അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മെറ്റ അവതരിപ്പിച്ച മൈക്രോ ബ്ലോഗിംഗ് സൈറ്റായ ത്രഡ്‌സില്‍ ലോംഗ്-ഫോം ടെക്സ്റ്റ് ഷെയറിംഗ് ഫീച്ചര്‍ ഉടന്‍ ലഭ്യമാകും. ഇതോടെ ദീര്‍ഘമായ കുറിപ്പുകള്‍ ത്രഡ്‌സില്‍ യൂസര്‍മാര്‍ക്ക് പോസ്റ്റ് ചെയ്യാനാകും.
‘ടെക്സ്റ്റ് അറ്റാച്ച്‌മെന്‍റ്’ എന്ന പുത്തന്‍ ഫീച്ചര്‍ വഴി ദീര്‍ഘമായ കുറിപ്പുകള്‍ പോസ്റ്റ് ചെയ്യാന്‍ ഉപഭോക്താക്കളെ അനുവദിക്കുന്ന ഫീച്ചറിന്‍റെ പണിപ്പുരയിലാണ് ത്രഡ്‌സ് അധികൃതര്‍ എന്നാണ് പുറത്ത് വരുന്ന റിപ്പോര്‍ട്ട്.
ഭാഗങ്ങളാക്കി ഒന്നിലേറെ പോസ്റ്റുകളായി ഇടുന്നതിന് പകരം, വലിയൊരു കുറിപ്പ് പൂര്‍ണമായും ഒറ്റ പോസ്റ്റില്‍ ത്രഡ്‌സില്‍ ചേര്‍ക്കാന്‍ ഈ ഫീച്ചറിലൂടെ സാധിക്കും.
ത്രഡ്‌സ് പോസ്റ്റില്‍ വാർത്താ ശകലങ്ങൾ അല്ലെങ്കിൽ പുസ്‌തക ഉദ്ധരണികൾ പങ്കിടുന്നത് പോലുള്ള കാര്യങ്ങള്‍ എളുപ്പമാക്കുന്നതിനാണ് ഈ സവിശേഷത രൂപകൽപ്പന ചെയ്‌തിരിക്കുന്നത്. 500 ക്യാരക്‌ടര്‍ പരിധി വരെ ദൈര്‍ഘ്യമുള്ള കുറിപ്പ് ത്രഡ്‌സില്‍ പങ്കിടാനാകുമെന്നാണ് ടെക്‌ക്രഞ്ചിന്‍റെ റിപ്പോര്‍ട്ട്.
ദൈര്‍ഘ്യമുള്ള കുറിപ്പുകള്‍ പങ്കിടാന്‍ കഴിയാത്തതിനാല്‍, പകരം സ്ക്രീന്‍ഷോട്ടുകള്‍ പോസ്റ്റ് ചെയ്‌താണ് ആളുകള്‍ ഇതുവരെ പരിഹാരം കണ്ടിരുന്നത്.
പുതിയ ഫീച്ചറിലൂടെ ഒരു ചാരനിറത്തിലുള്ള കോളത്തില്‍ പോസ്റ്റിന്‍റെ പ്രിവ്യൂ കാണാന്‍ സാധിക്കും. ഇതുവഴി പോസ്റ്റിലെ ക്യാരക്‌ടറുകള്‍ എത്ര നീളുന്നു എന്ന് പൂര്‍ണമായും മനസിലാക്കാം.
ഇതിനൊപ്പം ലിങ്കുകളും ഫോട്ടോകളും അഞ്ച് മിനിറ്റ് വരെ ദൈര്‍ഘ്യമുള്ള വീഡിയോകളും പങ്കിടാന്‍ ഉപഭോക്താക്കളെ ത്രഡ്‌സ് അനുവദിക്കും. ലോംഗ്-ഫോം പോസ്റ്റുകള്‍ അനുവദിക്കുന്നതിലൂടെ എക്‌സുമായി നേരിട്ട് ഏറ്റുമുട്ടാനാണ് ത്രഡ്‌സ് പദ്ധതിയിടുന്നത്.
