അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.ന്യൂഡല്‍ഹി: ഹസ്തദാന വിവാദത്തില്‍ പ്രതികരണവുമായി കോണ്‍ഗ്രസ് എംപി ശശി തരൂര്‍. ഏഷ്യ കപ്പ് ക്രിക്കറ്റ് ടൂര്‍ണമെന്റിനിടെയുണ്ടായ ഹസ്തദാന വിവാദത്തില്‍ ഇന്ത്യന്‍ ക്രിക്കറ്റ് ടീമിനെ വിമര്‍ശിച്ച് കൊണ്ടാണ് അദ്ദേഹം രംഗത്തെത്തിയത്.
പാകിസ്താനുമായി കളിക്കാന്‍ തീരുമാനിച്ചാല്‍ കളിയുടെ സ്പിരിറ്റില്‍ത്തന്നെ കളിക്കണമെന്നും കാര്‍ഗില്‍ യുദ്ധകാലത്തുപോലും ഇന്ത്യന്‍ ടീം പാകിസ്താനുമായി ക്രിക്കറ്റ് കളിച്ചിട്ടുണ്ടെന്നും പാക് താരങ്ങള്‍ക്ക് ഹസ്തദാനം നല്‍കിയിട്ടുണ്ടെന്നും ഇന്ത്യന്‍ എക്‌സ്പ്രസില്‍ എഴുതിയ ലേഖനത്തില്‍ തരൂര്‍ വ്യക്തമാക്കി.
‘പാകിസ്താനെതിരേ ശക്തമായ നിലപാടാണ് സ്വീകരിക്കുന്നതെങ്കില്‍, ഇന്ത്യന്‍ ടീം പാകിസ്താനുമായി കളിക്കാന്‍ പാടില്ലായിരുന്നു. പക്ഷേ, അവരുമായി നമ്മള്‍ കളിക്കാന്‍ തീരുമാനിച്ചാല്‍ കളിയുടെ സ്പിരിറ്റില്‍ത്തന്നെ കളിക്കണം. താരങ്ങള്‍ക്ക് ഹസ്തദാനം നല്‍കണമായിരുന്നു. 1999-ല്‍ കാര്‍ഗില്‍ യുദ്ധം നടക്കുമ്പോള്‍ പോലും നമ്മള്‍ ഇങ്ങനെ ചെയ്തിട്ടുണ്ട്. രാജ്യത്തിനായി സൈനികര്‍ മരിക്കുന്ന ദിവസം, ഇംഗ്ലണ്ടില്‍ പാകിസ്താനെതിരെ ലോകകപ്പ് കളിക്കുകയായിരുന്നു ഇന്ത്യ. കളിയുടെ സ്പിരിറ്റ് രാജ്യങ്ങള്‍ക്കിടയിലും സൈന്യങ്ങള്‍ക്കിടയിലും മറ്റും നടക്കുന്നതില്‍നിന്ന് വ്യത്യസ്തമായ ഒന്നായതിനാല്‍ നമ്മള്‍ ഹസ്താദാനം നല്‍കിയിരുന്നു. അതാണ് എന്റെ നിലപാട്’, തരൂര്‍ കുറിച്ചു.പാകിസ്താനെതിരായ വികാരങ്ങള്‍ മനസിലാക്കാവുന്നതാണെങ്കിലും, കളിയുടെ ആത്മാവിനെ രാഷ്ട്രീയത്തില്‍നിന്നും സൈനിക സംഘര്‍ഷങ്ങളില്‍നിന്നും വേറിട്ട് നിര്‍ത്തണമെന്ന് ക്രിക്കറ്റ് ആരാധകനായ തരൂര്‍ പറഞ്ഞു.
