അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.2026 ലെ ഫിഫ ലോകകപ്പ് കാണാൻ ഫുട്ബോൾ പ്രേമികളെ ക്ഷണിച്ച് ഖത്തറിലെ യു എസ് എംബസി. ഫുട്ബോൾ മത്സരം നേരിട്ട് കാണാൻ ആഗ്രഹിക്കുന്നവർക്ക് വിസയ്ക്ക് അപേക്ഷിക്കാം. ഖത്തർ പൗരന്മാരും താമസക്കാരും രണ്ട് വ്യത്യസ്ത രീതികളിൽ യുഎസ് വിസയ്ക്ക് അപേക്ഷിക്കണം. ഖത്തരി പൗരന്മാർ യാത്രയ്ക്ക് 72 മണിക്കൂർ മുമ്പെങ്കിലും ഇലക്ട്രോണിക് സിസ്റ്റം ഫോർ ട്രാവൽ ഓതറൈസേഷന് (ESTA) അപേക്ഷിക്കണമെന്ന് നിർദ്ദേശിക്കുന്നു.
വിസ വൈവർ പ്രോഗ്രാമിലുള്ള 41 രാഷ്ട്രങ്ങളിലെ പൗരന്മാർക്ക് മാത്രമേ ഇ.എസ്.ടി.എ വഴി യു.എസ് വിസക്ക് അപേക്ഷിക്കാൻ കഴിയുകയുള്ളൂ. ഓതറൈസേഷൻ ഉള്ള രാജ്യങ്ങളിലെ പൗരന്മാർക്ക് ബിസിനസ് ആവശ്യാർത്ഥമോ വിനോദ സഞ്ചാരത്തിന്റെ ഭാഗമായോ 90 ദിവസം വരെ അമേരിക്കയിലേക്ക് യാത്ര ചെയ്യാൻ അനുമതി ലഭിക്കും.
ഖത്തറിൽ താമസിക്കുന്ന വിസ വൈവർ പ്രോഗ്രാമിൽ ഉൾപ്പെടാത്ത രാജ്യക്കാർ സാധാരണഗതിയിലുള്ള സന്ദർശക വിസാ അപേക്ഷയാണ് നൽകേണ്ടത്. ഇവർ മുൻകൂട്ടിത്തന്നെ യാത്രക്കായി തയാറെടുക്കണം.
യു.എസ് വിസ ആവശ്യമുള്ളവർ കാലതാമസം ഒഴിവാക്കാൻ എത്രയും പെട്ടെന്ന് തന്നെ അപേക്ഷിക്കണമെന്ന് എംബസി അറിയിച്ചു. 2026 ഫിഫ ലോകകപ്പിന് അമേരിക്ക, കാനഡ, മെക്സിക്കോ എന്നീ രാജ്യങ്ങൾ സംയുക്തമായി ആതിഥേയത്വം വഹിക്കുന്നു. മിക്ക മത്സരങ്ങളും യുഎസിലാണ് നടക്കുന്നത്.
