അന്വേഷണം വാർത്തകൾ ലഭിക്കാന്‍ വാട്സാപ്പ് ചാനലില്‍ ചേരൂ.അരിയുമ്പോള്‍ കരയുമെങ്കിലും സവാളയില്ലാത്ത ഇന്ത്യന്‍ വിഭവങ്ങള്‍ കുറവാണ്. അതിനാല്‍ തന്നെ പലപ്പോഴും കൂടുതല്‍ അളവിലാണ് നാം സവാള വാങ്ങി സൂക്ഷിക്കാറുള്ളത്. പലപ്പോഴും ഇത്തരത്തില്‍ സൂക്ഷിക്കുന്ന സവാളയുടെ പുറമേ ഒരു കറുത്ത പൊടി പ്രത്യക്ഷപ്പെടാറില്ലേ. എന്നാല്‍ എന്താണ് ഈ കറുത്തപൊടിയെന്ന് പലര്‍ക്കും അറിയില്ല.
എന്താണ് ഈ കറുത്ത നിറത്തിലുള്ള പൊടി?
ഈര്‍പ്പമുള്ള ചുറ്റുപാടില്‍ വളരുന്ന ആസ്പെര്‍ജില്ലസ് നൈഗെര്‍ എന്ന ഫംഗസാണ് ഈ കറുത്ത നിറത്തിലുള്ള പൊടി. വായുസഞ്ചാരമില്ലാത്ത ഇടങ്ങളില്‍, പ്ലാസ്റ്റിക് സഞ്ചികളിലെല്ലാം സൂക്ഷിക്കുന്ന സവാളയിലാണ് ഇത് പ്രത്യക്ഷപ്പെടുക.
ആരോഗ്യത്തെ ബാധിക്കുമോ?
സവാളയുടെ പുറംഭാഗത്താണ് ഇത് കാണപ്പെടുന്നത് എന്നതിനാല്‍ തന്നെ ഈ ഭാഗം ഉരിഞ്ഞുകളഞ്ഞ് സവാള ഉപയോഗിക്കാം എന്നാണ് വിദഗ്ധര്‍ ഉള്‍പ്പെടെ അഭിപ്രായപ്പെടുന്നത്. ഈ സവാള വൃത്തിയാക്കിയതിന് ശേഷം നല്ല രീതിയില്‍ കഴുകുകയും വേണം. സവാളയുടെ ഉപരിതലത്തില്‍ കാണപ്പെടുന്ന ഇവ അകത്തേക്ക് ബാധിക്കാന്‍ സാധ്യത തുടക്കത്തില്‍ കുറവാണ്. എന്നാല്‍ പ്രതിരോധ ശക്തി കുറവുള്ള, ശ്വാസകോശ സംബന്ധമായ അസുഖമുള്ള, ആസ്തമയുള്ള ആരും ഈ സവാള ഉപയോഗിക്കാതെ ഇരിക്കുന്നതാണ് ഉത്തമം.
