അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ഇഷ്ടനമ്പര്‍ സ്വന്തമാക്കാൻ ലക്ഷങ്ങള്‍ പൊടിച്ചിരിക്കുകയാണ് സിനിമാ നിർമാതാവ് ആന്റണി പെരുമ്പാവൂര്‍. താരം നേടിയെടുത്തത് വെറും ഒരു നമ്പർ അല്ല. ‘രാജാവിന്റെ മകൻ’ എന്ന സിനിമയിലെ മോഹൻലാൽ പറഞ്ഞ ഡയലോഗ് ‘മൈ ഫോണ്‍ നമ്പര്‍ ഈസ് 2255’ എന്നത് മലയാളികൾക്ക് മറക്കാനാകില്ല. ഇപ്പോഴിതാ ആ നമ്പർ ആണ് ആന്റണി പെരുമ്പാവൂര്‍ സ്വന്തമാക്കിയത്.
KL 07 DH 2255 എന്ന നമ്പറിനായി എറണാകുളം ആർടി ഓഫീസിൽ വാശിയേറിയ ലേലമാണ് നടന്നത് വാഹനങ്ങൾക്ക് ഇഷ്ട നമ്പർ സ്വന്തമാക്കാനായി കടുത്ത മത്സരങ്ങളാണല്ലോ നടക്കാറുള്ളത്. ഇത്തവണ മത്സരത്തിനൊടുവിൽ നമ്പർ സ്വന്തമാക്കിയത് ആന്റണി പെരുമ്പാവൂരാണ്. ഈ നമ്പറിനായി നാലു പേരാണ് ലേലത്തിൽ പങ്കെടുത്തത്, എന്നാൽ 3,20,000 രൂപയ്ക്ക് ആന്റണി പെരുമ്പാവൂർ നമ്പർ സ്വന്തമാക്കുകയായിരുന്നു. അടുത്തിടെ സ്വന്തമാക്കിയ കാരവാനിന്റെ നമ്പറും 2255 ആയിരുന്നു.
അടുത്തിടെയാണ് വോൾവോ XC 60 എസ്‌യുവിയുടെ പുതുക്കിയ പതിപ്പ് ആന്റണി പെരുമ്പാവൂർ ഗാരിജിലേക്കെത്തിച്ചത്. ഈ വാഹനത്തിന് വേണ്ടി ആയിരിക്കാം പുതിയ നമ്പറെന്നാണ് വിലയിരുത്തൽ. മുഖം മിനുക്കി എത്തിയിരിക്കുന്ന ഈ മോഡലിന് 71.90 ലക്ഷം രൂപയാണ് എക്സ് ഷോറൂം വില.
