അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇന്ന് ഉച്ചയ്ക്ക് ഊണിന് കിടിലൻ സ്വാദിലൊരു കോഴി കറി ഉണ്ടാക്കിയാലോ? എളുപ്പത്തിൽ തയ്യാറാക്കാവുന്ന ഒരു ചിക്കൻ കറി റെസിപ്പി നോക്കാം.
ആവശ്യമായ ചേരുവകൾ
- കോഴിയിറച്ചി – 1 കിലോ
- കുരുമുളക് – 2 ടേബിൾസ്പൂൺ (ചതച്ചത്)
- കറിവേപ്പില – രണ്ട് തണ്ട്
- സവാള – 3 എണ്ണം
- തക്കാളി – ഒന്ന്
- പച്ചമുളക് – 2 എണ്ണം
- ഇഞ്ചി – ഒരു ചെറിയ കഷണം
- വെളുത്തുള്ളി – 5 എണ്ണം
- മഞ്ഞൾപ്പൊടി – അര ടേബിൾസ്പൂൺ
- ഗരംമസാല / ചിക്കൻ മസാല – ഒരു ടേബിൾസ്പൂൺ
- മല്ലി പൊടി – 2 ടേബിൾസ്പൂൺ
- പെരുംജീരകം – കാൽ ടേബിൾസ്പൂൺ
- നാരങ്ങ നീര് – 2 ടേബിൾസ്പൂൺ
- എണ്ണ – 4 ടേബിൾസ്പൂൺ
- ഉപ്പ് – ആവശ്യത്തിന്
തയ്യാറാക്കുന്ന വിധം
കോഴി ഇറച്ചി ചെറിയ കഷണങ്ങളാക്കി മുറിച്ച ശേഷം നന്നായി കഴുകി വൃത്തിയാക്കുക . ശേഷം ഇതിൽ കുരുമുളക് ചതച്ചത്, മഞ്ഞൾപ്പൊടി, നാരങ്ങ നീര് എന്നിവ ചേർത്ത് നന്നായി തേച്ചു പിടിപ്പിച്ച് അര മണിക്കൂർ മാറ്റി വെക്കുക. ഒരു പാനിൽ എണ്ണ ചൂടാകി ഇഞ്ചിയും വെളുത്തുള്ളിയും നന്നായി വഴറ്റിയെടുക്കുക. ഇതിലേക്ക് അരിഞ്ഞെടുത്ത സവാളയും കറിവേപ്പിലയും ചേർക്കുക. സവാള നന്നായി വഴണ്ട് വരുമ്പോൾ അതിലേക്ക് ഗരംമസാലപൊടി, മല്ലിപൊടി, പെരുംജീരകം എന്നിവ ചേർത്ത് കൊടുക്കുക.
ഇതിലേക്ക് കോഴിയിറച്ചി ചേർത്ത് കൊടുക്കുക. ഇറച്ചിയിൽ മസാല പിടിച്ചുവരുമ്പോൾ ഇതിലേക്ക് തക്കാളിയും പച്ചമുളകും ചേർക്കുക. ഇറച്ചി വെള്ളനിറം ആകുമ്പോൾ അര കപ്പ് വെള്ളം ചേർത്ത് അടച്ച് വെച്ച് വേവിക്കുക. ഇറച്ചി നന്നായി വെന്തു കഴിയുമ്പോൾ മൂടി മാറ്റി വെച്ച് കുറച്ചു നേരം കൂടി ഇളക്കി വേവിക്കുക. ആവശ്യത്തിന് കുറുകി വരുമ്പോൾ അടുപ്പിൽ നിന്ന് മാറ്റി വയ്ക്കാം.
