അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ദുബായിൽ പുതിയ ഡ്രൈവിംഗ് ലൈസൻസുകൾക്കുള്ള ഫീസ് വർദ്ധിപ്പിച്ച് റോഡ്‌സ് ആൻഡ് ട്രാൻസ്‌പോർട്ട് അതോറിറ്റി. ആർടിഎ ഫീസ് 810 ദിർഹമായി പുതുക്കി നിശ്ചയിച്ചു. ഇതിനുപുറമെ, ലൈസൻസ് റദ്ദാക്കുകയോ കണ്ടുകെട്ടുകയോ ചെയ്തവർക്ക് പുതിയത് ലഭിക്കാൻ 3,000 ദിർഹം കൂടി നൽകേണ്ടിവരും.
അതേസമയം, ഇരുചക്ര വാഹനങ്ങൾക്കും നാലുചക്ര വാഹനങ്ങൾക്കും 100 ദിർഹവും ഹെവി വാഹനങ്ങൾക്ക് 200 ദിർഹവുമാണ് പെർമിറ്റ് ഫീസ്. ട്രാഫിക് ഫയൽ തുറക്കാൻ, ഡ്രൈവിംഗ് സ്കൂളുകൾക്ക് നൽകുന്ന ഫീസിനു പുറമേ 200 ദിർഹം കൂടി നൽകണം.
മാര്‍ഗനിര്‍ദ്ദേശങ്ങളടങ്ങിയ ഗൈഡിന് 50 ദിര്‍ഹവും ഈടാക്കും. ആര്‍ടിഎ അംഗീകാരം നല്‍കിയ സെന്ററുകള്‍ വഴി നേത്രപരിശോധന പൂര്‍ത്തിയാക്കാന്‍ കുറഞ്ഞ നിരക്ക് 140 ദിര്‍ഹവും ഉയര്‍ന്ന നിരക്ക് 180 ദിര്‍ഹവുമാണ്. അതോടൊപ്പം ഇന്നവേഷന്‍ ആന്‍ഡ് നോളജ് എന്ന പേരില്‍ 20 ദിര്‍ഹവും നല്‍കണം.
21 വയസ്സ് തികയാത്തവര്‍ക്ക് ഡ്രൈവിങ് ലൈസന്‍സിനുള്ള ഫീസ് 100 ദിര്‍ഹവും 21 വയസിന് മുകളിലുള്ളവര്‍ക്ക് 300 ദിര്‍ഹവുമാണ് നൽകേണ്ടത്. ഇതിനു പുറമെ, നിലവിലുള്ള ഓട്ടമാറ്റിക് ഗിയര്‍ ഡ്രൈവിംഗ് ലൈസന്‍സ് സാധാരണ ഗിയര്‍ ലൈസന്‍സാക്കി മാറ്റാന്‍ 220 ദിര്‍ഹം നല്‍കേണ്ടി വരും.
നിലവിലുള്ള ലൈസന്‍സില്‍ പുതിയ ലൈസന്‍സ് ചേര്‍ക്കുന്നതിന് 220 ദിര്‍ഹമാണ് ഫീസ് വരുന്നത്. റോഡ് ടെസ്റ്റ് കഴിഞ്ഞ് ഒരു വര്‍ഷം പിന്നിട്ടിട്ടും ലൈസന്‍സ് ലഭിക്കാത്തവര്‍ 200 ദിര്‍ഹം നല്‍കി പുതിയ ലേണിങ് ഫയല്‍ തുറക്കണം. ഇതിനൊപ്പം മറ്റ് എല്ലാം ഫീസുകളും നല്‍കേണ്ടി വരും.
ഡ്രൈവിംഗ് ലൈസന്‍സ് റദ്ദാക്കുകയോ പിടിച്ചെടുക്കുകയോ ചെയ്തവര്‍ക്ക് പുതിയ ലൈസന്‍സിന് 200 ദിര്‍ഹം ടെസ്റ്റ് ഫീസും നല്‍കണം. ഫയല്‍ ഓപണ്‍ 200 ദിര്‍ഹം, അപേക്ഷ ഫോം 100 ദിര്‍ഹം എന്നീ ഫീസുകളും ഈടാക്കുമെന്നും ദുബായ് റോഡ്‌സ് ആന്റ് ട്രാന്‍സ്‌പോര്‍ട്ട് അതോറിറ്റി വ്യക്തമാക്കിയിട്ടുണ്ട്.
