അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.കെഎസ്ആര്‍ടിസിയും കേരള മോട്ടോര്‍ വാഹന വകുപ്പും സംയുക്തമായി സംഘടിപ്പിക്കുന്ന’ട്രാന്‍സ്‌പോ2025′ -കെഎസ്ആര്‍ടിസി എംവിഡി മോട്ടോ എക്സ്പോയുടെ ഉദ്ഘാടനം ധനകാര്യ വകുപ്പ് മന്ത്രി കെ എന്‍ ബാലഗോപാല്‍ നിര്‍വഹിച്ചു. ആഗസ്റ്റ്22മുതല്‍24വരെ തിരുവനന്തപുരം കനകക്കുന്നില്‍ നടക്കുന്ന മൂന്ന് ദിവസത്തെ എക്സ്പോയില്‍ ആധുനിക സൗകര്യങ്ങളോടുകൂടിയ കെഎസ്ആര്‍ടിസി ബസുകളുടെ മെഗാ ലോഞ്ചിംഗിനൊപ്പം ട്രാന്‍സ്പോര്‍ട്ട്,ഓട്ടോമൊബൈല്‍,ഇ-മൊബിലിറ്റി,ടൂറിസം,ടെക്നോളജി,സേവന മേഖലകളില്‍ പ്രവര്‍ത്തിക്കുന്ന സ്ഥാപനങ്ങളും മേളയില്‍ പങ്കെടുക്കുന്നു.
കെഎസ്ആര്‍ടിസിക്ക് വളരെ സജീവമായി മുന്നോട്ടു പോകാന്‍ കഴിയും എന്ന് തെളിയിക്കുന്ന സന്ദേശം നല്കാന്‍ സംസ്ഥാന സര്‍ക്കാരിന് കഴിയുന്നുണ്ടെന്ന് മന്ത്രി കെ എന്‍ ബാലഗോപാല്‍ പറഞ്ഞു.
ഗതാഗത മന്ത്രി കെ ബി ഗണേഷ് കുമാറിന്റെ നേതൃത്വത്തില്‍ ജീവനക്കാര്‍ എല്ലാവരും ഒരുമിച്ചു ചേര്‍ന്ന് മികച്ച പ്രവര്‍ത്തനം നടത്തുന്നു. അതിന് ഗതാഗത മന്ത്രിക്കും കെഎസ്ആര്‍ടിസി മാനേജ്മെന്റിനും ജീവനക്കാര്‍ക്കും മന്ത്രി ബാലഗോപാല്‍ അഭിനന്ദനങ്ങള്‍ അറിയിച്ചു. ആനവണ്ടി എന്ന് പറഞ്ഞാല്‍ കേരളത്തിന്റെ ഒരു ഐഡന്റിറ്റിയാണ്. കഴിഞ്ഞ ദിവസം മുഖ്യമന്ത്രി ഫ്‌ലാഗ് ഓഫ് ചെയ്ത വാഹനങ്ങള്‍ കൂടാതെ ഇനിയും ഒരുപാട് വാഹനങ്ങള്‍ വരാനുണ്ട്. നാഷണല്‍ ഹൈവേയുടെയും എം.സി. റോഡിന്റെയും മലയോര ഗതാഗതത്തിനുള്ള മലയോര പാതയയുടെയും ഒക്കെ പണി നല്ലരീതിയില്‍ നടന്നു. മലയോരപാതയുടെ പണി പൂര്‍ത്തീകരണത്തോടടുക്കുന്നു. നാഷണല്‍ ഹൈവേയുടെ പണിയും അധികം താമസിയാതെ പൂര്‍ത്തീകരിക്കും. ഇങ്ങനെ കെഎസ്ആര്‍ടിസി വാഹനങ്ങള്‍ക്ക് ഉപയോഗിക്കാവുന്ന മികച്ച റോഡ് സംവിധാനങ്ങള്‍ വന്നുകൊണ്ടിരിക്കുന്നു.
ഈ സൗകര്യങ്ങള്‍ കെഎസ്ആര്‍ടിസി കൃത്യമായി ഉപയോഗിക്കുകയും ലാഭകരമായി മുന്നോട്ടു കൊണ്ടുപോകുകയും വേണമെന്ന് മന്ത്രി പറഞ്ഞു. ഒരു ദിവസം ശരാശരി നാല് കോടി രൂപയാണ് സംസ്ഥാന സര്‍ക്കാര്‍ കെഎസ്ആര്‍ടിസിക്ക് നല്‍കുന്നത്. ഏറ്റവും കൂടുതല്‍ ആളുകള്‍ ആശ്രയിക്കുന്നത് കെഎസ്ആര്‍ടിസി വാഹനങ്ങളെയാണ്. പൊതുമേഖലയില്‍ ട്രാന്‍സ്‌പോര്‍ട് സിസ്റ്റം ഇല്ല എങ്കില്‍ സ്വകാര്യ മേഖലയിലെ ട്രാന്‍സ്‌പോര്‍ട് സിസ്റ്റവും നന്നാവില്ല. ഗതാഗത മേഖലയ്ക്ക് സര്‍ക്കാര്‍ പ്രത്യേക പരിഗണന നല്‍കുന്നുണ്ടെന്നു മന്ത്രി പറഞ്ഞു. കഴിഞ്ഞ9 വര്‍ഷങ്ങള്‍ കൊണ്ട്11,600കോടി രൂപയാണ് കെ.എസ്.ആ.ര്‍.ടി.സി മേഖലയില്‍ സംസ്ഥാന സര്‍ക്കാര്‍ വകയിരുത്തിട്ടുള്ളത്.
കൂടുതല്‍ പുതിയ ബസ്സുകള്‍ വരുമ്പോള്‍ ഫ്യുവല്‍ എഫിഷ്യന്‍സി കൂടും. നമ്മുടെ ബസ് സ്റ്റാന്‍ഡുകള്‍ വൃത്തിയായി സൂക്ഷിക്കേണ്ടത് അത്യാവശ്യമാണ്. സംസ്ഥാനത്ത് അങ്ങോളമിങ്ങോളം മെച്ചപ്പെട്ട ബസ് സ്റ്റാന്‍ഡുകള്‍ നിര്‍മ്മിക്കാനുള്ള പ്രവര്‍ത്തനങ്ങള്‍ നടക്കുന്നുവെന്നും മന്ത്രി കൂട്ടിച്ചേര്‍ത്തു. ചടങ്ങില്‍ അധ്യക്ഷനായ ഗതാഗത വകുപ്പ് മന്ത്രി കെ ബി ഗണേഷ് കുമാര്‍ കെ എസ് ആര്‍ ടി സി പൂര്‍ണ്ണമായും ഡിജിറ്റലൈസ് ചെയ്തു കഴിഞ്ഞത്തിന്റെ സന്തോഷം പങ്കുവച്ചു. യാത്രക്കാര്‍ മൊബൈല്‍ ഫോണില്‍ നോക്കിയാല്‍ കെഎസ്ആര്‍ടിസി ബസ്സുകള്‍ ഏതൊക്കെയുണ്ട്,എങ്ങോട്ടൊക്കെ ബസ് ഉണ്ട്,യാത്രക്കാരന്‍ നില്‍ക്കുന്ന സ്റ്റോപ്പില്‍ അടുത്ത ബസ് എത്ര മിനുട്ടുകള്‍ക്കുള്ളില്‍ എത്തും തുടങ്ങിയ കാര്യങ്ങള്‍ എല്ലാം കാണിക്കുന്ന കെഎസ്ആര്‍ടിസി ചലോ ആപ്പ് നിലവില്‍ വന്നു കഴിഞ്ഞു. സ്മാര്‍ട്ട് കാര്‍ഡ് വന്നു .90,000കാര്‍ഡുകള്‍ ആണ് അടിച്ചത്.
അതൊക്കെയും തീര്‍ന്നു. വീണ്ടും5ലക്ഷം കാര്‍ഡുകള്‍ അടിക്കാന്‍ കൊടുത്തിട്ടുണ്ട്. എ.ഐ. സാങ്കേതിക വിദ്യയും,സമ്പൂര്‍ണ്ണ ഡിജിറ്റലൈസെഷനും പുതിയതായി നിരത്തിലിറങ്ങുന്ന വിവിധ ശ്രേണികളിലുള്ള ആധുനിക സൗകര്യങ്ങളോടു കൂടിയ ബസ്സുകളും കെഎസ്ആര്‍ടിസിയെ പുതിയൊരു തലത്തിലേക്കുയര്‍ത്തുന്നതിനെപ്പറ്റി മന്ത്രി വിവരിച്ചു.വി കെ പ്രശാന്ത് എംഎല്‍എ,കെഎസ്ആര്‍ടിസി ചെയര്‍മാന്‍&മാനേജിംഗ് ഡയറക്ടര്‍ ഡോ. പി എസ് പ്രമോജ് ശങ്കര്‍,ഗതാഗത കമ്മീഷണര്‍ നാഗരാജു ചകിലം തുടങ്ങിയവര്‍ ചടങ്ങില്‍ പങ്കെടുത്തു. വാഹന പ്രേമികള്‍ക്ക് പുത്തന്‍ സാങ്കേതിക വിദ്യകളും വാഹനങ്ങളുടെ സവിശേഷതകളും അടുത്തറിയാനുള്ള അവസരമാണ് എക്സ്പോ ഒരുക്കുന്നത്. കാര്‍,ബൈക്ക്,ബസ്,ട്രക്ക് തുടങ്ങിയ വാഹനങ്ങളും ഭാവിയിലെ ഗതാഗത സാങ്കേതിക വിദ്യകളും പ്രദര്‍ശിപ്പിക്കുന്നു. സന്ദര്‍ശകര്‍ക്ക് വാഹനങ്ങള്‍ നേരിട്ട് കാണാനും സവിശേഷതകള്‍ മനസ്സിലാക്കാനും ടെസ്റ്റ് ഡ്രൈവ് നടത്താനുമുള്ള സൗകര്യവും ഒരുക്കിയിട്ടുണ്ട്.
എക്സ്പോയില്‍ മൂന്ന് ദിവസങ്ങളിലായി കലാസാംസ്‌കാരിക പരിപാടികളും വിനോദ വിജ്ഞാന പരിപാടികളും നടക്കും. ആഗസ്ത്22ന് വൈകിട്ട്6മുതല്‍ കെഎസ്ആര്‍ടിസി കുടുംബാംഗങ്ങളുടെ വിവിധ കലാപരിപാടികള്‍ അരങ്ങേറും. ആഗസ്ത്23ന് രാവിലെ11മുതല്‍ ഉച്ചയ്ക്ക്1വരെ ഗതാഗത വകുപ്പ് മന്ത്രി കെ ബി ഗണേഷ് കുമാര്‍ ഉദ്ഘാടനം ചെയ്യുന്ന’ആനവണ്ടി ഒരു സംവാദം’നടക്കും. ഗതാഗത രംഗത്തെ പ്രമുഖരും ആനവണ്ടി പ്രേമികളും ഇതില്‍ പങ്കെടുക്കും. വൈകിട്ട്6.30മുതല്‍ പ്രശസ്ത സിനിമാതാരം കൃഷ്ണപ്രഭയും സംഘവും അവതരിപ്പിക്കുന്ന’കൃഷ്ണപ്രഭ മ്യൂസിക് ലൈവ്’നടക്കും. ആഗസ്ത്24ന് രാവിലെ9മുതല്‍11വരെ’സേഫ് ഡ്രൈവ്,സേവ് ലൈവ്സ്: ബില്‍ഡിംഗ് എ കള്‍ചര്‍ ഓഫ് റോഡ് ഡിസിപ്ലിന്‍’എന്ന വിഷയത്തില്‍ എംവിഡി സംഘടിപ്പിക്കുന്ന സെമിനാര്‍ നടക്കും. രാവിലെ11.30മുതല്‍1.30വരെ സൊസൈറ്റി ഫോര്‍ എമര്‍ജന്‍സി മെഡിസിന്‍ ഇന്ത്യയുടെ എമര്‍ജന്‍സി ലൈഫ് സപ്പോര്‍ട്ട്&ട്രോമ കെയര്‍ ട്രെയിനിംഗ് പ്രോഗ്രാം ഡോ. ഷിജു സ്റ്റാന്‍ലി നയിക്കും. വൈകിട്ട്6.30മുതല്‍ പ്രശസ്ത ഗായകന്‍ മുരളീകൃഷ്ണയും സംഘവും അവതരിപ്പിക്കുന്ന’എംകെ ലൈവ്’സംഗീതനിശയും നടക്കും. എക്സ്പോ എല്ലാ ദിവസവും രാവിലെ11മുതല്‍ രാത്രി11വരെ സന്ദര്‍ശകര്‍ക്കായി തുറന്നിരിക്കും.
