അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.മായമില്ലാത്ത നല്ല സാമ്പാർപൊടി ഇനി വീട്ടിൽ ഉണ്ടാക്കാം. വളരെ എളുപ്പത്തിൽ തന്നെ സാമ്പാർപൊടി നമുക്ക് വീട്ടിലുണ്ടാക്കാം. എങ്ങനെയെന്ന് നോക്കിയാലോ?
ആവശ്യമായ ചേരുവകൾ
- 250 ഗ്രാം വറ്റല്‍മുളക്
- 500 ഗ്രാം മല്ലി
- 50 ഗ്രാം ഉലുവ
- 50 ഗ്രാം തുവരപ്പരിപ്പ്
- 100 ഗ്രാം കടലപ്പരിപ്പ്
- 50 ഗ്രാം പീസ് പരിപ്പ്
- 50 ഗ്രാം പച്ചരി
- 20 ഗ്രാം കായം
- 10 തണ്ട് കറിവേപ്പില
തയ്യാറാക്കുന്ന വിധം
ചേരുവകൾ എല്ലാം വൃത്തിയാക്കി വെയിലില്‍ ഉണക്കിയെടുക്കുക. അടിക്കടിയുള്ള പാത്രത്തിൽ മുളക് ഒട്ടും കരിഞ്ഞുപോകാതെ, ഒടിച്ചാല്‍ ഒടിയുന്ന പാകത്തില്‍ വറുത്തെടുക്കുക. മുളക് മൂത്താലുടന്‍ ഒരു മുറത്തിലോ പത്രക്കടലാസിലോ നിരത്തുക. അതേ ഉരുളിയില്‍ മല്ലിയിട്ട് ഇളക്കുക. പതുക്കെ ചുവന്നാല്‍ മുളകിന്റെ കൂട്ടത്തിലേക്ക് ചേര്‍ക്കുക. പരിപ്പുകള്‍ ഓരോന്നും വേറെ വേറെ വറക്കണം. 50 ഗ്രാം പച്ചരി പൊട്ടുന്ന പാകത്തില്‍ വറുത്തെടുക്കണം. ഉലുവ നന്നായി ചുവക്കണം. കറിവേപ്പില ഒടിച്ചാല്‍ ഒടിയുന്ന പാകത്തിലും.
20 ഗ്രാം കായം കഷണങ്ങളാക്കി മുറിച്ച ശേഷം ഒരു ഇരുന്വുചട്ടുകത്തില്‍ തീയില്‍ കാണിക്കണം. അപ്പോള്‍ അത് നന്നായി പൊള്ളിവരും. രണ്ടു വശവും പൊളളിച്ച് മറ്റു ചേരുവകളിലേക്കിടുക. പരിപ്പുകളും ഒരു ചെറിയ ചീനച്ചട്ടിയില്‍ വറുത്താല്‍ മതി. ഇങ്ങനെ പ്രത്യേകം പ്രത്യേകം വറുത്ത എല്ലാ സാധനങ്ങളും വീണ്ടും ഒന്നിച്ച് ഉരുളിയിലിട്ട് ഇളക്കി ഒന്നുകൂടി ചൂടാക്കണം. ഇത് വാങ്ങി വച്ച് നന്നായി തണുത്താല്‍ മില്ലില്‍ പൊടിപ്പിക്കാം. മില്ലില്‍ നന്നായി പൊടിഞ്ഞ് കിട്ടും. മിക്‌സിയില്‍ അത്രയും നന്നായി പൊടിയുകയില്ല. ഈ പൊടി മൂന്നോ നാലോ പോളിത്തീന്‍ കൂടുകളിലാക്കി സീല്‍ ചെയ്ത് ഫ്രിഡ്ജില്‍ സൂക്ഷിക്കാം. ആവശ്യത്തിന് ഒരു കൂടു മാത്രം പൊട്ടിച്ച് ഉണങ്ങിയ കുപ്പിയിലിട്ട് അടച്ച് ഉപയോഗത്തിനായി വയ്ക്കാം.
