അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.നല്ല സ്വാദൂറും പഴം പ്രഥമൻ ഉണ്ടാക്കിയാലോ? തയ്യാറാക്കുന്നത് എങ്ങനെയെന്ന് നോക്കാം. കിടിലൻ സ്വാദിൽ തയ്യാറാക്കിയെടുക്കാവുന്ന ഒരു പ്രഥമൻ റെസിപ്പി.
ആവശ്യമായ ചേരുവകൾ
- ഏത്തപ്പഴം ഒരു കിലോ
- ശർക്കര മുക്കാൽ കിലോ മുതൽ ഒരു കിലോ വരെ (മധുരത്തിനനുസരിച്ച്)
- അര ഗ്ലാസ് വെള്ളം
- നെയ്യ് രണ്ടു ടേബിൾ സ്പൂൺ
- തേങ്ങാ വലുത് മൂന്നെണ്ണം . ചെറുതാണെങ്കിൽ നാലെണ്ണം
- ഒരു ചെറിയ കൊപ്ര ചെറുതായി ഖനം കുറച്ചു നുറുക്കിയത്
- കശുവണ്ടി 10-12 എണ്ണം
- ജീരകം 1 1/2 ടീസ്പൂൺ
- ഏലയ്ക്ക – 8 എണ്ണം
- ചുക്കുപൊടി – 1 /4 ടീസ്പൂൺ
തയ്യാറാക്കുന്ന വിധം
ഏത്തപ്പഴം ആവിയിൽ പുഴുങ്ങിയെടുത്തു , മിക്സിയിൽ നന്നായി അരച്ചെടുക്കുക. തേങ്ങാ ചിരകിയതിൽ വെള്ളം ചേർത്ത് മിക്സിയിൽ അരച്ച്, തുണിയിൽ ഇട്ടു പിഴിഞ്ഞ് പാലെടുത്ത വയ്ക്കുക. ജീരകവും ഏലക്കയും അടുപ്പിനു അരികിലോ വെയിലത്തോ വച്ച് അല്പം ചൂടാകുമ്പോൾ മിക്സിയിൽ നന്നായി പൊടിച്ചെടുക്കുക. ശർക്കര പൊടിച്ചു, അതിലേക്കു അര ഗ്ലാസ് വെള്ളമൊഴിച്ചു ചൂടാക്കി ഉരുക്കിയെടുത്തു ഒരു അരിപ്പയിലൂടെ അരിച്ചെടുത്തു വയ്ക്കുക.
അടി കട്ടിയുള്ള പാത്രത്തിൽ ഒരു ടേബിൾസ്പൂൺ നെയ്യൊഴിച്ചു അരച്ച ഏത്തപ്പഴം ചേർത്ത് രണ്ടോ മൂന്നോ മിനിറ്റ് ഇളക്കുക. ഇനി ഇതിലേക്ക് ശർക്കര ഉരുക്കിയത് ചേർത്ത് ഇളക്കാം. ശർക്കര വെള്ളം അല്പം വറ്റി കുറുകി വരുമ്പോൾ , ഇതിലേക്ക് തേങ്ങാപ്പാലിന്റെ മുക്കാൽ ഭാഗവും ചേർത്ത് ഇളക്കി കൊടുക്കാം. പാത്രത്തിന്റെ അടിയിൽ കരിഞ്ഞു പിടിക്കാതിരിക്കാൻ അടിച്ചേർത്തു ഇളക്കി കൊണ്ടിരിക്കണം.
പായസപ്പരുവത്തിലേക്ക് കുറുകി പാകമായാൽ ബാക്കി ഇരിക്കുന്ന കാൽ ഭാഗം പാൽ കൂടി ചേർത്ത് ഇളക്കുക. ഒരു തിള വന്നാൽ ഉടനെ തീ കെടുത്താം. ഇനി പൊടിച്ചു വച്ചിരിക്കുന്ന ജീരകവും ഏലക്കയും ചുക്കും ചേർത്ത് ഇളക്കി യോജിപ്പിച്ചു പാത്രം അടച്ചു വയ്ക്കാം. ഒരു പാത്രത്തിൽ ഒരു ടേബിൾ സ്പൂൺ നെയ്യെടുത്ത അതിൽ നുറുക്കിവച്ചിരിക്കുന്ന കൊപ്ര വറുത്തെടുക്കാം. കശുവണ്ടിയും നെയ്യിൽ വറുത്തെടുക്കാം. ഇത് രണ്ടും പായസത്തിൽ ചേർത്ത് ഇളക്കി എടുക്കുക. അര മണിക്കൂർ കഴിഞ്ഞു പായസം വിളമ്പാo.
