172.66/220 രൂപ നിലവാരങ്ങളിലാണ്.
