അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.എറണാകുളം: സിപിഎം നേതാവ് കെ ജെ ഷൈനിന് എതിരായ സൈബർ ആക്രമണവുമായി ബന്ധപ്പെട്ട കേസിൽ പ്രാദേശിക കോൺഗ്രസ് നേതാവ് ഗോപാലകൃഷ്ണൻ, യൂട്യൂബർ കെ.എം.ഷാജഹാൻ എന്നിവർ ചോദ്യം ചെയ്യലിന് ഹാജരായേക്കും. ഇന്ന് ചോദ്യം ചെയ്യലിന് ഹാജരാകാൻ ആവശ്യപ്പെട്ട് എറണാകുളം റൂറൽ സൈബർ പോലീസ് ഇരുവർക്കും നോട്ടീസ് നൽകിയിരിന്നു. ഇന്നലെ ഗോപാലകൃഷ്ണന്‍റെയും ഷാജഹാന്‍റെയും വീട്ടിൽ പരിശോധന നടത്തിയ അന്വേഷണസംഘം ഇരുവരുടെയും മൊബൈൽ ഫോണുകൾ പിടിച്ചെടുത്തിരുന്നു.
യൂ ട്യൂബ് ചാനലിലൂടെ ഷൈനെയും വി എൻ ഉണ്ണികൃഷ്ണൻ എം എല്‍ എയും അധിക്ഷേപിച്ച് വീഡിയോ ഇട്ടു എന്നതാണ് കെ ജെ ഷൈനിന്‍റെ പരാതി. വീഡിയോ അപ്‌ലോഡ് ചെയ്യാൻ ഉപയോഗിച്ച ഷാജഹാന്‍റെ ഐ ഫോൺ ആണ് കസ്റ്റഡിയിൽ എടുത്തത്. കേസിൽ മലപ്പുറം സ്വദേശിയായ കൊണ്ടോട്ടി അബു എന്ന യൂട്യൂബ് ചാനൽ നടത്തുന്ന യാസർ എടപ്പാളിനെയും പ്രതിചേർത്തിട്ടുണ്ട്. കോൺഗ്രസ് പറവൂർ ബ്ലോക്ക് പ്രസിഡന്റ് കെ.എം റെജിക്കെതിരെ ഇന്നലെ കെ.ജെ ഷൈൻ പരാതി നൽകിയിരുന്നു. കേസിൽ കോൺഗ്രസ് നേതാവ് ജിന്റോ ജോൺ, യൂത്ത് കോൺഗ്രസ് നേതാവ് വി.എസ് സുജിത്ത് അടക്കമുള്ളവരെ പ്രതിചേർക്കുന്ന കാര്യത്തിൽ മെറ്റാ റിപ്പോർട്ട് ലഭിച്ചശേഷം അന്വേഷണസംഘം തീരുമാനമെടുക്കും.
