അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കൊച്ചി: കേരള ഫിലിം പ്രൊഡ്യൂസേഴ്സ് അസോസിയേഷൻ ഭരണസമിതിയിലേക്കുള്ള തെരഞ്ഞെടുപ്പ് ഇന്ന് നടക്കും. എറണാകുളം ഹോട്ടൽ അബാദ്‌ പ്ലാസയിലാണ് തെരഞ്ഞെടുപ്പ്. 21 അംഗ ഭരണസമിതിയിലേക്ക്‌ 39 സ്ഥാനാർഥികളാണുള്ളത്‌. ബി.രാകേഷും സജി നന്ത്യാട്ടുമാണ് പ്രസിഡന്‍റ് സ്ഥാനത്തേക്ക് മത്സരിക്കുക. സാന്ദ്ര തോമസ് എക്സിക്യൂട്ടീവ് കമ്മിറ്റിയിലേക്ക് മത്സരിക്കും. രാവിലെ 10.30ന് ജനറൽ ബോഡി യോഗത്തിനു ശേഷം വോട്ടിങ് ആരംഭിച്ച് വൈകിട്ടോടെ ഫലം പ്രഖ്യാപിക്കും. പകൽ രണ്ടുമുതൽ 5.30 വരെയാണ്‌ വോട്ടെടുപ്പ്. 312 അംഗങ്ങളാണ്‌ അസോസിയേഷനിലുള്ളത്.
വലിയ വിവാദങ്ങൾക്കും നാടകീയ സംഭവങ്ങൾക്കും ശേഷമാണ് പ്രൊഡ്യൂസേഴ്സ് അസോസിയേഷൻ തെരഞ്ഞെടുപ്പിലേക്ക് നീങ്ങുന്നത്. സംഘടനയിലെ മുൻ ഭാരവാഹികൾക്കെതിരെ ലൈംഗികാധിക്ഷേപ പരാതികൾ അടക്കം ഉന്നയിച്ച നിർമ്മാതാവ് സാന്ദ്ര തോമസ് മത്സരിക്കാൻ ഒരുങ്ങിയതോടെയാണ് തെരഞ്ഞെടുപ്പിനെ ചൊല്ലിയുള്ള വിവാദങ്ങളുടെ തുടക്കം. പ്രൊഡ്യൂസേഴ്സ് അസോസിയേഷൻ പ്രസിഡൻറ് സ്ഥാനത്തേക്ക് മത്സരിക്കുന്നതിനായി സാന്ദ്ര സമർപ്പിച്ച നാമനിർദേശ പത്രിക വരണാധികാരി തള്ളിയിരുന്നു. ബൈലോ പ്രകാരം നിർദേശിക്കുന്ന യോഗ്യതയില്ലെന്ന കാരണം ചൂണ്ടിക്കാട്ടിയാണ് വരണാധികാരി സാന്ദ്രയുടെ പത്രിക തള്ളിയത്. സൂക്ഷ്മ പരിശോധനക്കിടെ സാന്ദ്ര അത് ചോദ്യം ചെയ്തതോടെ രംഗം വലിയ ബഹളത്തിലും തർക്കത്തിലും കലാശിച്ചു.
