അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.അപ്പത്തിനും ചപ്പാത്തിക്കുമെല്ലാം കൂടെ കഴിക്കാൻ എളുപ്പത്തിലൊരു മുട്ട കറി ഉണ്ടാക്കിയാലോ? അതും നല്ല നാടൻ രീതിയിൽ വറുത്തരച്ച മുട്ട കറി. റെസിപ്പി നോക്കാം.
ആവശ്യമായ ചേരുവകൾ
- മുട്ട – 6
- സവാള – 2
- തക്കാളി -2
- ചെറിയ ഉള്ളി- 3
- വെളുത്തുള്ളി – 6
- ഇഞ്ചി – ഒരു കഷ്ണം
- നാളികേരം -1 കപ്പ്
- മുളകുപൊടി – ഒരു ടീസ്പൂണ്‍
- മല്ലിപ്പൊടി – ഒരു ടീസ്പൂണ്‍
- മഞ്ഞപൊടി – കാല്‍ ടീസ്പൂണ്‍
- കുരുമുളക് പൊടി – ഒരു ടീസ്പൂണ്‍
- വെളിച്ചെണ്ണ -പാകത്തിന്
- കറിവേപ്പില – രണ്ട് തണ്ട്
- കറുവപ്പട്ട
- ഏലക്ക
- പെരുംജീരകം
തയ്യാറാക്കുന്ന വിധം
ആദ്യം തന്നെ മുട്ടയെല്ലാം പുഴുങ്ങി തോട് കളഞ്ഞ് നടുവേ കീറി വെക്കണം. ശേഷം ഒരു പാന്‍ ചൂടാക്കി അതിലേക്ക് പട്ട, 2 ഗ്രാമ്പു, 1 ഏലക്ക, അര സ്പൂണ്‍ പെരുംജീരകം പൊട്ടിച്ചു ചെറിയ ഉള്ളി, വെളുത്തുളി 2 എണ്ണവും, ഒരു ചെറിയ ഇഞ്ചി കഷ്ണവും മുറിച്ച് നല്ലതുപോലെ വഴറ്റിയെടുക്കുക. ഇതിലേക്ക് തേങ്ങ ചേര്‍ത്ത് ഗോള്‍ഡന്‍ ബ്രൗണ്‍ നിറമാവുന്നത് വരെ വറുത്തെടുക്കാം. പിന്നീട് ഇതിലേക്ക് ബാക്കിയുള്ള മസാലപ്പൊടികള്‍ ചേര്‍ക്കാവുന്നതാണ്.
ചൂടാറി കഴിഞ്ഞാല്‍ ഇത് വെണ്ണ പോലെ അരച്ചെടുക്കേണ്ടതാണ്. പിന്നീട് ചട്ടിയില്‍ എണ്ണ ഒഴിച്ച് സവാള, പച്ചമുളക് വാട്ടുക, ബാക്കി വെളുത്തുള്ളി ഇഞ്ചി എന്നിവ നല്ലതുപോലെ ചതച്ചു ചേര്‍ക്കണം. ശേഷം തക്കാളി ചേര്‍ത്ത് നല്ലതുപോലെ അടച്ച് വെച്ച് തക്കാളി വേവുന്നത് വരെ വേവിച്ചെടുക്കുക. ഇതിലേക്ക് അരച്ച് വെച്ച തേങ്ങയും പാകത്തിന് ഉപ്പും ചേര്‍ത്ത് 1 കപ്പ് വെള്ളം കൂടെ ഒഴിച്ച് നല്ലപോലെ തിളപ്പിച്ചെടുക്കണം.
പതിനഞ്ച് മിനിറ്റിന് ശേഷം കറിയില്‍ എണ്ണ തെളിഞ്ഞ് കാണുമ്പോള്‍ അതിലേക്ക് ആവശ്യമെങ്കില്‍ ഒരു കഷ്ണം ചെറിയ ശര്‍ക്കര ചേര്‍ക്കാവുന്നതാണ്. പിന്നീട് മുട്ട ചേര്‍ത്ത് 2-3 മിനിറ്റിന് ശേഷം തീ ഓഫ് ചെയ്ത് കറിവേപ്പില ചേര്‍ക്കാവുന്നതാണ്.
