അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.പ്രമുഖ വെബ്സീരീസുകളായ പീക്കി ബ്ലൈൻഡേഴ്സ്, ഷോഗൺ തുടങ്ങിയവയിലൂടെ ശ്രദ്ധ നേടിയ നടനാണ് കോസ്മോ ജാർവിസ്. ഹോളിവുഡ് ചിത്രങ്ങളിലും അദ്ദേഹം ഭാഗമായിട്ടുണ്ട്. ഇപ്പോഴിതാ കോസ്മോ ജാർവിസ് ബ്രിട്ടീഷ് മാഗസിനായ ആര്‍ട്ടിക്കിളന് നൽകിയ അഭിമുഖം ആണ് സാമൂഹ്യമാധ്യമങ്ങളിൽ ശ്രദ്ധ നേടുന്നത്.
ഇഷ്ടനടന്മാർ ആരെല്ലാമാണ് എന്നായിരുന്നു അവതാരകന്റെ ചോദ്യം. ഇതിന് വലിയ ഒരു ലിസ്റ്റ് തന്നെയാണ് ജാർവിസ് വെളിപ്പെടുത്തിയത്. ജാർവിസിന്റെ ഇഷ്ടനടന്മാരുടെ പട്ടികയിൽ ഒന്നാം സ്ഥാനത്തുള്ളത് ചാർളി ചാപ്ലിൻ ആണ്. ബ്രൂണോ ഗാൻസ്, ആന്തണി ഹോപ്കിൻസ്, മൈക്കൽ ഷാനൻ, ഗാരി ഓൾഡ്മാൻ, കാത്തി ബേറ്റ്സ്, വാക്വിൻ ഫീനിക്സ് തുടങ്ങി നാല്പതോളം താരങ്ങളുടെ പേരാണ് ജാർവിസ് പറഞ്ഞത്. ഇക്കൂട്ടത്തിലാണ് അദ്ദേഹം മോഹൻലാലിനേയും ഉൾപ്പെടുത്തിയത്. ഇന്ത്യയിൽനിന്ന് മറ്റൊരു താരത്തേക്കുറിച്ചും അദ്ദേഹം പരാമർശിച്ചിട്ടില്ല. മോഹൻലാലിന്റെ പഴയ സൂപ്പർഹിറ്റ് ചിത്രമായ താളവട്ടത്തിന് പ്രചോദനമായ വൺ ഫ്ലൂ ഓവർ ദ കുക്കൂസ് നെസ്റ്റ് ആണ് ജാർവിസിന് ഇഷ്ടപ്പെട്ട ചിത്രങ്ങളിൽ ഒരെണ്ണം എന്നതും ശ്രദ്ധേയമാണ്. കോസ്മോ ജാർവിസിന്റെ അഭിമുഖം മോഹൻലാൽ ഫാൻ പേജുകളിൽ ഇതിനോടകം ഇടംപിടിച്ചിരിക്കുകയാണ്.
2009-ൽ ദി അലി വേ എന്ന ഹ്രസ്വചിത്രത്തിൽ ശബ്ദം നൽകിയാണ് അദ്ദേഹം സിനിമാ ജീവിതം ആരംഭിച്ചത്. 2012-ൽ ദി നോട്ടി റൂം എന്ന ചിത്രത്തിലൂടെ വെള്ളിത്തിരയിൽ അരങ്ങേറി. 2016-ൽ ലേഡി മാക്ബത് എന്ന ചിത്രത്തിലൂടെയാണ് കോസ്മോ ജാർവിസ് പ്രശസ്തിയിലേക്കുയർന്നു. ഈ ചിത്രത്തിൽ സെബാസ്റ്റ്യൻ എന്ന കഥാപാത്രത്തെയാണ് അദ്ദേഹം അവതരിപ്പിച്ചത്. പിന്നീട് അനിഹിലേഷൻ, പെർസുവേഷൻ, ഇൻസൈഡ്, വാർഫെയർ തുടങ്ങി ഇരുപതിലേറെ ചിത്രങ്ങളിൽ വേഷമിട്ടു.പീക്കി ബ്ലൈൻഡേഴ്സ് വെബ് സീരീസിലെ ബാർണി എന്ന കഥാപാത്രം ഏറെ ശ്രദ്ധിക്കപ്പെട്ടു. 2024-ൽ പുറത്തിറങ്ങി ഏറെ പ്രശംസ പിടിച്ചുപറ്റിയ ഷോഗൺ എന്ന വെബ്സീരീസിലെ നായകനായ ജോൺ ബ്ലാക്ക്തോണിനെ അവതരിപ്പിച്ചത് കോസ്മോ ജാർവിസ് ആണ്.
