അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഗാസ സിറ്റി പിടിച്ചെടുക്കാനുള്ള ഇസ്രായേലിന്റെ സുരക്ഷാ മന്ത്രിസഭ അംഗീകാരം വലിയ രീതിയിലുള്ള ചര്‍ച്ചകള്‍ക്കാണ് വഴിവെച്ചിരിക്കുന്നത്. ഗാസയില്‍ നടന്നുകൊണ്ടിരിക്കുന്ന യുദ്ധത്തിലെ പ്രധാനവും വിവാദപരവുമായ ഒരു ചുവടുവയ്പ്പായ ഗാസ സിറ്റി ‘അധിനിവേശം’ ചെയ്യാനുള്ള പദ്ധതിയായി ഇതിനെ വിലയിരുത്തപ്പെടുന്നു.
ഗാസ മുനമ്പിന്റെ വടക്കന്‍ ഭാഗത്ത് സ്ഥിതി ചെയ്യുന്ന ഈ നഗരം യുദ്ധത്തിന് മുമ്പ് ഏറ്റവും ജനസാന്ദ്രതയുള്ള പ്രദേശമായിരുന്നു, ദശലക്ഷക്കണക്കിന് പലസ്തീനികള്‍ ഇവിടെ താമസിച്ചിരുന്നു. ഇസ്രായേലിന്റെ നീക്കം ‘വലിയ തോതിലുള്ള നിര്‍ബന്ധിത കുടിയിറക്കലിനും’ ‘കൂടുതല്‍ കൊലപാതകങ്ങള്‍ക്കും’ കാരണമാകുമെന്ന് ഐക്യരാഷ്ട്രസഭ മുന്നറിയിപ്പ് നല്‍കിയിട്ടുണ്ട്, അതേസമയം ഹമാസ് ‘ശക്തമായ ചെറുത്തുനില്‍പ്പ്’ നടത്തുമെന്ന് പ്രതിജ്ഞയെടുത്തു. ലോകമെമ്പാടും നിന്ന്, പ്രത്യേകിച്ച് മുസ്ലീം രാജ്യങ്ങള്‍, ഈ തീരുമാനത്തിനെതിരെ പ്രതികരണങ്ങള്‍ വരുന്നുണ്ട്, മാനുഷിക പ്രതിസന്ധിയെ കൂടുതല്‍ ആഴത്തിലാക്കുന്ന ഒരു ചുവടുവയ്പ്പാണിത് എന്ന് അവര്‍ വിശേഷിപ്പിച്ചു.
സൗദി അറേബ്യ, ഖത്തര്‍, കുവൈറ്റ്, തുര്‍ക്കി, ഓര്‍ഗനൈസേഷന്‍ ഓഫ് ഇസ്ലാമിക് കോഓപ്പറേഷന്‍ (ഒഐസി) എന്നിവയുള്‍പ്പെടെ നിരവധി രാജ്യങ്ങള്‍ ഇതിനെ അന്താരാഷ്ട്ര നിയമങ്ങളുടെ ലംഘനമാണെന്നും ദ്വിരാഷ്ട്ര പരിഹാരത്തിന് തടസ്സമാണെന്നും പലസ്തീന്‍ ജനതയുടെ അവകാശങ്ങള്‍ക്ക് നേരെയുള്ള നേരിട്ടുള്ള ആക്രമണമാണെന്നും വിശേഷിപ്പിച്ചതായി അന്താരാഷ്ട്ര മാധ്യമങ്ങള്‍ റിപ്പോര്‍ട്ട് ചെയ്തു.
സൗദി അറേബ്യ
ഇസ്രായേലിന്റെ തീരുമാനത്തെ സൗദി അറേബ്യ ശക്തമായി അപലപിച്ചു. ഗാസയില്‍ ക്ഷാമം വര്‍ദ്ധിപ്പിക്കുമെന്നും പലസ്തീന്‍ സിവിലിയന്മാര്‍ക്കെതിരായ വംശീയ ഉന്മൂലന നയത്തിന്റെ ഭാഗമാണിതെന്നും അവര്‍ പറഞ്ഞു. ‘അന്താരാഷ്ട്ര സമൂഹവും സുരക്ഷാ കൗണ്‍സിലും ഇസ്രായേലി ആക്രമണങ്ങളും നിയമലംഘനങ്ങളും ഉടനടി നിര്‍ത്തിയില്ലെങ്കില്‍, അത് അന്താരാഷ്ട്ര ക്രമത്തിന്റെയും നിയമസാധുതയുടെയും അടിത്തറയെ തകര്‍ക്കുകയും, പ്രാദേശിക, അന്തര്‍ദേശീയ സമാധാനത്തിന് ഭീഷണിയാകുകയും, വംശഹത്യയും നിര്‍ബന്ധിത നാടുകടത്തലും പ്രോത്സാഹിപ്പിക്കുന്ന സാഹചര്യങ്ങള്‍ സൃഷ്ടിക്കുകയും ചെയ്യും,’ എന്ന് സൗദി അറേബ്യന്‍ വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ പറഞ്ഞു .’ഇസ്രായേലി കുറ്റകൃത്യങ്ങള്‍ തടയുന്നതിനും പലസ്തീന്‍ ജനത നേരിടുന്ന മാനുഷിക പ്രതിസന്ധി അവസാനിപ്പിക്കുന്നതിനും ലോകം മൂര്‍ത്തവും ശക്തവും ദൃഢവുമായ നടപടികള്‍ സ്വീകരിക്കണം’ എന്നും സൗദി അറേബ്യ പറഞ്ഞു.
ഖത്തര്‍
ഇസ്രായേലിന്റെ പദ്ധതിയെ ഖത്തര്‍ അപലപിച്ചു. ഈ തീരുമാനം മാനുഷിക പ്രതിസന്ധി കൂടുതല്‍ വഷളാക്കുകയും വെടിനിര്‍ത്തല്‍ ശ്രമങ്ങളെ ദുര്‍ബലപ്പെടുത്തുകയും ചെയ്യുമെന്ന് ഖത്തര്‍ വിദേശകാര്യ മന്ത്രാലയം അറിയിച്ചു. ‘യുദ്ധത്തിനുള്ള ആയുധമായി ഭക്ഷണം ഉപയോഗിക്കുന്നതിലൂടെയും സാധാരണക്കാരെ മനഃപൂര്‍വ്വം പട്ടിണിയിലാക്കുന്നതിലൂടെയും ഉള്‍പ്പെടെ, അന്താരാഷ്ട്ര മാനുഷിക നിയമങ്ങളും പ്രമേയങ്ങളും ഇസ്രായേല്‍ ലംഘിക്കുന്നത് തുടരുന്നു,’ പ്രസ്താവനയില്‍ പറയുന്നു.
കുവൈറ്റ്
ഇസ്രായേല്‍ പദ്ധതി അന്താരാഷ്ട്ര നിയമങ്ങളുടെയും മാനുഷിക നിയമങ്ങളുടെയും ലംഘനമാണെന്ന് കുവൈറ്റ് വിശേഷിപ്പിച്ചു. ദ്വിരാഷ്ട്ര പരിഹാരത്തിനുള്ള സാധ്യതയെ ഇത് ദുര്‍ബലപ്പെടുത്തുന്നുവെന്ന് അവര്‍ പറഞ്ഞു.
‘ഈ മനുഷ്യത്വരഹിതമായ പ്രവര്‍ത്തനങ്ങള്‍ തടയുന്നതിനും, ഗാസ മുനമ്പില്‍ മതിയായതും ഉടനടിയുള്ളതുമായ സഹായം എത്തിക്കുന്നതിനായി അതിര്‍ത്തി വഴികള്‍ തുറക്കുന്നതിനും, ഇസ്രായേലിന്റെ പട്ടിണിയും വംശീയ ഉന്മൂലനവും അവസാനിപ്പിക്കുന്നതിനുമുള്ള ഉത്തരവാദിത്തങ്ങള്‍ സുരക്ഷാ കൗണ്‍സിലും അന്താരാഷ്ട്ര സമൂഹവും നിറവേറ്റണം,’ കുവൈറ്റ് വിദേശകാര്യ മന്ത്രാലയം പുറത്തിറക്കിയ പ്രസ്താവനയില്‍ പറഞ്ഞു .
ഓര്‍ഗനൈസേഷന്‍ ഓഫ് ഇസ്ലാമിക് കോഓപ്പറേഷന്‍ (OIC)
ചിത്രത്തിന്റെ അടിക്കുറിപ്പ്,ഇസ്രായേല്‍ തീരുമാനത്തിനെതിരെ മുസ്ലീം രാജ്യങ്ങളുടെ സംഘടനയും (ഒഐസി) പ്രസ്താവന ഇറക്കിയിട്ടുണ്ട്.
ഗാസ മുനമ്പ് വീണ്ടും കൈവശപ്പെടുത്താനും ധാരാളം പലസ്തീനികളെ കുടിയിറക്കാനുമുള്ള പദ്ധതികള്‍ നിലവിലുള്ള മാനുഷിക സാഹചര്യം കൂടുതല്‍ വഷളാക്കുമെന്ന് ഓര്‍ഗനൈസേഷന്‍ ഓഫ് ഇസ്ലാമിക് കോഓപ്പറേഷന്‍ പറഞ്ഞു .
‘ശാശ്വതവും സമഗ്രവുമായ വെടിനിര്‍ത്തല്‍ നടപ്പിലാക്കുന്നതിന് ഐക്യരാഷ്ട്രസഭ സുരക്ഷാ കൗണ്‍സില്‍ അടിയന്തരവും കൃത്യവുമായ നടപടികള്‍ സ്വീകരിക്കണം, ഗാസ മുനമ്പിന്റെ എല്ലാ ഭാഗങ്ങളിലും മാനുഷിക സഹായങ്ങളും അവശ്യവസ്തുക്കളും തടസ്സമില്ലാതെ വിതരണം ചെയ്യുന്നുണ്ടെന്ന് ഉറപ്പാക്കുകയും പലസ്തീന്‍ ജനതയ്ക്ക് ഫലപ്രദമായ അന്താരാഷ്ട്ര സംരക്ഷണം നല്‍കുകയും വേണം,’ പ്രസ്താവന ആവശ്യപ്പെട്ടു. ‘1967 മുതല്‍ കൈവശപ്പെടുത്തിയ പ്രദേശങ്ങളില്‍ പലസ്തീന്‍ ജനതയ്ക്ക് പരമാധികാരം വീണ്ടെടുക്കാനും ജറുസലേം തലസ്ഥാനമായി സ്വതന്ത്ര രാഷ്ട്രമായി മാറാനും കഴിയുന്നതിന്, ഇസ്രായേലി അധിനിവേശം അവസാനിപ്പിക്കാന്‍ അന്താരാഷ്ട്ര സമൂഹം ആവശ്യമായ നടപടികള്‍ സ്വീകരിക്കണം,’ OIC പറഞ്ഞു.
തുര്‍ക്കി
ഇസ്രയേലിന്റെ ഉദ്ദേശ്യശുദ്ധിയെ ചോദ്യം ചെയ്ത തുര്‍ക്കി വിദേശകാര്യ മന്ത്രാലയം , തീരുമാനം പലസ്തീനികളുടെ അവകാശങ്ങള്‍ക്ക് എതിരാണെന്ന് പറഞ്ഞു. ‘പലസ്തീനികളെ അവരുടെ സ്വന്തം മണ്ണില്‍ നിന്ന് ബലമായി പുറത്താക്കുക എന്നതാണ് ഇസ്രായേലിന്റെ ലക്ഷ്യം,’ പ്രസ്താവനയില്‍ പറയുന്നു. ഗാസയിലെ യുദ്ധം ഉടന്‍ അവസാനിപ്പിക്കണമെന്ന് ഐക്യരാഷ്ട്രസഭ മനുഷ്യാവകാശ മേധാവി വോള്‍ക്കര്‍ ടര്‍ക്ക് അഭ്യര്‍ത്ഥിച്ചു, സ്ഥിതി കൂടുതല്‍ വഷളായാല്‍ അത് ഗുരുതരമായ പ്രത്യാഘാതങ്ങള്‍ ഉണ്ടാക്കുമെന്ന് പറഞ്ഞു. ‘ഇത് സംഭവിച്ചാല്‍, വലിയ തോതിലുള്ള നിര്‍ബന്ധിത കുടിയിറക്കവും, കൊലപാതകങ്ങളും, അനാവശ്യമായ നാശവും ഉണ്ടാകാം,’ അദ്ദേഹം പറഞ്ഞു.
ഇസ്രായേലിന്റെ പദ്ധതി എന്താണ്?
ഇസ്രായേല്‍ പ്രതിരോധ സേന (ഐഡിഎഫ്) ‘ഗാസ നഗരത്തിന്റെ നിയന്ത്രണം ഏറ്റെടുക്കാന്‍ തയ്യാറെടുക്കുമെന്ന്’ ഇസ്രായേല്‍ പ്രധാനമന്ത്രിയുടെ ഓഫീസില്‍ നിന്നുള്ള ഒരു പ്രസ്താവനയില്‍ പറഞ്ഞു. യുദ്ധം അവസാനിപ്പിക്കുന്നതിനുള്ള അഞ്ച് ‘തത്ത്വങ്ങള്‍’ പ്രസ്താവനയില്‍ വിശദീകരിച്ചു. മന്ത്രിസഭാ യോഗത്തിന് മുമ്പ്, ഇസ്രായേല്‍ മുഴുവന്‍ ഗാസയും നിയന്ത്രിക്കണമെന്ന് നെതന്യാഹു പറഞ്ഞിരുന്നു, എന്നാല്‍ പുതിയ പദ്ധതിയില്‍ ഗാസ നഗരത്തെക്കുറിച്ച് മാത്രമേ പരാമര്‍ശിക്കുന്നുള്ളൂ. ഗാസ നഗരത്തിന്റെ നിയന്ത്രണം ഏറ്റെടുക്കുന്നത് ഗാസ മുനമ്പിന്റെ പൂര്‍ണ്ണമായ ഏറ്റെടുക്കലിലേക്കുള്ള ആദ്യപടിയാണെന്ന് ബിബിസി റിപ്പോര്‍ട്ട് ചെയ്തു. ഹമാസ് ഈ പദ്ധതിയെ ‘ഒരു പുതിയ യുദ്ധ കുറ്റകൃത്യം’ എന്ന് വിളിക്കുകയും ‘ഈ ക്രിമിനല്‍ നടപടിക്ക് വലിയ വില നല്‍കേണ്ടിവരുമെന്നും ഈ യാത്ര എളുപ്പമാകില്ലെന്നും’ മുന്നറിയിപ്പ് നല്‍കി.
അന്താരാഷ്ട്ര വിമര്‍ശനങ്ങള്‍ ഇസ്രായേല്‍ തള്ളിക്കളഞ്ഞു
അതേസമയം, അന്താരാഷ്ട്ര തലത്തില്‍ നിന്നുള്ള വിമര്‍ശനങ്ങള്‍ ഇസ്രായേല്‍ തള്ളിക്കളഞ്ഞു. ഇസ്രായേലിനെ അപലപിക്കുകയും ഉപരോധങ്ങള്‍ ഏര്‍പ്പെടുത്തുമെന്ന് ഭീഷണിപ്പെടുത്തുകയും ചെയ്യുന്ന രാജ്യങ്ങള്‍ക്ക് ‘നമ്മുടെ മനോവീര്യം ദുര്‍ബലപ്പെടുത്താന്‍ കഴിയില്ല’ എന്ന് പ്രതിരോധ മന്ത്രി ഇസ്രായേല്‍ കാറ്റ്‌സ് പറഞ്ഞു. ‘നമ്മുടെ ശത്രുക്കള്‍ നമ്മളെ കൂടുതല്‍ ശക്തരാക്കി മാറ്റും, അത് അവര്‍ക്ക് കനത്ത പ്രഹരമേല്‍പ്പിക്കും’ എന്ന് അദ്ദേഹം പറഞ്ഞു. മുസ്ലീം രാജ്യങ്ങള്‍ക്ക് പുറമേ ബ്രിട്ടന്‍, ഫ്രാന്‍സ്, കാനഡ എന്നിവരും പദ്ധതിയെ അപലപിച്ചു, അതേസമയം ജര്‍മ്മനി ഇസ്രായേലിലേക്കുള്ള സൈനിക കയറ്റുമതി നിര്‍ത്തിവച്ചു.
