അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പാലക്കാട്: പാലക്കാട് കുത്തന്നൂരിൽ പ്രണയം നിരസിച്ചതിന് 17കാരിയുടെ വീട്ടിലേക്ക് പെട്രോള്‍ ബോംബെറിഞ്ഞ് യുവാക്കള്‍. സംഭവത്തിൽ പുതുശേരി സ്വദേശി രാഹുല്‍, തോലന്നൂർ സ്വദേശി അഖില്‍ എന്നിവരെ പിടികൂടി. പാലക്കാട് കുത്തന്നൂരിലാണ് സംഭവം. പിടിയിലായ യുവാക്കളില്‍ ഒരാള്‍ കഞ്ചാവ് കേസുകളിലടക്കം പ്രതിയാണ്.
എറിഞ്ഞ ബോംബ് പൊട്ടാത്തതിനാല്‍ വലിയ അപകടം ഒഴിവായി. പെണ്‍കുട്ടിയുടെ വീടിന്റെ ബെഡ്‌റൂമിലെ ജനല്‍ചില്ലകള്‍ ആക്രമണത്തില്‍ തകർന്നു. രാഹുലും അഖിലുമായി പെണ്‍കുട്ടിയ്‌ക്ക് നേരത്തെ സൗഹൃദമുണ്ടായിരുന്നു. ഇവരില്‍ ഒരാളുമായുള്ള ബന്ധത്തില്‍ ചില പ്രശ്‌നങ്ങളുണ്ടായതോടെ പെണ്‍കുട്ടി പിന്മാറി.
ഇതിനു പിന്നാലെയാണ് ഇരുവരും ബൈക്കിലെത്തി വീട്ടിലേക്ക് പെട്രോള്‍ ബോംബെറിഞ്ഞത്. ആദ്യം വീട്ടിലെ ജനല്‍ചില്ല എറിഞ്ഞുതകർത്തു. പിന്നെ പെട്രോള്‍ ബോംബ് കത്തിച്ചെറിഞ്ഞു പക്ഷെ മഴയായതിനാല്‍ തീ കത്തിയില്ല. ആക്രമണം നടത്തിയയുടൻ ഇവർ ബൈക്കില്‍ രക്ഷപ്പെട്ടു. സിസിടിവി ദൃശ്യങ്ങള്‍ കേന്ദ്രീകരിച്ച്‌ നടത്തിയ അന്വേഷണത്തില്‍ ഇരുവരും പിടിക്കപ്പെടുകയായിരുന്നു.
