അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇന്ത്യന്‍ വിമാനങ്ങള്‍ക്ക് പാകിസ്ഥാനിലൂടെയുള്ള വ്യോമപാത അടച്ചതിനെ തുടര്‍ന്ന് പാകിസ്ഥാന് എയര്‍പോര്‍ട്ട് അതോറിറ്റിക്ക് കോടികളുടെ നഷ്ടമെന്ന് റിപ്പോര്‍ട്ട്. ഏപ്രിൽ 24 മുതൽ ജൂൺ 30 വരെയാണ് ഇന്ത്യൻ വിമാനങ്ങൾക്ക് വ്യോമപാത നിഷേധിച്ചത്. ഇന്ത്യൻ വിമാനങ്ങൾക്ക് വ്യോമാതിർത്തി അടച്ചതിനാൽ രണ്ട് മാസത്തിനുള്ളിൽ ഏകദേശം 127 കോടി ഇന്ത്യൻ രൂപയുടെ (4.10 ബില്യൺ പാകിസ്ഥാൻ രൂപ) നഷ്ടം സംഭവിച്ചതായി പാകിസ്ഥാൻ പ്രതിരോധ മന്ത്രാലയം വെളിപ്പെടുത്തി.
വെള്ളിയാഴ്ച പാകിസ്താന്‍ പ്രതിരോധ മന്ത്രാലയം ദേശീയ അസംബ്ലിയില്‍ അവതരിപ്പിച്ച റിപ്പോര്‍ട്ടിലാണ് ഇതുസംബന്ധിച്ച വിവരങ്ങള്‍ പുറത്തുവിട്ടിട്ടുള്ളത്. ഏപ്രിൽ 23 ന് ഇന്ത്യ സിന്ധു നദീജല കരാർ താൽക്കാലികമായി നിർത്തിവച്ചതിന് ഒരു ദിവസത്തിന് ശേഷം, ഇന്ത്യൻ വിമാനങ്ങൾക്ക് പാകിസ്ഥാൻ വ്യോമാതിർത്തി അടച്ചു.
2025 ഏപ്രിൽ 24 മുതൽ ജൂൺ 30 വരെയുള്ള കാലയളവിൽ ഈ നീക്കം പാകിസ്ഥാന് വലിയ സാമ്പത്തിക നഷ്ടമുണ്ടാക്കി. ഈ കാലയളവിൽ ഏകദേശം 100-150 ഇന്ത്യൻ വിമാനങ്ങളെ ഇത് ബാധിച്ചു. സാമ്പത്തിക നഷ്ടം സംഭവിച്ചിട്ടുണ്ടെങ്കിലും രാജ്യത്തിന്റെ സുരക്ഷയാണ് പരമപ്രധാനമെന്ന് പ്രതിരോധ മന്ത്രാലയം പറഞ്ഞു. ഈ നഷ്ടം ഉണ്ടായിരുന്നിട്ടും, പാകിസ്ഥാൻ എയർപോർട്ട് അതോറിറ്റിയുടെ മൊത്തം വരുമാനം 2019 ലെ 5,08,000 ഡോളറിൽ നിന്ന് 2025 ൽ 7,60,000 ഡോളറായി വർദ്ധിച്ചു.
ഏപ്രിൽ 22-ന് പഹൽഗാമിൽ നടന്ന ഭീകരാക്രമണത്തിന് ശേഷമാണ് ഇന്ത്യയും പാകിസ്ഥാനും തമ്മിലുള്ള സംഘർഷം ആരംഭിച്ചത്, അതിന്റെ ഉത്തരവാദിത്തം പാകിസ്ഥാൻ ആസ്ഥാനമായുള്ള ഭീകര സംഘടനയായ ടിആർഎഫ് ഏറ്റെടുത്തു. ഇതിനുശേഷം, ഓപ്പറേഷൻ സിന്ദൂരിന് മുമ്പ് ഇന്ത്യ പാകിസ്ഥാനുമായുള്ള നയതന്ത്ര ബന്ധം കുറയ്ക്കുകയും സിന്ധു നദീജല ഉടമ്പടി താൽക്കാലികമായി നിർത്തിവയ്ക്കുകയും വ്യാപാര നിരോധനം ഏർപ്പെടുത്തുകയും ചെയ്തു.
ഇതിനു പിന്നാലെ, പ്രതികാരമായി പാകിസ്ഥാൻ ഇന്ത്യൻ വിമാനങ്ങൾക്ക് വ്യോമാതിർത്തി അടച്ചു. ഇന്ത്യൻ വിമാനങ്ങൾക്ക് പാകിസ്ഥാന്റെ വ്യോമാതിർത്തി ഇപ്പോഴും അടച്ചിട്ടിരിക്കുകയാണ്, ഓഗസ്റ്റ് അവസാന ആഴ്ച വരെ അങ്ങനെ തന്നെ തുടരാനാണ് സാധ്യത. പാകിസ്ഥാന് വിമാനങ്ങള്‍ക്ക് ആഭ്യന്തര വ്യോമാതിര്‍ത്തിയില്‍ പ്രവേശിക്കുന്നതിനുള്ള വിലക്ക് ഇന്ത്യയും ഏർപ്പെടുത്തിയിട്ടുണ്ട്.
