അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ആപ്പിള്‍ ഐഫോണ്‍ 17 സീരീസ് ഇന്ന് മുതൽ ഇന്ത്യയിൽ വിൽപന ആരംഭിച്ചു. പുതിയ സീരീസ് സ്വന്തമാക്കാൻ രാത്രി മുതൽ ആപ്പിള്‍ സ്റ്റോറിന് മുന്നിൽ ക്യൂ നിൽക്കുകയാണ് ഐഫോണ്‍ ആരാധകർ. ഓറഞ്ച് ഫോണ്‍ തന്നെ സ്വന്തമാക്കാനാണ് പലരും ആദ്യമേ ക്യൂവിൽ ഇടം പിടിച്ചിരിക്കുന്നത്. ന്യൂഡൽഹി, മുംബൈ, ബെംഗളൂരു, പൂനെ എന്നിവിടങ്ങളിലായി നാല് ആപ്പിൾ സ്റ്റോറുകളാണ് ഇന്ത്യയിലുള്ളത്.
ഡൽഹിയിലും മുംബൈയിലുമടക്കം സ്‌റ്റോറുകള്‍ക്ക് മുന്നിൽ ക്യൂ നിൽക്കുന്നവരുടെ വീഡിയോ ദൃശ്യങ്ങൾ സമൂഹ മാധ്യമങ്ങളിള്‍ വൈറലാണ്. ബികെസി ജിയോ സെന്ററിലെ മുംബൈ ആപ്പിൾ സ്റ്റോറിൽ ഐഫോൺ 17, ഐഫോൺ 17 എയർ, ഐഫോൺ 17 പ്രോ, ഐഫോൺ 17 പ്രോ മാക്സ് എന്നിവയ്ക്കായി വലിയ തിരക്കാണ് അനുഭവപ്പെട്ടത്. പുതിയ ആപ്പിൾ വാച്ചുകളും എയർപോഡ്സ് പ്രോ 3-യും വാങ്ങാനും ആളുകൾ എത്തിയിരുന്നു.
പിടിഐ പങ്കുവെച്ച വീഡിയോയിൽ വലിയ ആൾക്കൂട്ടം തമ്മിൽ തല്ലുന്നതായി കാണാം. സുരക്ഷാ ഉദ്യോഗസ്ഥരുടെ വിസിൽ വിളികൾ അവഗണിച്ച് ഏതാനും പേർ പരസ്പരം കയ്യേറ്റം ചെയ്യുന്നതും ദൃശ്യങ്ങളിൽ കണ്ടു. ഉദ്യോഗസ്ഥർ ഉടൻ തന്നെ ഇടപെട്ട് പ്രശ്നമുണ്ടാക്കിയവരെ ആൾക്കൂട്ടത്തിൽ നിന്ന് മാറ്റി.
പുതിയ ഐഫോൺ 17 സീരീസും ഐഫോൺ എയറും ആദ്യം സ്വന്തമാക്കാൻ ക്യൂവിൽ മുന്നിലെത്താൻ ശ്രമിക്കുകയായിരുന്നത്രെ ഇവർ. ചില ഉപഭോക്താക്കൾ പറഞ്ഞത്, സുരക്ഷാ ഉദ്യോഗസ്ഥരുടെ ശ്രദ്ധക്കുറവ് കാരണം ആളുകൾ ക്യൂ തെറ്റിച്ചതാണ് ഏറ്റുമുട്ടലിന് കാരണമായതെന്നാണ്.
“ഞാൻ രാവിലെ മുതൽ കാത്തിരിക്കുകയാണ്. ക്യൂവിൽ നിൽക്കുകയാണ്… എന്നാൽ ഇവിടത്തെ സുരക്ഷാ ഉദ്യോഗസ്ഥർക്ക് ഒരു ഉത്തരവാദിത്തവുമില്ല. ആളുകൾ ക്യൂ തെറ്റിക്കുന്നു. സുരക്ഷാ ഉദ്യോഗസ്ഥരുടെ ഭാഗത്ത് നിന്നുള്ള ഉത്തരവാദിത്തമില്ലായ്മ കാരണം പിന്നിൽ നിൽക്കുന്നവർക്ക് ഉൽപ്പന്നം വാങ്ങാൻ അവസരം ലഭിക്കുന്നില്ല.” ഒരു ഉപഭോക്താവായ മോഹൻ യാദവ് എഎൻഐയോട് പറഞ്ഞു.
മറ്റ് സ്ഥലങ്ങളിലും സമാനമായ തിരക്കാണ് അനുഭവപ്പെട്ടത്. ഏറ്റവും പുതിയ ഐഫോൺ ആദ്യം വാങ്ങാനായി ന്യൂഡൽഹിയിലെ സാകേത് സെലക്ട് സിറ്റിവാക്ക് മാളിലെ ആപ്പിൾ സ്റ്റോറിന് പുറത്ത് ആളുകൾ രാത്രിയിലും ക്ഷമയോടെ കാത്തുനിന്നു.
ചില ഉപഭോക്താക്കൾ ഐഫോൺ 17 വാങ്ങാനായി പഞ്ചാബ് പോലുള്ള ദൂരസ്ഥലങ്ങളിൽ നിന്ന് പോലും യാത്ര ചെയ്ത് വന്നതായി പറഞ്ഞു. രാവിലെ 8 മണിക്ക് സ്റ്റോർ തുറക്കുന്നതിനായി രാത്രി ഒരു മണി മുതൽ കാത്തുനിൽക്കുകയായിരുന്നു ചിലർ. ഐഫോൺ 17-ൻ്റെ ലോഞ്ചിനായി ചിലർ ജോലിക്ക് അവധിയെടുത്തു. ന്യൂഡൽഹിയിൽ മാളിൻ്റെ രണ്ട് നിലകളിലായി ആളുകൾ ക്യൂ നിന്നു. ഉപഭോക്താക്കൾക്കായി ഇരിക്കാനുള്ള സൗകര്യവും നൽകിയിരുന്നു. ബെംഗളൂരുവിലെയും പൂനെയിലെയും മറ്റ് രണ്ട് ആപ്പിൾ സ്റ്റോറുകളിലും സമാനമായ സ്ഥിതിയായിരുന്നു.
ഇന്ത്യയിൽ ഐഫോൺ 17-ന് 82,900 രൂപ മുതലാണ് വില ആരംഭിക്കുന്നത്. അൾട്രാ-സ്ലിം ഐഫോൺ എയറിന് 1,19,900 രൂപയാണ് വില. കൂടാതെ, ഐഫോൺ 17 പ്രോയ്ക്ക് 1,34,900 രൂപയും ഐഫോൺ 17 പ്രോ മാക്സിന് 1,49,900 രൂപയുമാണ് വില. വലിയ വിലയുണ്ടായിട്ടും, ആളുകൾക്ക് പുതിയ ഐഫോണുകൾ വാങ്ങാൻ വലിയ ആവേശമാണ്. വിൽപ്പനയുടെ ആദ്യ ദിവസം തന്നെ ഐഫോൺ 17 സീരീസ് ആപ്പിളിന് മറ്റൊരു വിജയമായി മാറുമെന്നാണ് സൂചന.
